ʻOku totonu nai ke u fai pē ʻa e meʻa ʻoku fakanatula kiate aú? Ko e meʻa nai ia ʻoku finangalo ʻa e ʻOtuá ke u faí?

ʻOku tokoni ha ngaahi moʻoni tefito ʻe niʻihi ke tali ʻaki e fehuʻi ko ʻení.

Ko e ʻOtuá ko e Tamai Ia ho laumālié. Naʻe ʻikai ke Ne “ngaohi” koe mei ha meʻa noa. Naʻe fakatupu koe ʻaki ha natula fakalangi—ko e tuʻunga malava ke hoko ʻo hangē ko Iá. Naʻá ke “ʻi he kamataʻangá foki … mo e ʻOtuá. Ko e ʻatamai potó, pe ko e maama ʻo e moʻoní, naʻe ʻikai ke fakatupu pe ngaohi ia, pea ʻoku ʻikai foki ke lava ia” (Tokāteline mo e Ngaahi Fuakava 93:29). Kimuʻa ʻi he moʻui ko ʻení, naʻá ke maʻu foki ʻa e tauʻatāiná, pea naʻá ke fakahoko ha ngaahi fili.

Ko ho sino fakatuʻasinó ko ha meʻaʻofa ia mei he ʻOtuá pea ʻoku mahuʻinga ia ke aʻusia e moʻui fakamatelié pea hoko ʻo hangē ange ko Iá. Koeʻuhí ko e Hingá, ʻoku aʻusia ʻe he tokotaha kotoa pē ʻa e vaivaí, kau ai ha ngaahi fakahehema “fakakakano” ʻe niʻihi ʻoku fepaki mo e ngaahi fekau ʻa e ʻOtuá (vakai, Mōsaia 3:19). Ka ʻoku totonu ke tau feinga ke “taʻofi kotoa [ʻetau] ngaahi holi fakakakanó” (ʻAlamā 38:12), fakavaivaiʻi kitautolu, feinga ke talangofua ki he ʻOtuá, fakatomala ʻi he taimi ʻoku ʻikai ke tau talangofua aí, pea kumi ki ha mālohi mo ha tokoni ʻo fakafou ʻia Sīsū Kalaisi mo ʻEne Fakaleleí. ʻOku tau aʻusia ʻa e vaivaí ʻi he moʻuí ni kae lava ke tau loto-fakatōkilalo pea tafoki ki he ʻOtuá (vakai, ʻEta 12:27).

Lolotonga e moʻui ko ʻení, ko e meʻa mahuʻingá ko hoʻo fakaʻaongaʻi ʻa e tauʻatāiná. Fili ʻa e ʻOtuá mo ʻEne ngaahi foungá. Fili ke ke fakalakalaka. Fili ʻa e fiefiá.