Naʻá ku Faʻa Ilifia ʻi he Tamaiki Fefiné

ʻI he ngaahi taʻu siʻi kuo maliu atú, naʻe ʻikai ke u talanoa ki ha taha makehe mei hoku fāmilí, ko hoku ngaahi kaungāmeʻa ofi ʻe nima pe onó, mo ha ngaahi maheni tokosiʻi pē. Naʻe ʻikai haʻaku ngaahi kaungāfefine, pea naʻá ku hangē pē ko hoku ngaahi kaungāmeʻá. Naʻe ʻikai ke u faʻa talanoa ki he tamaiki fefiné he naʻá ku ilifia ʻiate kinautolu. Naʻe ʻikai ke u fie talanoa ki ha taha naʻe kehe meiate au. Naʻe ʻikai ke u ʻilo ʻa e founga ke fepōtalanoaʻaki aí kapau ʻoku ʻikai tatau ʻa e ngaahi meʻa ʻokú ma saiʻia aí.

ʻI he faʻahitaʻu māfana ko iá, naʻá ku ʻalu ai ki heʻeku fuofua konifelenisi KFT. Naʻá ku feinga ke ʻoua naʻá ku talanoa ki he tamaiki fefine ʻi heʻeku kulupú ʻi he ongo fuofua ʻaho ʻe uá, he naʻe ʻikai ke u ʻilo ʻa e founga ke fai ai iá. Ka naʻe faifai pē pea kamata ke nau talanoa mai kiate au mo fakakaungāmeʻa mai, peá u fakatokangaʻi naʻa nau angalelei.

ʻI he kamataʻanga ʻo ʻeku taʻu fakaako hokó naʻe “tenge fakatamaiki” au ke u ʻalu ki heʻeku fuofua hulohula fakaakó. Naʻá ku kole ki ha kiʻi taʻahine naʻá ku kamata fakatalanoa ki ai kimuʻa ʻi ha kalasi ʻe taha. Mahalo naʻe ʻikai ke ne fuʻu ʻilo lelei au, ka naʻá ne talamai ʻe fie ʻalu mo au. Naʻe fakamālohiʻi au ʻe he meʻá ni ke u talanoa kiate ia. Naʻá ku fiefia moʻoni ʻi he teiti fakakulupú peá u kaungāmeʻa lelei mo e taʻahine naʻá ku ʻalu mo iá.

Hili iá, naʻá ku fakatokangaʻi ko e tamaiki fefiné ko ha kakai angamaheni pē foki mo kinautolu. Ko e tokotaha kotoa pē ʻoku kehe meiate aú ko ha tokotaha pē ia ʻe taha, ʻo hangē pē ko aú. Ko e fānau kotoa kitautolu ʻa e ʻOtuá, ko ia ko e hā te u fakaʻehiʻehi ai mei ha taha koeʻuhí ko honau fōtungá, ʻulungāngá, pe meʻa ʻoku nau manako aí?

ʻI he taimi ní, ko e niʻihi ʻo hoku ngaahi kaungāmeʻa ofi tahá ko ha tamaiki fefine, pea ko e lahi taha ʻo hoku ngaahi kaungātangatá, ʻoku nau matuʻaki kehe ʻaupito mei ha taha naʻá ku mei fakakaukau ke feohi mo ia ʻi he taʻu ʻe ua kuo hilí.

Manatuʻi, ʻoku kehekehe ʻa e tokotaha kotoa pē meiate koe, pea ko ha meʻa lelei ia. ʻOua te ke tokanga taha pē ki he ngaahi faikehekehe ko iá, ka ke feinga ke ke kaungāmeʻa mo e kakai ʻoku mou feohí.