Ngāue Tokoní mo e ʻOfa ʻa e Fakamoʻuí

Tā fakatātā ʻa Katelyn Budge

ʻI heʻeku kei taʻu 10, naʻe talanoa mai hoku mehikitangá ʻo kau ki hono siasí: Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOkú ne nofo ʻi ha vahefonua kehe, ko ia ne u ʻilo ha uooti ʻi hoku kolo tupuʻangá peá u papitaiso ʻi ha hili ha uike ʻe ua kimui ange ai. Naʻe ʻikai faingataʻa ʻeku kau ʻiate au pē ki he Siasí koeʻuhí he naʻe poupouʻi au ʻe hoku mehikitangá, pea talitali lelei au ʻe hoku ngaahi kaungāmeʻa foʻou ʻi he Kau Finemuí he uōtí.

Naʻe ueʻi au ʻe he anga ʻenau tokoniʻi aú ke u tokoniʻi ai mo e niʻihi kehé. Ne ʻi ai ha taimi naʻe tangi ai ha taha hoku ngaahi kaungā-akó koeʻuhí ko e ʻikai ke sai ʻene sivi he fakaʻosinga ʻo e tēmí pea ʻikai ke ne ʻilo pe ʻe anga fēfē haʻane talaange ki heʻene ongomātuʻá. Naʻá ku fakafiemālieʻi ia, ʻo talaange ke ne loto-toʻa pē. Naʻá ne ongoʻi fiemālie pea fakamālō mai kiate au.

Kuo fakamālohia ʻe he ngāue tokoní ʻeku fehokotaki mo e Fakamoʻuí pea mo e Tamai Hēvaní he ʻokú ne fakahaaʻi mai e founga ke u moʻui ʻaki ai e ngaahi akonaki ʻo e ʻofa mo e manavaʻofa ʻa e Fakamoʻuí. ʻOku ou ongoʻi ʻEne ʻofá ʻi he taimi ʻoku ou tokoniʻi ai e niʻihi kehé pea mo e taimi ʻoku tokoniʻi ai au ʻe he niʻihi kehé.