Pagpakigbahin sa Akong Pagpamatuod sa usa ka Bidyo sa Boksing

Ako mipili sa pagpakigbahin sa ebanghelyo sa usa ka kataposang proyekto alang sa akong klase sa English sa ika-12-nga grado. Ang akong magtutudlo naghangyo kanamo sa pagsulat ug pagpresentar og usa ka makadani nga pagpamulong bahin sa butang nga kami mahiligon kaayo. Gihatagan kami og daghang kagawasan kon unsay ipamulong ug unsaon kini sa pagpresentar.

Akong gipili ang pagpamulong kabahin kon unsaon nato sa pagbuntog ang tanang kalisdanan pinaagi sa Dios ug pinaagi sa maulaong sakripisyo ni Kristo. Gusto usab nakong sagolan kana og laing butang nga akong gusto—boksing. Sa kanunay malingaw gyod ko sa pagbansay ug pagpakig-away sa daghang katuigan. Makakaplag ko og kalipay sa pagkahimong mas maayo. Hinuon, usahay maigo ko, ug sakit kini. Mahagba ko ug dili na makabangon.

Mihukom ko sa paghimo og pelikula nga usa ka makapadasig nga bidyo diin akong gikompara ang kinabuhi ngadto sa usa ka sangka sa boksing. Nag-voice-over ko sa akong pagsulti. Ako namulong mahitungod sa kinabuhi, nga usahay simbolikanhong makasulay og murag nasumbagan sa nawong; mahimo ta nga kapoyon kaayo nga mopadayon; magduhaduha sa atong mga kapabilidad ug maghunahuna kon angayan pa bang mosulay. Ako mipamatuod nga ang atong Amahan sa Langit adunay usa ka plano alang kanatong tanan—pinaagi ni Kristo kita makabuntog sa tanang oposisyon. Ako nasayod gayod nga kon wala si Kristo, wala ako, apan tungod Kaniya, ako makakab-ot sa mga butang nga wala gyod nako mahunahuna!

Naninguha gyod ko nga makaseguro nga ang paghimo sa pelikula, ang mensahe, ug labaw sa tanan ang akong pagpamatuod tinud-anay nga nagpadayag sa unsay nabati sa akong kasingkasing.

Sa wala pa nako gipresentar ang akong proyekto ngadto sa akong klase, mibati kog gamayng kakulba. Subo lang nga ang kalibotan nagtudlo kanato nga daghang mga hiyas sa Kristiyano karaan na ug dili na importante. Nabalaka ko sa unsay mahimong epekto niini sa akong grado o unsa kaha ang hunahuna sa akong mga kaedad. Apan nakadawat ko og usa ka kompirmasyon nga kini usa ka butang nga maayo gyod kaayo! Dili kini basta lang makakuha og maayong grado—kini mahitungod sa pagpamatuod sa unsay akong nahibaloan nga tinuod.

Sa akong pagpakita sa bidyo ngadto sa klase, nabati na usab nako nga mao kini ang gusto sa Langitnong Amahan nga akong buhaton. Sa dihang nahuman ang bidyo, sa akong katingala ang tanan misugod sa pagpamakpak. Ang mga tawo mipasa nako og mga mugbong sulat bahin sa unsay ilang mga hunahuna mahitungod sa akong proyekto. Kadaghanan niini nga mga mugbong sulat nag-ingon og butang nga sama sa "Himayaon ang Dios" o "Maayo ang Dios." Daghan sa akong mga kauban sa klase misulti nako nga sila adunay nabati nga espesyal samtang nanan-aw sila sa akong bidyo.

Sa dihang nadawat nako ang akong grado, nalipay ko nga nakakita sa taas nga marka. Ang akong magtutudlo nagpasalamat nako sa akong pagpamatuod ug alang sa panahon nga akong gigahin sa pagpakita niini sa paagi nga akong gihimo.

Ako mopamatuod nga kita nagpakabuhi sa samok nga mga panahon—ang kalibotan mitawag sa maayo nga daotan ug ang daotan maayo. Apan adunay daghan gihapon kaayo nga maayo kay sa daotan! Ako nasayod nga kon kita maisogon ug direkta nga mopakigbahin sa atong mga gituohan ug mohatag sa atong mga pagpamatuod, dili lang nga kita mapanalanginan, apan kita makakita usab sa mga kinabuhi sa uban nga naglibot kanato nga napanalanginan.