Te u lava fēfē ʻo ʻiloʻi kuó u fakatomala moʻoni pea kuo fakamolemoleʻi au?

Coming Full Circle [Foki Mai ki he Tūkunga Kimuʻá], tā fakatātaaʻi ʻe Jenedy Paige

Kuo folofola ʻa e ʻEikí, “Vakai, ko ia ia kuó ne fakatomala mei heʻene ngaahi angahalá, ʻoku fakamolemoleʻi ia pea ko au ko e ʻEikí ʻoku ʻikai te u toe manatu ki ai.

“Te mou ʻilo ʻi he meʻá ni ʻo kapau ʻoku fakatomala ha tangata mei heʻene ngaahi angahalá—vakai, te ne vete ia pea liʻaki ia” (Tokāteline mo e Ngaahi Fuakava 58:42–43).

Te tau lava ʻo maʻu ʻa e fakamolemolé ʻo fakafou ʻi he fakatomala fakamātoató. “ʻI he taimi ʻokú ke ongoʻi fiemālie ai mei he Laumālié, te ke lava ʻo ʻiloʻi ʻoku ngāue ʻa e mālohi fakalelei ʻo e Fakamoʻuí ʻi hoʻo moʻuí.” Pea kapau te tau toe foʻi, te tau lava ʻo toe fakatomala, fakamolemoleʻi, pea kei feinga pē.

ʻIkai ngata aí, kuo akoʻi ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻE feinga ʻa Sētane ke ngaohi kitautolu ke tau tui ʻoku ʻikai fakamolemoleʻi ʻetau ngaahi angahalá koeʻuhí he ʻoku tau lava ʻo manatuʻi kinautolu. Ko ha tokotaha loi ʻa Sētane. … Naʻe ʻikai talaʻofa mai ʻa e ʻOtuá ʻe ngalo ʻiate kitautolu ʻetau ngaahi angahalá. ʻE tokoni ʻetau manatuʻí ke tau fakaʻehiʻehi mei haʻatau toe fai ha ngaahi fehalaaki tatau. Ka ʻo kapau te tau tuʻu maʻu mo faivelenga, ʻe mōlia atu pē ʻetau manatu ki heʻetau ngaahi angahalá ʻi he fakalau atu ʻa e taimí.”