Ko ha Foʻi Kahoa mo ha Palōmesi
Naʻe tokoniʻi au ʻe he meʻaʻofa mahuʻinga mei heʻeku Kui Tangatá ke u tokanga taha ki he temipalé.
Tā fakatātāʻi ʻe David Comerón
ʻOku ou saiʻia ʻi he ngaahi meʻa ngingilá. Kuó u pehē maʻu aipē. ʻOku ou saiʻia ʻi he tapa mai ʻa e meʻa ngingilá ʻo tapua mai ai e māmá, pea ʻoku ou tui ko e ʻuhinga ia ʻoku ou fuʻu saiʻia ai ʻi he ngaahi maama ngingila kilisitalá. ʻOku tautautefito ʻeku saiʻiá ʻi he ngaahi maama ngingila kilisitala ʻi he temipalé.
ʻOku ou manatuʻi haʻaku luelue loto-ʻapasia mo hoku fāmilí ʻi ha ʻoupeni hausi ʻo e temipalé ʻi hoku taʻu hivá. He ʻikai toe ngalo ʻiate au ʻeku tuʻu ʻi lalo he ngaahi maama ngingila ʻi he loki silesitialé mo e ofoofo moʻoni. Naʻe ʻikai ke u faʻa tui ki he fakaʻofoʻofa, maʻa, mo e hinapaki ʻo e meʻa kotoa pē.
ʻI heʻemau hū ki tuʻa mei he temipalé, naʻe talamai ʻe heʻeku kui tangatá ʻoku ʻi ai haʻane meʻaʻofa maʻaku. Naʻá ku fuʻu ʻohovale mo fiefia ʻi hono toʻo hake ʻe heʻeku kui tangatá ha foʻi kahoa ngingila mei hono kató. Ko ha foʻi sēini lōloa mo ha kiʻi foʻi kilisitala ʻi he muiʻi seiní—ʻo hangē pē ko ia ʻi he temipalé.
Naʻe pehē mai ʻe heʻeku kui tangatá ʻi heʻene haʻi e foʻi kahoá ki hoku kiá, “Naʻá ku ngaohi ʻeni maʻau.” Ko ha tangata ngāue fakaʻuhila ʻeku kui tangatá. ʻOkú ne fakatau atu ha ngaahi maama ʻuhila fakaʻofoʻofa kehekehe. Naʻá ne talamai naʻá ne ngaohi e kahoá ʻaki ha meʻi kilisitala makehe mei hono fale ngāué pea naʻá ne loto ke u tui ia koeʻuhí ke ne fakamanatu mai kiate au ʻa e temipalé.
Naʻá ne kole mai ke u palōmesi ange te u ʻalu ki he temipalé ʻi ha ʻaho, pea fai mo ʻene fakamoʻoni ki he anga hono faitāpuekina ʻene moʻuí ʻe he temipalé mo e founga te ne lava ai ʻo faitāpuekina e moʻui ʻa e tokotaha kotoa pē. Ko e taimi kotoa pē ʻoku ou tui ai hoku foʻi kahoa kilisitalá te u fakakaukau ki he temipalé mo ʻeku fakaʻamu ke u hū ki aí. Kuó u manatuʻi maʻu pē ʻa e palōmesi ko ia naʻá ku fai ki heʻeku kui tangatá.
ʻI he faifai peá u lahi feʻunga ke ʻalu ʻo papitaiso ʻi he temipalé, naʻá ku fiefia ʻi he faingamālie kotoa pē naʻá ku maʻu ke u ʻalu aí. Naʻá ku ongoʻi maʻu pē ʻi he temipalé ha fehokotaki mo ʻeku Tamai Hēvaní. Pea he ʻikai pe toe ngalo ʻiate au ʻa e ongo naʻá ku maʻu hili hono maʻu hoku ʻenitaumení. Hili e aʻusia toputapu ko iá, ne u hū atu ki he loki silesitialé ʻo fāʻofua ki heʻeku kui tangatá ʻi lalo he maama kilisitala fakaʻofoʻofá.
Naʻe moʻoni pē ʻeku kui tangatá ʻo kau ki he anga hono faitāpuekina ʻe he temipalé ʻetau moʻuí. Kuo hokohoko atu ʻene faitāpuekina au ʻi hono kotoa ʻo ʻeku moʻuí koeʻuhí he ʻokú ne tokoniʻi au ke u manatuʻi ʻa ʻeku taumuʻa ʻi he māmaní.