Imong Mapa sa Pagpauli
Nganong importante man kaayo nga masabtan ang plano sa kaluwasan?
Paghulagway pinaagi ni Mackenzie Alexander
Diha sa Basahon ni Mormon, si propeta Jarom misugod sa iyang talaan pinaagi sa pag-ingon, “Unsa pa may akong ikasulat og dugang sa gipangsulat sa akong mga amahan? Kay wala ba kini magpadayag sa plano sa kaluwasan?” (Jarom 1:2)
Kon siya naghunahuna nga kana lamang ang atong gikinahanglan, ang plano sa kaluwasan importante gayod kaayo!
Ug mao gayod kini! Kini ang perpekto nga mapa alang sa atong kinabuhi. Si Presidente Russell M. Nelson kausa miingon, “Ang pagsabot sa katalagsaon sa plano sa Dios mokuha sa walay kaseguroan sa wala pagkahibalo sa katuyoan sa atong kinabuhi ug sa ka walay kaseguroan gikan sa atong umaabot.”
Mao nga sa unsang paagi nga kini nga mapa makatabang nimo sa pagsugakod sa mga kawalay kasegurohan sa kinabuhi?
Diin Man Ako Gikan?
Ang Dios mao ang imong Langitnong Amahan. Ikaw nagpuyo uban Kaniya sa wala pa ka matawo. Nahigugma Siya kanimo!
Si Elder Alan T. Phillips sa Seventy mipasabot, “Dili kamo aksidente lang nga mibutho sa kalikopan, o walay mga ginikanan, o resulta lang nga basta naporma dinhi. Kon dunay disenyo, dunay tigdisenyo.”
Kon lisod ang kinabuhi, makahupay kini nga masayod nga ikaw ania dinhi alang sa usa ka katuyoan ug gibantayan sa usa ka mahigugmaong Langitnong Amahan.
Asa Ako Padulong?
Wala ka moanhi dinhi aron maglatagaw nga walay tumong—ikaw adunay padulngan! Ang Langitnong Amahan gusto nga mopauli ka ngadto Kaniya ug mahimong sama Kaniya. Nag-andam Siya ug plano sa kaluwasan aron ikaw makadawat sa tanan nga panalangin sa Iyang gingharian (tan-awa sa Doktrina ug mga Pakigsaad 14:7).
Ang pagkasayod sa plano sa Langitnong Amahan makatabang nimo sa pagsagubang sa kinabuhi. Kon ikaw mohimo sa “pagtan-aw sa taas nga panglantaw” ug sa paghunahuna og celestial, daghang mga pagpili mahimong mas sayon nga buhaton—lakip na ang pagpili sa pagsunod ni Jesukristo.
Unsaon Nako nga Makaabot Didto?
Gawas sa paghatag kanato og usa ka padulngan, ang plano sa kaluwasan nagpakita usab sa dalan aron makaabot didto.
Si Jesukristo mao ang hingpit nga ehemplo sa pagsunod sa dalan sa pagpauli. Kon ikaw motan-aw Kaniya—ug maglakaw uban Kaniya—Siya motabang nimo nga makabalik ngadto sa Langitnong Amahan ug mahimong mas mahisama Kaniya. Sama sa gipasabot ni Elder Sergio R. Vargas sa Seventy, “Gibati sa matag usa kanato ang tinguha nga mobalik ngadto sa atong langitnong panimalay, ug si Jesukristo mao ang atong sistema sa langitnong giya. Siya mao ang dalan.”
Unsa kaha Kon Mahisalaag Ko?
Bisan kon adunay usa ka mapa, tingali motipas ka. Makahimo gihapon ka og mga kasaypanan. Apan ayaw kabalaka! Ang Langitnong Amahan nagtagana og usa ka Manluluwas aron makahinulsol ka kanunay, makabalik ngadto Kaniya, ug mahimong mas mahisama Kaniya. Hinumdomi: “Dili kita makapabilin sa dalan sa pakigsaad pinaagi sa dili paghimo og sayop. Makapabilin kita sa dalan pinaagi sa paghinulsol sa matag adlaw.”
Samtang magtuon ka sa plano sa kaluwasan, hinumdomi nga gidesinyo kini inubanan sa gugma. Ang Langitnong Amahan gusto nga ikaw makapauli. Ug kon imong sundon ang Iyang mapa, Siya motabang nimo nga makaabot didto.