Ko ha Pā Fakalaumālie

Naʻe kamata ke fakakikihi ha ongo meʻa ʻi hoku loki akó ʻi he ʻapiakó. Naʻe fuʻu lahi ʻena tau kapekapé. Naʻe ʻikai ke u saiʻia ai, ka naʻe ʻikai ke ofi mai ʻa e faiakó pea naʻe ʻikai ke u lava ʻo mavahe mei he loki akó, ko ia naʻá ku punou pē ʻo fai ha lotu. Naʻá ku kole ki he ʻEikí ke tokoni mai ke u tukunoaʻi kinaua pea mo fakangaloki ʻena ngaahi leá.

ʻI he ʻosi pē ʻeku lotu ko iá, naʻe aʻu mai ʻa e tokotaha ʻokú ne tokangaʻi ʻa e holó ʻo taʻofi ʻa e keé. Hangē ko iá, naʻe ʻikai ke u manatuʻi ʻe au ha taha ʻo e ngaahi lea naʻá na lea ʻakí. Naʻe toʻo ʻe he ʻEikí ʻa e ngaahi lea palakū ko iá mei hoku ʻatamaí.

ʻOku feinga ʻa Sētane ke tukuhifo kitautolu ʻi ha ngaahi founga lahi, ka ʻoku hangē ʻa e Laumālie Māʻoniʻoní ko ha pā ke ne taʻofi iá. Ko ia ʻoku ʻikai ke u fie ofi ki ha faʻahinga meʻa te ne tekeʻi ke mamaʻo ʻa e Laumālié. Kapau ʻoku tau maʻu ʻa e Laumālié, he ʻikai tuku ʻe he ʻEikí ke puleʻi kitautolu ʻe he koví. ʻOku ʻi heni ʻa e Tamai Hēvaní, Sīsū Kalaisi, mo e Laumālie Māʻoniʻoní ke maluʻi kitautolu.