Unutea J.

Litrato pinaagi ni Stephane Sayeb

Usa kadto ka hapon, ug nakahinumdom ko niini nga murag kagahapon lang. Ang akong mama mihangyo nako sa paglingkod ug pagpaminaw tungod kay aduna siyay ipangutana nako. Bag-o lang siya nakadawat og email nga naghangyo nako nga mamulong sa komperensiya sa stake. Sa dihang misulti siya nako niini, gikulbaan ko: dili ko ganahan nga mag-istorya atubangan sa daghang tawo. Mitan-aw ko niya nga gisiga ang mga mata.

Gihatagan ko niya og panahon sa paghunahuna niini ug mangutana sa Ginoo. Gisultihan usab ko niya nga mao kadto ang talagsaong paagi sa pagdapit sa akong papa, nga dili miyembro, sa pagtambong sa among komperensiya sa stake sa unang higayon. Mao nga naghunahuna ko bahin niini, ug ang akong mama ug ako nag-ampo.

Misugot ko nga mamulong sa komperensiya. Pagkahuman niana, nagpuasa ug nag-ampo mi og kadaghan isip pamilya aron nga ang Espiritu modasig nako ug aron ang akong pakigpulong makabaton og epekto diha sa mga kinabuhi sa mga tawo, ilabi na sa akong papa.

Nakahibalo ko nga ang akong papa natandog nianang adlawa. Sa dihang mihatag ko sa akong pakigpulong, mitan-aw ko direkta sa iyang mata aron iyang makita nga ang akong mga pulong ug ang akong pagtuo diha sa Dios, unsa man ka dako o gamay, tinuod.

Ako nasayod nga ang Manluluwas nahigugma nako tungod kay Siya kanunayng anaa alang nako, ilabi na atol niining pagsulay. Ug gani kon ako adunay mga pagduda, nakahibalo ko nga Siya kanunay nga anaa alang nako. Bisan unsa pa ang akong sitwasyon, ang akoa lang buhaton mao ang pagdangop ngadto Kaniya inubanan sa sinsero nga kasingkasing.