Tōtuʻa ʻa e Keimi Vitioó

ʻI ha ʻaho ʻe taha lolotonga e kalasí, naʻe tā mai ha kaungāako. Naʻá ma fakatokangaʻi kuó ma vaʻinga ʻi he keimi kotoa ʻe 100 naʻá ku maʻú, pea naʻá ma fiemaʻu ha meʻa foʻou. Ka naʻe siʻisiʻi e tauhiʻanga faile ʻi he komipiuta ngāue ʻa ʻeku tamaí. ʻI he taimi naʻá ku feinga ai ke fakahū ki ai ha vaʻinga foʻoú, naʻe mate ʻa e komipiutá.

Naʻá ku manavasiʻi. Naʻá ku ilifia ʻe ʻilo ʻe heʻeku ongomātuʻá. Naʻá ku vete fakakongokonga ʻa e komipiutá ka naʻe ʻikai ke u sio ki ha palopalema, ko ia ne u toe fakamaʻu kotoa ia pea feinga ke fakamoʻui. Naʻá ku ʻiloʻi naʻe fiemaʻu ke u fakaʻataʻatā ʻa e komipiutá, ko ia naʻá ku fakamoleki ha lau houa hono tamateʻi e keimi takitaha—ka naʻe ʻikai ha liliu ia.

Kimui ange ʻi he ʻaho ko iá, naʻe fiemaʻu ʻe heʻeku tamaí ke fakahoko ha ngāue ʻi heʻene komipiutá. Naʻá ku tailiili ʻaupito. Hili ha kiʻi taimi siʻi, naʻá ne ui mai au. Naʻe ʻi muʻa ʻiate ia ʻa e komipiutá. Kuo maumau.

Naʻe ʻikai ke u toe lava ʻo loi ki heʻeku tamaí. Naʻá ku tala totonu ʻa e meʻa naʻá ku faí.

ʻI he ʻaho hono hokó, naʻe ʻalu ʻeku tamaí ki he ngāué mo e komipiuta maumaú. Naʻe ʻikai ke ne tukuakiʻi au, ka naʻá ne fatongia ʻaki ʻeku meʻa naʻe faí. Naʻe ʻikai ko hano foʻui, ka naʻá ne fili ke mole hono tuʻunga falalaʻanga ki heʻene pulé pea tali kotoa e tukuakiʻí taʻe te u kole ange ke ne fakahoko ia. Pea naʻe mamahi ai hoku lotó.

Naʻá ku fuʻu mā ʻaupito ʻi he meʻa naʻá ku faí ʻo kamata ai ke u faingataʻaʻia fakaeʻatamai. Naʻe ʻikai ke u loto ke u ʻā. Naʻe ʻikai ke u maʻu ha loto-toʻa ke talanoa ki heʻeku ongomātuʻá.

Ka ʻi he Tokonaki ko iá, naʻe ʻā ʻeku tamaí ʻi he 4:30 a.m., ʻo fakaafeʻi au ke ma ō ʻo lele. ʻI heʻema lelé, naʻá ne talamai naʻá ne kole mai ke ma oó ke u lava ʻo ako ha meʻa naʻe ʻikai ke ne teitei loto ke ngalo ʻiate au: ivi matuʻuakí. Naʻá ne talamai ko e ivi matuʻuakí ko e malava ia ke matuʻuaki pe fakaakeake vave mei he ngaahi faingataʻá, ke fakaleleiʻi ʻa e palopalemá, pea hili hono fakaleleiʻi iá, ke tuʻu hake ʻo laka ki muʻa.

Koeʻuhí ko e tā sīpinga ʻeku tamaí ʻi he ngāué mo e meʻa naʻá ne akoʻi mai kiate au fekauʻaki mo e ivi matuʻuakí, naʻá ku maʻu ai ha mahino kia Sīsū Kalaisi mo e meʻa naʻá Ne fakahoko maʻakú. Naʻe ʻomi ʻe Kalaisi ʻa e faingamālie ke fakamolemoleʻi ai ʻeku ngaahi angahalá. Naʻá ku ako ko e fakamolemolé ko ha meʻaʻofa ia pea ʻoku ʻamanaki mai e Fakamoʻuí ke u maʻu e ivi matuʻuaki ʻi he hala ʻo e māʻoniʻoní.

Hili e lele ko iá, naʻe kamata ke liliu ʻeku fakakaukaú mo e tōʻongá. Naʻá ku fakatokangaʻi ʻoku mahulu hake ʻa e moʻuí ʻi he vaʻinga keimi pē ʻi he ʻahó kotoa.

Naʻe faingataʻa ʻa e taʻu ʻe tolu hono hokó ʻi heʻeku ngāue ki heʻeku ngaahi tōʻonga moʻui foʻoú, ka ʻi he tokoni ʻa ʻeku ongomātuʻá, naʻe kamata māmālie ke u tokanga taha ki hoku kahaʻú. Naʻá ku toe ʻiloʻi foki ʻoku ʻi ai hoku talēniti ki he fetuʻutakí pea ʻoku ou fiefia ʻi he tokoni ki he niʻihi kehé.

Naʻe ʻikai ke fakamoleki kotoa hoku taimí ʻi he keimi vitioó, ka naʻe kamata ke u ako fekauʻaki mo e hoko ko ha tokotaha pisinisí. Naʻá ku kamata ha sēnolo ʻi he Instagram mo ha peesi YouTube, pea ʻoku ou akoʻi he taimí ni ki he kakaí ʻa e meʻa kuó u ako fekauʻaki mo e hoko ʻo lavameʻa fakapaʻangá mo hono fakahoko ʻetau ʻinivesi lelei tahá—[ko e ʻinivesi] ʻiate kitautolu pē.

ʻI he ngaahi aʻusia kotoa ko ʻení, naʻe tuʻo lahi ʻeku vakai ki he toʻukupu ʻo e ʻEikí, tautautefito ki hono maʻu ha fakamolemole ʻi he feilaulau hoku Fakamoʻuí. ʻE ʻi ai ha ngaahi taimi te u tōnounou ai, ka ʻi he ivi matuʻuakí mo e Fakalelei ʻa Sīsū Kalaisí, te u lava ʻo hoko ʻo hangē ange ko Iá.