“ʻOku SAI PĒ ia”

Tā fakatātā ʻa Katelyn Budge

ʻI ha Falaite ʻe taha ʻi he akó, naʻe ʻikai ke ʻi ai hoku kaungāmeʻa mamae ko Toasoní. Naʻe pehē ʻe ha kau leka ʻe niʻihi naʻa nau sio ki ha ʻū meʻalele ʻa e falemahakí ʻi honau ʻapí, pea ne kamata ke u hohaʻa. Kimui ange ʻi he ʻaho ko iá, naʻe talamai ʻe heʻemau puleakó naʻe ʻave ʻa Toasoni ki falemahaki ne fānoa ʻa e totó ʻi hono ʻutó.

Naʻá ku kaungāmeʻa mo Toasoni ʻi he fuofua hiki mai hoku fāmilí mei Kalolaina Saute, USA. Naʻá ne kau ʻi he fuofua kakai ke fakalea mai kiate aú. Te ne kumi ha kiʻi tamasiʻi foʻou pē ʻo ʻai ke ne ongoʻi ʻoku ʻofaʻi ia.

ʻI he pō hili hono ʻave ʻo Toasoni ki falemahakí, ʻi he lotua homau fāmilí ke ne saí, naʻá ku fanongo ki ha kihiʻi leʻo siʻi ʻoku pehē mai: “ʻOku SAI PĒ ia.” ʻI heʻeku fanongo pē ki aí, naʻá ku ʻiloʻi ʻe SAI PĒ ʻa Toasoni pea te ne moʻui.

Ka naʻe kamata ke u fakakaukau, “Fēfē kapau naʻe ʻuhinga ʻa e ʻOtuá ʻe SAI PĒ pe naʻe ʻi heni ʻa Toasoni pe ʻi langi?”

Naʻe fakahoko ʻe hoku siteikí ha ʻaukai houa ʻe 24 maʻa Toasoni mo hono fāmilí. Naʻa mau maʻu leva ʻa e ongoongo kuo mālōlō ʻa Toasoní.

Naʻe teʻeki ke u aʻusia ha meʻa faingataʻa kimuʻa ʻa ia ne u ongoʻi ai naʻe fiemaʻu ke u lotu. Ka ʻi he mālōlō ʻa Toasoní, ko e lotú pē ʻa e founga naʻá ku lava ai ʻo ongoʻi ha fakafiemālié. Naʻe tokoniʻi au ʻe he ʻOtuá ke u ongoʻi nonga, peá u ongoʻi pau pē naʻe ʻi ai Haʻane meʻa ke fakahoko ʻe Toasoni.

ʻOku ou ʻiloʻi ko e faʻahinga taimi pē ʻoku ou foua ai ha meʻa faingataʻa, te u lava ʻo talanoa ki he ʻOtuá. ʻOku tokoni ia ke u ʻiloʻi ʻe ʻi ai maʻu pē ʻa e ʻOtuá kiate au mo e kakai ʻoku mau feohí. ʻOku ou ʻofa kia Toasoni he ʻaho kotoa pē, ka ʻoku ou ʻilo te u toe feʻiloaki mo ia koeʻuhí ko Sīsū Kalaisi.