Ang Tanan Molambo Kon Ikaw Mosalig sa Dios

Niini nga panahon, nagsugod ko sa pagduhaduha sa katinuod sa ebanghelyo, sa akong pagpamatuod, ug kon si kinsa si Jesukristo. Sa usa ka punto, gani nagduda ko sa Iyang pagkaanaa ug nagsugod sa paghunahuna nga ako dili na motuo og Dios. Ang akong kasingkasing gahi ug bugnaw sama sa bantok nga ice.

Kadto nga hugna sa akong kinabuhi labihan kalisod ug kakomplikado. Sa akong hunahuna tungod kadto kay wala na kami motuo ni Jesukristo ug sa Iyang gahom, ang among kinabuhi nawad-an og kahulogan ug nahimong miserable.

Sa kadugayan, naimpluwensiya ko sa akong papa nga magsugod sa pagsimba og balik. Gibuhat ko kini bisan og naglibog gihapon ko ug adunay daghang pangutana.

Usa ka adlaw sa simbahan, nakakita ko og poster bahin sa seminary. Nakahatag kini og interes ngari nako. Akong giduol ang akong bishop aron mangutana mahitungod niini. Diha dayon iya kong giapil sa group chat sa seminary ug miingon nga magsugod ang seminary sa alas 5:30 sa buntag.

Mao nga, nagsugod ko sa pagtambong og seminary. Nakatabang kini nga makabaton ako og bag-o nga mga higala ug sa kataposan nakaangkon og usa ka pagpamatuod sa Simbahan ug sa mga kasulatan. Duna koy titser nga miawhag gayod nako sa akong klase ug mihatag sa labing maayo kanamo. Akong nadiskobrehan nga ang pagtuon sa mga kasulatan sa tinuod magtugot kanato nga makaila sa Manluluwas. Adunay kalainan tali sa pagpaminaw sa pagpamatuod sa usa ka tawo ug sa pagtinguha og imong kaugalingon pinaagi sa pagtuon ug sa pagtuo.

Sa una pa lang, nahibalo ko mahitungod sa Langitnong Amahan ug ni Jesukristo pinaagi sa unsay gisulti sa uban ngari nako. Apan dili sa kanunay kita makasalig lamang sa mga pagpamatuod sa uban. Kinahanglan nga kita mismo ang makaila sa Manluluwas.

Kinahanglan nga mogahin kita og panahon alang sa Manluluwas ug alang sa balaanong mga butang aron mahimo kitang usa sa Iyang mga disipulo. Akong nakat-onan nga ikaw makaila Kaniya kon ikaw:

1. May intensiyon gayod sa pagpangita Kaniya.

2. Mobasa sa mga kasulatan.

3. Maningkamot nga molambo sa espirituhanong paagi.

4. Mag-ampo.

5. Motambong sa templo.

6. Moserbisyo sa uban.

7. Magpuasa.

8. Mosunod sa Iyang ehemplo.

9. Magbaton og malumong kasingkasing.

10. Modumili sa pagsulti og ngil-ad o paglibak sa uban.

Kining mga butanga nakatabang nako nga makaila sa Manluluwas—ug mahimong usa sa Iyang mga disipulo. Ang pagkahimong disipulo ni Jesukristo usa sa labing importante kay magamit nato ang Iyang kahayag sa pagtabang sa uban. Pinaagi sa atong maayo nga mga ehemplo, ang uban makakita unsa kadako nga panalangin ang ebanghelyo.

Dihang mibalik ko sa pagsimba, naa ko sa kinaubsang bahin sa kinabuhi—puno sa pagduhaduha, walay mga higala, walay paglaom, wala makaila kon si kinsa gayod ako o kon unsay akong katuyoan.

Karon, ang ebanghelyo mao ang “kalayo” nga misanag sa akong kinabuhi ug nagtabang kanako sa paghimo sa hustong mga butang ug mahimong mas maayo nga tawo. Kon wala ang ebanghelyo, wala ko masayod kon asa na ako.

Ang tanan molambo sa kinabuhi kon ikaw mosalig sa Dios. Sugod sa panahon nga ikaw magtinguha Kaniya, magsugod ka sa pagkatkat paggawas sa kimba ug ang mga butang magsugod sa paglambo. Siyempre, ang mga kalisdanan moabot gihapon, apan kini nga pagsalig ug tinguha nga motuo anam-anam nga mobayaw kanimo. Tingali mokabat kini og panahon, apan ang mga butang magkaanam sa pagkamaayo!

Kon mosalig ka sa Langitnong Amahan, imong maatubang ang bisan unsay imong giagian—mga hagit man kini, mga pagduhaduha, mga problema sa kahimsog, o mga kasub-anan. Sama pananglit, tingali makakuha ka og maayong mga grado sa test, molambo ang imong kahimsog, o makadawat og mga tubag—usahay mga tubag nga kaniadto pa nimong gitinguha sukad 10 anyos ka pa, sama sa akong sitwasyon—kon ikaw mangita Kaniya ug mosalig Kaniya.

Segurado ako niining mga butanga. Salamat sa ebanghelyo, makaingon ko nga nausab ako. Sa tinuod lang, nausab na ang tanan—akong kasingkasing, mga hunahuna, mga kinaiya, ug mga baroganan. Karon nakahibalo na ako sa kamatuoran, ug kana mao ang naghimo og kalainan. Ang tanan milambo tungod sa ebanghelyo ni Jesukristo.