Pagkat-on Human sa Pagkamatay sa Akong Lola

Paghulagway pinaagi ni Katelyn Budge

Ang pagkamatay sa akong lola usa ka hagit alang nako. Suod kaayo kami. Naguol kaayo ko. Gibati nako nga ang paglaom nga akong gikinahanglan nahanaw.

Sa wala pa siya mamatay, dili kaayo ko lig-on sa ebanghelyo ni Jesukristo. Nagsalig ko sa mga pagpamatuod sa uban. Apan atol nianang unang semana sa kasub-anan, miadto ko sa klase sa relihiyon diin ang usa ka magtutudlo mitudlo mahitungod sa Pag-ula ni Jesukristo ug sa plano sa Langitnong Amahan bahin sa kaluwasan. Akong naamgohan nga makita nako pag-usab ang akong lola. Mahimo kaming maghiusa pag-usab sa sunod nga kinabuhi pinaagi sa mga ordinansa sa templo.

Nakapalig-on kini sa akong pagpamatuod. Misugod ko nga mas motutok sa akong Manluluwas nga si Jesukristo ug mas magkat-on mahitungod sa Iyang ebanghelyo. Karon nangita ko og tubag pinaagi sa mga kasulatan ug sa Dali, Sunod Kanako. Ganahan ko maminaw sa mga pakigpulong sa komperensiya, ilabi na gikan sa propeta, si Presidente Russell M. Nelson. Samtang maminaw ko sa mga pakigpulong, mosalig sa mga kasulatan, mag-ampo ug mamalandong, ug mohangyo alang sa Espiritu Santo, ang akong pagpamatuod mahimong molig-on.

Ang seminary nakatabang usab nako sa pagkat-on ug pagpaningkamot nga mahimong sama sa atong Manluluwas, si Jesukristo, samtang milihok ko inubanan sa pagtuo, mitan-aw sa mga butang gikan sa mahangtorong panglantaw, ug mitinguha og dugang nga kahibalo pinaagi sa gitudlo nga mga tinubdan.

Mosalig sa Langitnong Amahan ug ni Jesukristo. Ayaw pagsalig sa imong kaugalingong kahibalo apan nganha Kanila. Sila makatabang nato ug makagiya nato sa latas sa bisan unsa nga mga pagsulay o kalisdanan nga atong atubangon.