Usa ka Bag-ong Tuig

Enero na! Usa ka bag-ong tuig. Panahon sa bag-ong mga sinugdanan.

Tingali magtakda ka og tumong alang niining bag-ong tuig. Ang ubang mga tawo mopili og usa ka pulong nga morepresentar sa ilang intensyon alang sa tuig nga moabot. Karong tuiga, ang kabatan-onan sa tibuok kalibotan magtutok sa sama nga bersikulo sa kasulatan: Moises 6:34, “Lakaw uban kanako.” Kini usa ka pagdapit nga gihatag ngadto ni propeta Enoch.

Sa pagpanaw ni Enoch latas sa yuta, ang Espiritu sa Dios anaa kaniya. Dayon ang Ginoo nakigsulti kaniya. Siya mitudlo kaniya mahitungod sa Iyang plano sa kalipay, nga maghatag og katuyoan ug kahulogan sa kinabuhi. Sa dihang ang Ginoo nahuman sa paghulagway sa Iyang plano, Siya mihatag ni Enoch og usa ka imbitasyon: “Lakaw uban kanako.”

Sa imong panaw karong tuiga, tingali makita nimo ang imong kaugalingon nga nangita og kalipay, katuyoan, ug kahulogan. Mahimo ka nga makakat-on gikan sa istorya ni Enoch ug modapit sa Ginoo nga mahimong kabahin sa imong panaw karong tuiga.

Makapili ka sa paglakaw uban Kaniya. Kon buhaton nimo, ang mga panalangin nagpaabot.

Mahimo kining usa ka maayo nga tuig.