Ko e Fakaafe ki he Seminelí

Tā fakatātā ʻa Katelyn Budge

Naʻe ngali fakailifia kiate au ʻa e hiki mei he ako lotolotó ki he akoʻanga māʻolungá. Naʻe toe tānaki mai ki ai mo e pau ke u toe kamata kau atu ki he seminelí. ʻI homau siteikí naʻe fai ʻemau seminelí ʻi he efiafí, ʻa ia ko ʻene tuku pē ʻa e akó ʻoku ou hangatonu ai pē ki he seminelí. ʻOku faʻa fakaongosia e taimi-tēpile ko ʻení he ʻoku lahi ange foki ʻeku ngāue fakaako mei ʻapí he taimí ni koeʻuhi ko ʻeku ʻi he ako māʻolungá. Neongo ʻoku teʻeki ke u maʻu ha taimi lahi ʻo hangē ko ia ne u anga ki aí, ka ʻoku ou houngaʻia ʻi hono fakaʻaongaʻi hoku taimí ki ha meʻa ʻoku lelei kiate aú.

Naʻe akoʻi kimautolu ʻe heʻemau faiakó ʻi he seminelí ki he anga e lotu laulau houa ʻa ʻĪnosi, ʻo fakataufolofola ki he ʻEikí. Naʻá ne fakaafeʻi kimautolu ke mau maʻu ʻa e tui tatau pea lotu ʻi ha miniti ʻe 30 ʻi he tuku ʻa e seminelí ʻi he ʻaho ko iá. Naʻá ku fai ʻa e tukupā ko iá ʻo fai ha lotu. Naʻe talamai ʻe heʻeku faiakó ke mau lotu ʻo hangē pē haʻamau fepōtalanoaʻaki kakato mo e Tamai Hēvaní. Naʻá ku feinga ke fetuʻutaki mo Ia mo fakamālō kiate Ia koeʻuhí ko e ngaahi tāpuaki ʻi heʻeku moʻuí. Naʻe kamata māmālie pē ʻa e miniti ʻe 30, kae hangē naʻe vavé ʻi heʻene ofi ke ʻosí. ʻOku fakamālohia moʻoni hoku vā fetuʻutaki mo e Tamai Hēvaní ʻi heʻeku ʻalu ki he seminelí, ako e folofolá, mo ako lahi ange ki he ongoongoleleí.

Neongo ʻoku ʻi ai ha ngaahi meʻa ʻi he moʻuí ʻoku ngali fakailifia—hangē ko e kamata ʻalu ki he seminelí pe ki ha ʻapiako foʻou—kuó u ako ke falala ki he Tamai Hēvaní mo ʻEne palaní. Ko e taha ʻeku potufolofola manako ne u ako ʻi he seminelí ko e ʻEta 12:6, ʻa ia ʻoku pehē, “Ko e tuí ko e ngaahi meʻa ia ʻoku ʻamanaki ki ai kae ʻikai mamata ki ai.” ʻOku ʻikai fiemaʻu ia ke tau toki mamata kae toki maʻu e tuí.

ʻI he taimi ʻoku faingataʻa pe puputuʻu ai e ngaahi meʻa ʻoku hokó, lotu ʻo kole ha fakahinohino ki he Tamai Hēvaní ke ke ʻiloʻi e meʻa ke faí mo e mālohi ke kei hokohoko atu pē e ngāué. ʻOua te ke foʻi. Te ke lava ʻo fai ia!