Ko Hoʻo Tokoni ʻi he Poto Fakaelotó

ʻOku ʻuhinga ʻa e kaungā-ongoʻí ki he malava ʻo maʻu ha mahino ki he ngaahi ongo ʻa ha taha kehe, ʻo tatau ai pē pe kuó ke ʻosi aʻusia e meʻa tatau mo iá pe ʻikai. Kuo fekauʻi kitautolu ʻe he Tamai Hēvaní ke tau “feʻofaʻaki” (Sione 15:12), pea te tau lava ʻo fakahoko ia ʻaki ʻetau feinga ke fakakaukauloto ʻoku tau foua ha tūkunga ʻoku ʻi ai ha taha kehe.

ʻOku fetuʻutaki e fakafōtunga hotau sinó mo e matá ʻo tatau pē mo ʻetau leá! ʻI he taimi ʻoku tau talanoa ai ki ha taha, ʻoku mahuʻinga ke fakahaaʻi ʻoku tau fanongo mo tokanga ki he meʻa ʻokú ne lea ʻakí.

ʻI he kuonga ʻo e Tohi Tapú, naʻe ʻikai ngofua ke ala ki he kau kiliá koeʻuhí naʻe lau kinautolu ʻoku nau taʻemaʻa. Ka ʻi hono fakamoʻui ʻe Sīsū ha tangata kiliá, naʻá Ne ala kiate ia pea fakamoʻui leva ia. Neongo ko ha mana fakaofo hono fakamoʻui ʻo e tangata kiliá, kae mahalo naʻá ne ongoʻi ne ʻofaʻi ange ia ʻi heʻene ʻiloʻi naʻe ʻikai ilifia ʻa Sīsū ke ala kiate iá (vakai, Maʻake 1:40–42).

ʻOku ʻikai ke tau lava ʻo fakaʻehiʻehi mei he fakafepakí, ka kuo fakamahinoʻi ʻe he Fakamoʻuí ʻoku totonu ke tau fakaʻehiʻehi mei he fakakikihí (vakai, 3 Nīfai 11:29–30). ʻE lava ke faingataʻa ʻa e faʻa kātaki lolotonga ha fepōtalanoaʻaki faingataʻá, tautautefito kapau ʻoku kamata ke anga fakakauleka pe ʻita ʻa e tokotaha ʻe tahá.

Ko e fakafanongó ko ha tefitoʻi moʻoni mahuʻinga ia ʻi he ongoongoleleí. ʻOku tau feinga ke fakafanongo ki he Fakamoʻuí, ki he Laumālié, ki he kau palōfitá mo e kau ʻaposetoló.

ʻOku toe mahuʻinga foki ʻa e fakafanongó ʻi heʻetau ngaahi ngāue fakaʻahó! Naʻe akoʻi ʻe ʻEletā Sefilī R. Hōlani: “ʻOku mahuʻinga ange hoʻo fakafanongó ʻi hoʻo leá. … Kapau te tau fakafanongo ʻi he ʻofá, ʻe ʻikai fiemaʻu ke tau fifili pe ko e hā te tau lea ʻakí. ʻE fakahā mai ia kiate kitautolu—ʻe he Laumālié pea mo hotau ngaahi kaungāmeʻá” (Apr. 2001 general conference [Ensign, May 2001, 15]).