Bililhong mga Saad sa Plano sa Amahan
Ang atong mga kalag kinahanglan nga mabuhong sa pagpasalamat samtang atong ikonsiderar ang talagsaong plano sa Dios alang kanato.
Mga paghulagway pinaagi ni Alyssa Petersen
Ang plano sa Langitnong Amahan naghulagway sa “dagko uyamot nga mga saad” (tan-awa sa 2 Pedro 1:3–4) ug sa mga kamatuoran nga naghatag og kahulogan sa atong mahangtoron nga pagkatawo ug katuyoan.
Sigon sa gipasabot sa “Ang Pamilya: Usa ka Pamahayag ngadto sa Kalibotan”: “Ang tanan nga tawo—lalaki ug babaye—gilalang sumala sa hitsura sa Dios. Ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon niana, ang matag usa adunay balaanon nga kinaiya ug kalagmitan nga mahimong usa ka dios.”
Ang Langitnong Amahan nagsaad kanato nga kon atong sundon ang Iyang plano ug ang ehemplo sa Iyang Hinigugma nga Anak, magtuman sa mga sugo, ug molahutay uban sa pagtuo hangtod sa kataposan, kita “molahutay uban sa pagtuo hangtod sa kataposan, nan pinaagi sa Katubsanan sa Manluluwas, atong “mabatonan … ang kinabuhing dayon, ang gasa nga labing mahinungdanon sa tanang gasa sa Dios” (Doktrina ug mga Pakigsaad 14:7).
Ang buhat sa Dios nakatutok diha sa pag-uswag ug kahimayaan sa Iyang mga anak. Ang matag bahin sa Iyang plano gidesinyo alang sa pagpanalangin kanato tungod kay “ang bili sa mga kalag mahinungdanon sa panan-aw sa [Iyang panan-aw]” (Doktrina ug mga Pakigsaad 18:10).
Ang Plano sa Amahan
Sa premortal nga konseho, gipresentar sa Langitnong Amahan ngadto sa Iyang espiritu nga mga anak ang Iyang plano alang sa ilang mahangtoron nga pag-uswag ug kalipay. Miingon siya nga Iya kitang ipadala sa yuta aron kita pamatud-an, sa pagsuta kon magmasulundon ba kita Kaniya ug angayan “nga makabaton og himaya nga idugang sa [atong] mga ulo hangtod sa hangtod” (tan-awa sa Abraham 3:24–26).
Ug dayon Siya miingon: “Kinsa ang akong ipadala? Ug ang usa mitubag sama sa Anak sa Tawo: Ania Ako, ipadala ako. Ug adunay lain nga mitubag ug miingon: Ania Ako, ipadala ako. Ug ang Ginoo miingon: Akong ipadala ang nag-una.
“Ug ang ikaduha nasuko, … ug nianang adlawa, daghan ang misunod kaniya” (Abraham 3:27–28).
Usa lamang ka plano ang gipresentar—ang plano sa Amahan. Ang atong Langitnong Amahan wala mohatag sa pangutana nga, “Unsay atong buhaton?” Wala Siya magtinguha og laing hunahuna, mangayo og mga rekomendasyon, o mohangyo og mga sugyot. Ang labing importante sa Iyang pangutana nakatutok kon si kinsa ang ipadala nga maoy molihok sa mga termino ug sa mga kondisyon sa Iyang plano.
Si Lucifer wala magpresentar og plano nga wala botari sa kadaghanan nga mitambong sa premortal nga konseho. Mirebelde siya! Tinguha niya ang paglaglag sa kabubut-on sa tawo, gisalikway, ug “nahimong Satanas, … ang yawa, ang amahan sa tanang bakak, sa pag-ilad ug sa pagbuta sa mga tawo, ug sa pagdala nila nga maulipon sumala sa iyang kabubut-on” (tan-awa Moises 4:1, 3–4). Ang garbo, pagkamapahitas-on, ug pagkahakog ang midasig sa iyang rebelyon batok sa plano sa Amahan.
