Lakaw uban Kanako

Gihangyo ka na ba sa pagbuhat og usa ka butang nga sa imong tan-aw dili ka makahimo? Tingali wala ka mobati nga igo ang imong kalig-on o kamaalamon, o nabalaka nga basin kataw-an o sawayon ka sa uban. Kon ugaling ingon niini ang imong gibati, wala ka mag-inusara.

Liboan ka tuig na milabay, dunay tawo nga ginganlan og Enoch. Si Enoch gihangyo sa Ginoo nga mosangyaw og paghinulsol ngadto sa katawhan—sa pipila ka labing daotan dinhi sa yuta nga sukad iyang nakita.

Wala magtuo si Enoch nga mahimo niya kini. Giingnan niya ang Dios nga bata pa kaayo siya, wala siyay igong mga higala, ug dili siya ingon niana kamaayo (tan-awa sa Moises 6:31).

Apan gihatagan si Enoch og saad sa Dios. Gisultihan niya ang nahadlok nga tawo nga “Lakaw ug buhata ang gisugo nako nimo” ug “ang kabukiran mahanaw sa imong atubangan, ug ang mga suba mobalhin sa ilang agianan, ug makig-uban ikaw kanako, ug ako nganha kanimo, busa lakaw uban kanako” (Moises 6:32, 34).

“Lakaw uban kanako.” Pagkayano, pagkatahom nga pagdapit.

Ang Dios misaad ni Enoch nga kon may igo siyang kaisog aron makasugod, niana ang Dios makig-uban kaniya sa matag lakang diha sa dalan. Ang Dios mohimo ni Enoch nga gamhanan ug lig-onon siya aron makahimo og mas daghan pa ug tabangan siya nga mahimong labaw kay sa iyang mahunahuna.

Ang usa sa daghan nga ngalan sa Manluluwas mao ang Immanuel, o “Ang Dios ania uban kanato” (Mateo 1:23). Anaa sa ngalan ug kinaiyahan sa Ginoo ang paglakaw uban kanato. Ang pagpili anaa kanato—magalakaw ba usab kita uban Kaniya?

Karon nga panahon, molantaw kita ni Enoch isip usa ka tawo sa pagtuo ug usa ka talagsaong propeta ug lider. Apan sa wala pa si Enoch nga propeta, adunay usa ka mas batan-ong Enoch kinsa nagduhaduha sa iyang kaugalingon apan sa gihapon mipili nga maglakaw kauban sa Dios.

Kon lisod ang kinabuhi, kon ikaw wala mobati nga ikaw igo na, hinumdomi ang saad sa Ginoo kang Enoch, ug diha kanimo. Siya magauban kanimo sa paglakaw. Dili ka Niya pasagdan nga mag-inusara, dili gayod bisan sa usa ka lakang.

Immanuel. Ang Dios magauban kanato. Ang Dios magauban kaninyo!

Sama kaninyo mga young men, ang Ginoo mihangyo kang Enoch sa pagtuman sa importanteng mga responsibilidad sa pagkapari. Ang iyang tahas mao ang pagsangyaw og paghinulsol ngadto sa mga tawong daotan. Gipahayag ni Enoch ang iyang mga pagduhaduha. “Usa lamang [ako] ka batan-on,” miingon siya. “Ang tanang katawhan nagdumot kanako … dili ko maayong mosulti; kay imo ba akong sulugoon?” (Moises 6:31).

Mitubag ang Ginoo uban sa gahom ug kaseguroan. “Lakaw ug buhata ang gisugo nako nimo … Bukha ang imong ba-ba, ug mapuno kini … . Ang akong Espiritu anaa kanimo … ; ug ang kabukiran mahanaw sa imong atubangan … ; busa lakaw uban kanako” (Moises 6:32, 34).

Nahibaloan ni Enoch nga kon hatagan kita sa Ginoo og tahas, dili kita mag-atubang niini nga mag-inusara. Kon kita mohimo ug motuman sa mga pakigsaad uban ni Kristo, nagalakaw kita uban Kaniya ug nakig-ambit sa Iyang gahom—mahimo kitang mga instrumento sa Iyang mga kamot.

Sama ni Enoch, ikaw adunay mahinungdanon nga tahas: sa pagpangalagad, pagserbisyo sa templo, pagpangalagad sa sakramento, pagtuon sa mga kasulatan, pagsunod sa mga sumbanan sa ebanghelyo, paghinulsol, pagpangandam alang sa mga misyon, ug daghan pa. Ingon og bug-at kining paminawon. Tingali mobati kamo nga dili igo. OK lang kana. Dili kini mahitungod sa pagbuhat nga mag-inusara. Mahitungod kini sa pagpili karon—karong adlawa ug sa matag adlaw—sa paglakaw uban sa Dios.

Uban sa Iyang tabang, kamo makahimo sa tanan nga butang. Siya molig-on, mopasaylo, ug himoon niya nga kamo makahimo lapas sa inyong natural nga abilidad. Nahigugma Siya kaninyo! Isip Kinatibuk-ang Presidente sa Young Men, gihigugma namo kamo ug naghinamhinam nga ikauban kamo sa pagsuhid sa makadasig nga tema sa 2026: Lakaw uban Kanako.”