ʻI hono Fakamaauʻi Hala Au ʻe he Kakai ʻi he Lotú

Tā fakatātā ʻa Katelyn Budge

Naʻe ʻi ai ha tūkunga ʻe taha naʻe fakamaauʻi hala ai au mo hoku kaungāmeʻá ʻe ha kau mēmipa ʻe niʻihi ʻi homau uōtí. Naʻá ma faʻa ʻalu holo fakataha, ʻo tokoni mo kau ki he ngaahi ʻekitivitií, pea ne kamata ha ngaahi talanoa sasala ʻokú ma teiti mo fakahoko ha meʻa ʻoku hala.

Naʻe pehē foki ʻe he ngaahi talanoa sasalá naʻe angakovi hoku fāmilí ki hoku kaungāmeʻá. Neongo naʻá ma ʻiloʻi naʻe ʻikai moʻoni ia, ka naʻá ku loto-mamahi koeʻuhí naʻe ngaohi leleiʻi maʻu pē ia ʻi hoku ʻapí. Naʻe ʻikai ke u fie ʻalu ki he lotú ʻo sio pe talanoa mo e kakai naʻa nau fakamafola holo ʻa e talanoa loí.

Ka neongo ia, naʻá ku manatuʻi ʻoku tau ʻalu ki he lotú koeʻuhí ko e ongoongolelei ʻo Sīsū Kalaisí, kae ʻikai koeʻuhí ko e kakai ʻi aí. ʻOku faʻa fakaangaʻi ʻe he kakaí ʻa e niʻihi kehé ʻo ʻikai ke nau ʻiloʻi e meʻa moʻoni ʻoku hokó, pea ne u ʻiloʻi ʻe ʻosi atu ʻa e momeniti ko ʻení pea te u lava ʻo fakamolemoleʻi kinautolu. Naʻá ku vahevahe ʻa e ngaahi fakakaukau ko ʻení mo hoku kaungāmeʻá. ʻI heʻema tafoki kia Sīsū Kalaisí, naʻá ma maʻu ha nonga.

Ko e fakamoʻuí ʻa Sīsū Kalaisi. Ko Ia ʻa e ʻofá mo e moʻoní. Ko Ia ʻa e meʻa lelei kotoa pē. Ko Ia ʻa e hala ki he fakamoʻuí, ʻa e hala te u lava ʻo maʻu ai ʻa e fiefia taʻengatá.