2026 nga Tema sa Kabatan-onan
Lakaw uban Kanako—Atô ning Himayhimayon
Kini nga tema karong tuiga tulo ka pulong ang gitas-on, apan ang matag usa niini nga mga pulong daghan og mahimo sa pagtudlo kanato.
Sama sa milabayng tuig nga tema sa kabatan-onan nga, “Tan-aw ngadto kang Kristo,” ang tema karong tuiga— “Lakaw uban Kanako” [Walk with Me]”—usa ka pasumbingay. Niining kinabuhia, kadaghanan kanato walay oportunidad nga makakita o makalakaw uban sa Manluluwas sa literal nga paagi. Busa unsa diay ang ipasabot sa “lakaw” kauban sa usa ka tawo kinsa wala diha sa pisikal? Atô ning himayhimayon.
Lakaw
Dihang gitawag sa Ginoo si Enoch nga mahimong propeta, Siya mihatag kaniya og usa ka saad: “Ang imong tanang pulong hatagan nako og kaangayan; ug ang kabukiran mahanaw sa imong atubangan, ug ang mga suba mobalhin sa ilang agianan, ug makig-uban ikaw kanako, ug ako nganha kanimo; busa lakaw uban kanako” (Moises 6: 34).
Kon ikaw gisaaran nga ang paglakaw uban sa Dios nagpasabot nga Siya mosuporta sa imong mga pulong, motangtang sa mga babag sa imong agianan, ug kanunay nga makig-uban kanimo—nan, nganong dili ka man molakaw uban Kaniya?
Pagkaanindot nga balita: Gisaaran ka niini, tingali bag-ohay lang gyod sama sa milabayng Dominggo. Dihang miambit kamo sa sakramento, misaad kamo nga “sa kanunay mohinumdom Kaniya ug mosunod sa Iyang mga sugo”—sa laing pagkasulti, molakaw uban Kaniya. Ug nganong gibuhat ninyo kini? “Aron [kamo] sa kanunay makabaton sa iyang Espiritu uban [kaninyo]” (Doktrina ug mga Pakigsaad 20:77).
Karon, inyong mabantayan nga ang Ginoo wala mag-ingon ni Enoch nga, “Barog diri ug tan-awa ang palibot kauban nako.” Wala Siya moingon nga, “Lingkod ug pahulay uban nako sa makadiyot.” Miingon Siya, “Lakaw uban kanako.” Kinahanglan nga kita molihok base sa espirituhanong mga pag-aghat nga atong nadawat. Kinahanglan nga mobuhat kita ug mosulti sa unsay atong gituohan nga eksakto.
Sama sa giingon ni Presidente Marion G. Romney (1897–1988), magtatambag sa Unang Kapangulohan, “Makagiya lamang Siya sa atong mga lakang kon atong itikang ang atong mga tiil.”
Apan bantayi unsa pay wala isulti sa Ginoo. Wala siya moingon nga, “Dagan uban kanako.” Wala Siya moingon nga, “Lukso nga walay paningkamot latas sa mga babag uban kanako.” Wala Siya mohangyo kanato nga “modagan labaw pa kay sa [atong] kusog” (Mosiah 4:27). Wala siya maglaom nga kita padayong molihok sa hilabihan nga kapaspas. Wala siya maglaom nga dili kita makahimo og mga sayop o dili mawad-an sa kadasig. Gusto lamang Siya nga kita magpadayon.
Uban sa
Molakaw kita uban sa Manluluwas. Dili mag-una Kaniya. Seguradong dili layo gikan Kaniya!
Kon kamo sa literal kauban og lakaw sa usa ka tawo, maglakaw kamo tapad kanila. Apan niini nga sambingay, ulahi kita og gamay sa Manluluwas. Nag-una Siya, ug mosunod kita—nga duol.
Kon anaa ka sa eksakto nga dalan, ang dalan dili “modala” padulong kang Jesus—Siya usab anaa niini! Hinumdomi ang sakramento! Ang Ginoo, pinaagi sa Iyang Espiritu, sa kanunay makig-uban kaninyo, hangtod nga padayon ninyo Siya nga dapiton.
Ang Langitnong Amahan ug si Jesukristo wala kaayo maghunahuna kon asa kamong dapita sa dalan kondili sa direksiyon nga inyong giatubang. Sugaton nila kamo bisan asa kamo. Dili igsapayan bisan unsa ka hinay ang inyong paglakaw.
Ako
Kinahanglan kitang molihok (MOLAKAW). Kinahanglan nga buhaton nato kini subay sa mga sugo sa Dios ug sa mga pag-aghat sa Espiritu (UBAN). Ug kinahanglang buhaton nato kining tanan kauban sa walay lain kondili si Jesukristo (KANAKO).
(Kay si Jesukristo, Iyang Langitnong Amahan, ug ang Espritu Santo usa ra sa katuyoan—tan-awa sa Juan 10:30; 17:21; Doktrina ug mga Pakigsaad 35:2—eksakto ang pag-ingon nga kamo “naglakaw kauban sa Dios,” “naglakaw kauban sa Manluluwas,” “naglakaw kauban sa Espiritu,” o sa bisan unsa sa ingon niana nga matang.)
Adunay daghan nga tingog nga sundon niini nga kalibotan. Daghan kaayong mga tig-impluwensiya, mga artista, ug mga politiko kinsa gusto nga kamo “mokuyog” kanila (o gani mohatag nila og kwarta). Unsay isulti sa uban tingali mapuslanon, apan lamang kon kini nahiuyon sa mga pagtulun-an sa Manluluwas.
Lakaw uban Kaniya.