Unsaon Nako nga Mahimo nga ang Akong Labing Maayo nga Kaugalingon ug Magpuyo sa Akong Labing Maayo nga Kinabuhi?

Ang atong labing tiunay nga personal nga transpormasyon mahitabo kon ang atong mga espiritu ug lawas mahiusa, lakip sa pagkabanhaw, aron mamahimo nga atong imortal nga kalag. Sumala sa gitudlo sa Doktrina ug mga Pakigsaad, “Ang mga elemento mahangtoron, ug ang espiritu ug elemento, nga dili na gayod mabulag, makadawat og kahingpitan sa kamaya.”

Ang espirituhanong transpormasyon nga gitinguha kaayo nato moabot kon kita espirituhanong matawo pag-usab diha ni Jesukristo—pinaagi sa atong mga buhat, sa atong mga kinaiya, ug sa atong pagkatawo.

Kita angay nga mokonektar ug mahimong mausab tungod sa atong mga relasyon sa pamilya.

Walay henerasyon nga mas andam kay sa ninyo nga makatampo ug mohimo og kalainan sa pagpundok sa pamilya sa Dios—ang pamilya sa tanang katawhan.

Kanunay, ang matag indibidwal mahinungdanon.

Siyempre, matag usa ninyo talagsaon. Kita adunay daghan nga mga tinubdan—ang atong mga ngalan, mga tradisyon, ug gani ang pagkaon—nga nakatampo sa atong personalidad. Apan sama sa maayong pagkatudlo ni Presidente Russell M. Nelson, ang atong malahutayon nga espirtuhanong pagkatawo moabot kon atong makita ang atong kaugalingon isip “anak sa Dios, usa ka anak sa pakigsaad, ug usa ka disipulo ni Jesukristo.”

Kita nakasabot kon si kinsa kita sa higayon nga masabtan nato kang kinsa kita.

Hilabihan sa kasungian ug kabayolente, pagkadili makiangayon, ug kawalay hustisya niini nga kalibotan naggikan sa atong dili pagsabot ug dili pagtratar sa matag usa isip mga igsoon sa atong Langitnong Amahan.

Ang atong labing maayo nga istorya moabot kon kita mopili sa pagpahisakop sa pakigsaad—ang pagkahisakop pinaagi sa pakigsaad ngadto sa Dios ug sa usag usa.

Ang matag hinimo sa tawo nga pilosopiya nga "gipili nako ang akong kaugalingon" walay bili kon itandi ngadto sa walay kinutoban nga labing dako ug mahimayaon nga saad nga kita makakat-on sa pagpanalangin niadtong anaa sa atong palibot sama sa buhaton sa atong Manluluwas ug nga kita makadawat sa tanan nga anaa sa Dios nga atong Mahangtoron nga Amahan.

Ang atong kaugalingong labing nindot nga sugilanon molabaw pa sa hagip-ot nga kaugalingong interes ug limitado nga pagsabot sa mortalidad. Kini naglangkob sa atong legasiya sa hugot nga pagtuo, sa atong pagsalig nga ang Dios nakaila kon kinsa kita ug nga Siya nagpakabana kanato sa mga butang nga dagko ug gagmay. Siyempre, walay usa nato nga hingpit. Kitang tanan makahimo og kasaypanan ug may mga higayon nga mopalayo gikan Kaniya. Apan ang Iyang kahayag kanunay nga nagbanwag. Palihog isalikway pag-usab ang bisan unsang pagbati nga labaw o pagbati nga sad-an nga lagmit nagpahimulag kaninyo gikan sa Dios o sa Iyang gipahiuli nga Simbahan isip usa ka imbitasyon sa pag-duol ug pagsinati pag-usab sa gugma ni Jesukristo.

