Ko Hono Ngāue ʻAki ʻo e Fakahinohinó
ʻOku ʻOfa ʻa e ʻOtuá ʻIate Koe. ʻE Founga Fēfē Hoʻo ʻOfa kiate Iá?
Tā fakatātaaʻi ʻe Jennifer Tolman
ʻOku ʻofa ʻa e ʻOtuá ʻiate Koe
ʻOku haohaoa mo taʻengata ʻa e ʻofa ʻa e ʻOtuá ʻiate koé. “Fakakaukau ki he ʻofa haohaoa mo kānokato taha te ke lava ʻo mafakakaukauʻí. Liunga e ʻofa ko iá ʻaki ha fika kilukilua—ko e lahi ia ʻo e ʻofa ʻa e ʻOtuá kiate koé.”
ʻOku fakakaukau ha kakai ʻe niʻihi koeʻuhí ʻoku ʻofa ʻa e ʻOtuá ʻiate kinautolu, te nau lava ʻo fai ha meʻa pē ʻoku nau loto ki aí ʻo ʻikai hano nunuʻa. Ka ʻoku ʻikai ʻuhingamālie ʻeni ia. ʻOku foaki mai ʻe he ʻOtuá ʻa e ngaahi fekaú ʻi he ʻofa, koeʻuhí ko hoʻo leleí. Koeʻuhí ʻoku ʻofa ʻa e ʻOtuá ʻiate koe, ʻoku totonu ke ke tauhi ʻEne ngaahi fekaú. Pea ʻoku totonu foki ke ke tauhi ʻEne ngaahi fekaú koeʻuhí ʻokú ke ʻofa ʻiate Ia!
ʻE Founga Fēfē Hoʻo ʻOfa kiate Iá
“ʻE ʻikai nai ke ke ʻofa ʻiate Ia naʻe tomuʻa ʻofa ʻiate koé? Tauhi leva ʻEne ngaahi fekaú. ʻE ʻikai ʻapē te ke hoko ko ha kaumeʻa kiate Ia naʻe tuku hifo ʻEne moʻuí maʻa Hono ngaahi kaumeʻá? Tauhi leva ʻEne ngaahi fekaú. ʻE ʻikai ʻapē te ke maʻu ʻEne ʻofá pea maʻu kotoa ʻa e meʻa kuó Ne foaki atu kiate koé? Tauhi leva ʻEne ngaahi fekaú.”
ʻOku fakamatalaʻi fakanounou ia ʻi he tohi fakahinohino Ki Hono Fakamālohia ʻo e Toʻu Tupú: “ʻOku ʻomi ʻe he ʻOtuá ha ngaahi fekau, ke tokoniʻi koe ke ke fakahoko ha ngaahi fili ʻoku leleí. ʻOkú Ne fakahoko ʻeni koeʻuhí ʻokú Ne ʻofa ʻiate koe. Pea ko e ʻuhinga lelei taha ke talangofua ai ki he ngaahi fekau ʻa e ʻOtuá ko hoʻo ʻofa kiate Iá. Ko e ʻofá ʻa e uho ʻo e ngaahi fekau ʻa e ʻOtuá.”