Ngaahi Moʻoni ʻe 5 mo e Fanga Kiʻi Tokoni ʻe 5 ki he Lotu ʻOku ʻUhingamālie Angé
Naʻá ku ʻiloʻi naʻe moʻoni ʻa e ʻOtuá, ka naʻá ku fifili he taimi ʻe niʻihi pe naʻá Ne fanongo mai kiate au.
Ngaahi tā fakatātā ʻa Jarom Vogel
ʻI heʻeku tupu haké, naʻe akoʻi au ʻe lava ke u talanoa ki he ʻOtuá ʻo fakafou ʻi he lotú, ka naʻe ʻi ai ha ngaahi taimi naʻe ʻikai ke u ongoʻi ai naʻe fuʻu lelei ʻeku lotú. Ne u faingataʻaʻia ke talanoa kiate Ia mo fakafanongo kiate Ia. ʻI heʻeku fuʻu lahi angé, naʻá ku ʻiloʻi ai ha ngaahi moʻoni ʻe nima mo ha fanga kiʻi tokoni ʻe nima kuó ne ʻai ke ʻuhingamālie ange ʻeku lotú pea tokoni ke u ongoʻi ofi ange ai ki he ʻOtuá.
Ngaahi Moʻoní
-
Ko e ʻOtuá ko hoʻo Tamai Hēvaní ia ʻokú Ne maʻu ha sino ʻo e kakano mo e hui (vakai, Tokāteline mo e Ngaahi Fuakava 130:22). Ko ha tokotaha moʻoni Ia ʻokú ke talanoa ki ai.
-
ʻOku tali ʻe he ʻOtuá ʻa ʻetau lotu takitaha ʻi he taimi mo e founga ʻoku lelei taha kiate kitautolú. “ʻOku fanongo ʻa e ʻOtuá ki he lotu kotoa pē ʻoku tau faí, pea ʻokú Ne tali takitaha kinautolu ʻo fakatatau mo e founga kuó Ne fokotuʻutuʻu maʻa hotau fakahaohaoaʻí.”
-
ʻOku lahi ʻa e ngaahi faʻahinga ʻo e lotú, pea ʻoku lelei ʻa e meʻa kotoa pē. ʻE lava ʻa e lotú ke molumalu, angamaheni, fonu ʻi he fakafetaʻi pe tautapa, nounou pe lōloa—leʻo lahi pe fakalongolongo—mo ha meʻa lahi ange.
-
Te tau lava ʻo lotu ʻi ha faʻahinga taimi pē mo ha faʻahinga feituʻu pē.
-
Ko e lotú ʻoku ʻikai fekauʻaki ia mo hono maʻu e meʻa ʻoku tau fiemaʻú mei he ʻOtuá ka ko hono ʻiloʻi (mo tali) ʻa e meʻa ʻokú Ne finangalo kiate kitautolú.
Ngaahi Tokoní
-
Tauhi ha tohinoa lotu. Hiki ha ngaahi fehuʻi ʻokú ke maʻu kimuʻa peá ke lotú, pea lekooti ha ngaahi ongo ʻokú ke maʻu ʻi he hili (pea naʻa mo e lolotonga) hoʻo lotú.
-
ʻOku tokoni ʻa e tūʻulutuí ʻi he “liliu [hoʻo] lotu angamahení ke fakaʻau ʻo mālohí.”
-
Tauhi ha lisi ʻo e kakai te ke lava ʻo lotua ʻi he ʻaho takitaha.
-
Kole ki he niʻihi kehé ke nau lotu maʻau pea fakataha mo koe.