Ang Dios kanunayng nagpakabana kabahin sa atong paglambo. Sa mapaubsanong paagi kita mobuhat sa atong labing maayo, sa pagkahibalo nga ang pagkaperpekto anaa ni Jesukristo. Kon kita mosalig sa Dios, kita mopahawa sa padayong pagkaperpeksiyonista sa kalibotan ug sa pagsegi og sulsol nga kita dili igo ug dili gayod maayo. Kon kita mosalig sa Dios, kita makakaplag og kalinaw, paglaom, ug usa ka dalan sa pagpadayon. Kon unsay atong buhaton adunay mga sangpotanan. Ang Dios nagpakabana sa atong gibuhat.

Ang Dios nga atong Amahan ug ang atong Manluluwas nga si Jesukristo kanunay nga nakahibalo ug naghunahuna sa labing maayo para kanato. Samtang kita nagpanaw sa dalan sa kinabuhi, kita kasagaran makakaplag og mga butang nga atong gikinahanglan sa atong pagpadayon—ang ebidensiya nga adunay Usa nga nahigugma kanato nasayod unsay atong dangatan.

Usahay kita gusto nga ang Dios mosulti pa nato og dugang pa, usahay gusto natong sultihan kita Niya og diyutay. Kasagaran, pinaagi sa Espiritu Santo, Siya mopakita sa Iyang mahangtoron, maalamon nga gugma pinaagi sa unsa ug kanus-a Siya mohatag kanato sa unsa ang Iyang nahibaloan nga labing makapanalangin kanato.

Ang gamhanang makapausab sa kinabuhi nga mga koneksiyon ug mga transpormasyon mahitabo kon kita mogamit sa sukaranang mga panginahanglan alang sa pagkat-on nga makit-an diha sa balay sa Ginoo.

Palihog diskobreha ang kaputli sa kasingkasing, kaklaro sa katuyoan, pagkamapainubsanon, ug maalamon nga pagpursige sa giprayoridad, mabungahon nga mga paningkamot. Kini mas nagtudlo kanato kay sa pagbulag sa unsay atong gihunahuna ug gibuhat sa Dominggo gikan sa unsay atong gihunahuna ug gibuhat sa Lunes hangtod sa Sabado.

Sa tanan nga atong buhaton, si Jesukristo ang atong unahon. Isip usa ka butang nga iprayoridad, kita mobutang ni Jesukristo og una taliwala sa tanang butang nga atong buhaton. Isip usa ka butang nga tutokan, kita mobutang ni Jesukristo og una diha sa matag butang nga atong buhaton.

Sa mga adlaw nga moabot, ang Ginoo naglaom kaninyo sa pagpamulong sa Iyang kamatuoran nga may kamabination ug, diha sa hugot nga pagtuo ug pagkamapainubsanon, sa pagpamulong inubanan sa gahom sa Iyang kamatuoran.

Ang mga butang nga paggawas mausab, apan ang gugmang putli, ang putli nga gugma ni Kristo, molahutay hangtod sa kahangtoran.

Hinaot kita “mag-ampo ngadto sa Amahan,” minahal nga kaigsoonan, “sa tibuok nga kusog sa kasingkasing, nga [kita] mapuno unta niining gugma [‘ang gugmang putli ni Kristo’], diin siya naghatag ngadto sa tanan kinsa mga tinuod nga mga sumusunod sa iyang Anak, si Jesukristo.” Kini nga gugmang putli moabot kon kita makaila kon si kinsa kita ug kang kinsa kita ug samtang kita magdiskobre ug mamahimong labing maayo nga bersyon sa atong kaugalingon nga istorya.

Ako mohatag sa akong pagpamatuod ug pagsaksi nga ang mahangtoron nga mga kamatuoran sa Basahon ni Mormon, sa makapahimaya nga mga pakigsaad sa balay sa Ginoo, ang mga pagpamatuod sa mga propeta ug mga apostoles, ug ilabi na sa labaw nga gasa sa Espiritu Santo mokonektar ug mousab kanato diha ni Jesukristo samtang kamo mosulat sa inyong kaugalingong labing maayo nga istorya.