Ngano nga ang mga kasulatan naghisgot man mahitungod sa Paglalang sa yuta?

Ang Paglalang, ni Annie Henrie Nader

Ang mga kasulatan naghisgot mahitungod sa Paglalang aron matudloan kita sa katuyoan nga nagpaluyo niini imbis sa proseso nga may kalabotan niini.

Dihang gihangyo ni Moises ang Ginoo sa “[pag]sulti [kaniya] mahitungod niini nga kalibotan … ug usab sa mga langit,” ang Ginoo miingon, “Kini ang akong buhat ug akong himaya—ang pagpahitabo sa pagka-imortal ug kinabuhing dayon sa tawo.” (Moises 1:36, 39).

Dihang gitudloan sa Ginoo si Abraham mahitungod sa Paglalang, Iya gipakita kaniya ang Konseho sa Langit, diin ang espiritung mga anak sa Dios nagpundok. Nakita ni Abraham ang premortal nga si Jesukristo nga nagpasabot:

“Manaog kita, kay adunay luna didto, ug dad-on nato kini nga mga butang, ug magbuhat kita og usa ka yuta diin kini sila mahimo nga makapuyo;

“Ug ato silang sulayan pinaagi niini, aron masuta kon mobuhat ba sila sa tanang butang, bisan unsa ang isugo sa Ginoo nga ilang Dios ngadto kanila;

“… Ug sila nga nagmatinud-anon sa ilang ikaduhang naangkon nga kahimtang makabaton og himaya nga idugang sa ilang mga ulo hangtod sa hangtod” (Abraham 3:24–26).

Ang halapad ug mahimayaong mga nilalang, lakip kini nga yuta, mga kabahin sa Iyang plano nga makatabang kanato, nga Iyang mga anak, nga makadawat og kaluwasan ug kahimayaan.