3 ka Paagi sa Pagsalikway ni Satanas ug Pilion si Jesukristo
Ang pagsabot kon unsay nahitabo sa kinabuhi sa wala pa dinhi sa yuta makatabang nimo sa paghimo og maayo nga mga pagpili karon.
Paghulagway pinaagi ni Dean MacAdam
Sa dihang ang Langitnong Amahan mipresentar sa Iyang plano alang sa atong mahangtorong kalipay ug pag-uswag, Siya misaad nga mopadala og usa ka Manluluwas aron motabang nato. Sa dihang ang Langitnong Amahan nangutana, “Kinsa ang Akong ipadala?” (Abraham 3:27), si Jesukristo, “Hinigugma ug Pinili [sa Amahan] sukad pa sa sinugdanan” (Moises 4:2), miingon, “Ania ako, ipadala ako” (Abraham 3:27). Siya walay gipangayo nga bisan unsa nga butang, gusto lamang Siya nga mobuhat sa kabubut-on sa atong Amahan (tan-awa sa Moises 4:2).
Dayon miabot si Lucifer. Siya usab miingon, “ipadala ako” (tan-awa sa Moises 4:1). Apan si Lucifer naghinakog, dili andam nga mosakripisyo alang nato. Gusto niya nga ang pasidungog, gahom, ug himaya sa Dios maiyaha (tan-awa Moises 4:1). Si Lucifer nagtinguha sa pagguba sa atong kabubut-on. Kon sa unsang paagi nga siya naghunahuna sa pagbuhat niini dili klaro. Apan kita nahibalo nga kon walay kabubut-on, kita dili gayod mouswag ug mahimong sama sa atong Langitnong Amahan. Mao nga, tungod niana, si Lucifer misukol batok sa Langitnong Amahan ug misalikway sa Iyang plano.
Ang pagsukol ni Lucifer maoy hinungdan sa gubat sa langit, diin siya “gisalikway;” ug siya “nahimong Satanas” (Moises 4:3–4). Ang ikatulo nga bahin sa mga panon sa langit misunod kaniya (tan-awa sa Doktrina ug mga Pakigsaad 29:36). Apan kita migamit sa atong kabubut-on ug misunod ni Jesukristo.
Ang gubat nga nagsugod didto sa langit nagpadayon karon. Si Satanas ug ang iyang mga sumusunod padayon nga nagtinguha sa pagbatok kanato. Ania ang tulo ka paagi sa pag-ila sa mga taktika ug mga estratehiya ni Satanas, sa paglikay sa iyang mga laang, ug sa pagpili ni Jesukristo sa tibuok natong kinabuhi.
1. Ayaw Tugoti nga ang Kapait Modaog
Katuigan ang milabay, kausa misulay ko sa pag-agni sa akong mga higala sa eskwelahan nga dili mohimo sa ilang homework kay wala nako mabuhat ang akoa. Sayop ko, apan naghunahuna ko nga kon kaming tanan magkaproblema, mas nindot ang akong bation sa akong kaugalingon. Ang bati nako nga kinaiya nakapahinumdom nako sa kinaiya ni Satanas ngari nato. Tungod kay siya naalaot, gusto niya nga babagan ang atong potensiyal alang sa kinabuhing dayon.
Si Satanas hilabihan nga gituis sa iyang kapait nga siya—bisan nahibalo nga sa kataposan siya mapakyas—desperado nga misulay sa “[pag]sabwag sa buluhaton sa kangitngit” (Helaman 6:28), aron maghatag og kadaot sa daghan kanato kutob sa iyang mahimo.
Ang kaalaotan ni Satanas dili mao ang plano nga atong gipili. Mahimo natong gamiton ang atong kabubut-on sa pagpadayon sa pagsunod ni Jesukisto ug sa pagpadayon sa pagsalikway sa kapait, kamenos, ug mga pagpanglingla ni Satanas nga makahatag og limitasyon sa kaugalingon. Ang Manluluwas mihatag sa Iyang kinabuhi aron kita mamahimo sa unsay Iyang nahibaloan nga kita mamahimo ug makatagamtam sa katam-is sa kinabuhing dayon.
2. Dili Magpadala ngadto sa Kahadlok
Usahay maghunahuna ko kon ngano nga ang ikatulo nga bahin sa espiritu nga mga anak sa Dios mipili sa pagsalikway sa Iyang plano. Si Satanas nahibalo nga ang kahadlok ug ang pagduhaduha mao ang epektibo nga mga paagi sa pagwagtang sa pagtuo. Siya mahimong motental nato sa pagduhaduha sa atong bili o mokombinsir nato nga dili gayod kita malimpyohan pinaagi sa Pag-ula ni Jesukristo. O tingali mosulay siya sa pagkuha nato sa pagpadala ngadto sa kahadlok mahitungod sa paghinulsol o sa pagsunod sa plano sa Dios.
Kon kita mag-atubang og mga pagsulay ug kalisdanan, kita mahimong mopili sa pagsalig diha sa plano sa Dios ug diha ni Jesukristo. Iyang gilahutay ang tanang butang aron Siya mahimo nga atong kalig-on sa higayon nga kita mag-atubang og kahadlok, ug pinaagi Kaniya, kita makabuntog niini sa kaulahian.
3. Hangopa ang Tanan Nga Gitanyag sa Manluluwas Kanimo
Ang katuyoan sa Langitnong Amahan ug ni Jesukristo mao ang pagpahamili ug paghatag og gahom nato. Kinsa man ang laing tawo nga mosulti nga sila gusto nga motabang nato nga mamahimo sa atong labing maayo ug mohatag nato sa tanan nga anaa nila nga walay pagpanagana? Ang tanan nga anaa sa Amahan maatoa! Kini gitanyag ngari nato pinaagi lamang ni Jesukristo.
Kon maghunahuna ko sa pagkawalay paghinakog ug sa matubsanong gahom sa Manluluwas, gusto ko nga mosunod Kaniya. Si Jesukristo mao ang hingpit nga manlalaban sa hingpit nga plano. Kon kita mopili Kaniya, Siya motabang nato sa pagbuntog sa kaaway, sa pagsunod sa plano sa Langitnong Amahan, ug sa pagkab-ot sa atong balaanong padulngan.