Ang Kalisod sa Iyang Dalan
Ang dalan sa Manluluwas mahimong dili sayon kanunay, apan Siya molakaw uban nato ug mogiya nato kon asa kita gusto nga moadto.
Mga paghulagway pinaagi ni Yukai Du
Kasagaran pilion nato ang usa ka dalan tungod kay mopaingon kini kon asa kita gusto nga moadto. Apan adunay mas mahinungdanon pa sa usa ka dalan kaysa destinasyon lamang. Anaa usab ang malisod nga dalan—ang matang sa yuta nga atong pagalaktan.
Si Jesukristo nagdapit nato sa paglakaw uban Kaniya (tan-awa sa Moises 6:34; Miqueas 6:8; 1 Juan 2:6; Doktrina ug mga Pakigsaad 19:23). Ang dalan nga Iyang gidapit nato nga pagalaktan mao ang dalan sa pakigsaad—ang dalan sa kalinaw, kalipay, ug kinabuhing dayon uban sa atong Langitnong Amahan—diin kita gusto nga moadto.
Apan sama sa unsa kini nga dalan? Unsa nga matang sa dalan ang atong latason samtang maglakaw kita uban sa Manluluwas?
Pig-ot
“Masigpit ang ganghaan ug malisod ang dalan paingon sa kinabuhing dayon” (Mateo 7:14).
Sa higayon nga ang Iyang dalan ingon og lisod, adunay rason. Ang kapig-ot sa dalan molikay nimo sa pagtunob sa dapit nga makapasakit o makapahisalaag nimo.
Higpit
“Iyang mga dalan higpit” (Alma 37:12).
Ang Iyang dalan dili haruhay. Kini ang labing direktang rota paingon sa atong tumong sa kinabuhing dayon. Dili kini motipas. Apan usahay kita ang motipas. Tungod sa Pag-ula sa Manluluwas, makahinulsol kita dayon ug makabalik ngadto sa Iyang dalan.
Tungason ug Usahay Batoon
“Ang dalan [pauli ngadto sa Dios] tungason ug usahay batoon” (Presidente Henry B. Eyring sa Unang Kapangulohan, “Tabangi Sila sa Ilang Pagbalik,” Abr. 2010 nga kinatibuk-ang komperensiya [ o Liahona, Mayo 2010, 25]).
Ang paglakaw pasaka sa bungtod kapoy kaayo, ug dili nimo makita ang kinatumyan sa usa ka bungtod nga imong gitungas. Apan ang Manluluwas molig-on ug moawhag nimo samtang naningkamot ka sa pagbuhat sa mga butang nga gidapit Niya nga imong buhaton.
Ang mga bato nga anaa sa imong dalan tingali lahi kaysa niadtong anaa sa uban. Ang imong mga hagit ug mga kahimtang imoha ra. Apan ang Manluluwas mao ang labing maayo nga kauban sa pagbiyahe ug motabang nimo sa pag-atubang sa matag babag.
Naghayag
“Ang imong pulong maoy suga nga magtultol kanako ug maoy kahayag sa akong agianan” (Salmo 119:105). “Magpuyo kita sa kahayag, ingon nga ang Dios anaa sa kahayag” (1 Juan 1:7).
Kon ang imong dalan ngitngit, ang Manluluwas makaiwag sa imong dalan, bisan kon igo lang kini sa usa ka lakang ug dayon sa laing lakang diha sa imong panaw pauli ngadto sa imong Langitnong Amahan.
Luwas
“Bisan pag maglakaw ako sa ngitngit nga walog sa kamatayon, dili ako mahadlok kay nag-uban ka man kanako” (Salmo 23:4).
Bisan unsa pa ka makahahadlok, makahingawa, o kalisod sa imong dalan, makabaton ka og kalinaw sa pagkasayod nga samtang maglakaw ka uban ni Jesukristo, Siya maglakaw uban nimo ug mogiya nimo ngadto sa kahilwasan, balik ngadto sa Langitnong Amahan.