Fēfē Kapau ʻOku ou Fefaʻuhi mo e Hīkisiá pe ʻItá?

ʻOku ou ʻita vave. Kuó u fanongo ki ha ngaahi pōpoaki lahi ʻo e konifelenisí ʻoku talanoa kau ki he ʻitá peá u ako ko e taimi ʻoku tau ʻita aí, ʻoku tau faʻa hīkisia. Pea ʻoku fakamavaheʻi kitautolu ʻe he hīkisiá mei he ʻOtuá. Ko ia ko e ʻitá ko ha pole ia ʻoku ou feinga ke ikunaʻi.

Naʻe talamai ʻe ha faiako semineli ke ikunaʻi e ʻitá, te u lava ʻo ʻahiʻahi fetongi ia ʻaki ha ʻulungaanga faka-Kalaisi. Naʻá ku fakakaukau ke ʻahiʻahi fetongi ʻeku ʻitá ʻaki ʻa e malava ke fakamolemolé.

Lolotonga ʻeku kalasi seminelí, naʻe tolongi mai ʻe ha taha ʻi heʻeku kalasí ha folofola ki hoku vaʻé. Naʻá ku ʻita ʻi he momeniti ko iá, peá u kaikailaʻi ia. Ka naʻá ku manatuʻi ʻa e fakamolemole faka-Kalaisí. ʻI he ʻosi ʻa e kalasí, naʻá ku ʻalu ki ai ʻo kole fakamolemole ange ʻi heʻeku kaikailaʻi iá. Naʻá ku fakamolemoleʻi ia, peá ne kole fakamolemole mai foki mo ia.

ʻI heʻeku akoako tafoki kia Kalaisi ʻo fakafou ʻi he fakamolemolé, kuó u mamata ai ki heʻeku liliú. ʻOku ou feinga ke vakai ki he ngaahi meʻá ʻaki ha fakakaukau ʻoku taʻengatá kae ʻikai ko e ʻitá. ʻI heʻeku tokanga taha kia Kalaisi mo ʻalu ki he seminelí, ʻokú ne fakamālohia ʻeku fakamoʻoni kiate Iá, pea ʻoku ou lava ai ʻo tokoniʻi e niʻihi kehé ke fakamālohia foki mo ʻenau fakamoʻoní.