Ang plano sa Langitnong Amahan ug ang Ebanghelyo sa Manluluwas
Ang plano naghulagway sa mga buhat sa Amahan ug sa Anak nga naghimo nga ang mga panalangin sa kinabuhing dayon maanaa alang sa tanang binuhat.
Ang ebanghelyo ni Jesukristo mao ang paagi nga kita makadawat sa gisaad nga mga panalangin sa plano sa Dios, gani ang mga doktrina, mga baroganan, mga ordinansa, ug mga pakigdaad nga kinahanglan natong tuohan ug sundon. “Walay laing ngalan nga gihatag ubos sa langit gawas niini nga si Jesukristo … diin ang tawo maluwas” (2 Nephi 25:20). Sa tinuod, ang Ginoo nga si Jesukristo mao “ang dalan, ang kamatuoran, ug ang kinabuhi: walay bisan kinsa nga makaadto sa Amahan, gawas kon pinaagi [Kaniya]” (Juan 14:6; empasis gidugang).
Mga Ulohan sa Plano diha sa Basahon ni Mormon
Makakat-on kita og importanteng mga kamatuoran pinaagi sa pagtino ug pagtuon sa daghang managlahi nga ulohan [title] alang sa plano sa Amahan diha sa Basahon ni Mormon: Laing Tugon ni Jesukristo. Sama pananglit, ikonsiderar ang mosunod nga pinili nga sampol sa mga ulohan:
-
“[Ang] puno sa kaluoy nga plano sa bantogan nga Tiglalang” (2 Nephi 9:6).
-
“Ang plano sa atong Dios” (2 Nephi 9:13).
-
“[Ang] plano sa kaluwasan” (Jarom 1:2; Alma 24:14).
-
“[Ang] plano sa katubsanan” (Alma 12:25, 26, 30, 32, 33; 42:11, 13).
-
“Ang plano sa pagpahiuli” (Alma 41:2).
-
“[Ang] plano sa kalipay” (Alma 42:16).
-
“Ang mahinungdanong plano sa kaluoy” (Alma 42:31).
Ang matag usa niini nga mga titulo [title] magtabang kanato nga masabtan sa mas tin-aw nga paagi ang bililhong mga saad sa plano sa Amahan ug mopalambo sa atong panglantaw mahitungod sa mga katuyoan ug kahulogan sa atong mortal nga kinabuhi.
Sa dakong hinungdan, ang kasagaran kaayong gigamit nga ulohan alang sa plano sa Dios diha sa Basahon ni Mormon (“ang plano sa katubsanan”) nagtutok sa katubsanan gikan sa sala ug kamatayon nga gihimong posible pinaagi sa Pag-ula ni Jesukristo (tan-awa sa Alma 12:25; 33:22).
Ang Dalan Giandam
Ang atong mga kalag kinahanglan nga puno sa pagpasalamat samtang magkonsiderar kita sa talagsaong plano sa Dios alang kanato. Ang kahibalo bahin sa Iyang plano naghatag og bililhong panglantaw, mopabuhong sa atong mga kalipay, ug molig-on kanato sa pagbuntog sa atong mga hagit ug mga kalisdanan.
Ang Langitnong Amahan naghandom kanato nga makabalik sa pagpuyo uban Kaniya. Nagdapit Siya ug nagsaad og mga panalangin, apan dili gayod Siya mamugos, moduots, o mopugong sa atong paggamit sa moral nga kabubut-on nga Iyang gihatag kanato. Kinahanglan kitang molihok ug mopili nga mobalik ngadto Kaniya pinaagi sa pagsunod sa ehemplo sa Iyang Hinigugma nga Anak.
“Ang agianan giandam na, ug kon kita motan-aw mabuhi kita sa kahangtoran” (Alma 37:46).
Malipayon akong mosaksi nga ang Langitnong Amahan mao ang tigpasiugda sa balaanong plano alang sa Iyang mga anak. Si Jesukristo mao ang atong Manunubos ug Manluluwas. Ug isip usa sa Iyang ulahing-adlaw nga Apostoles, mosaksi ko nga Siya sa pagkatinuod mao “ang dalan, ang kamatuoran, ug ang kinabuhi” (Juan 14:6).