“ʻOku ou kiʻi taʻepauʻia ʻi ha ngaahi meʻa naʻe hoko ʻi he Hisitōlia ʻo e Siasí. Ko e hā ʻoku totonu ke u fai ki heʻeku ngaahi fehuʻí?

“Aleaʻi hoʻo ngaahi hohaʻá mo ha taha ʻokú ke falala ki ai, hangē ko ha mātuʻa pe pīsope. Kapau ʻoku teʻeki ai mahino kiate koe, pea tokanga taha pē ki he ngaahi meʻa mahuʻinga tahá mo e hoko ko ha ākonga lelei ʻa Sīsū Kalaisí.”

ʻAnitelū K., 15, ʻInitiana, USA

“ʻOku mahuʻinga ke manatuʻi ʻe lava ke liliu ʻa e ngaahi tuʻutuʻuní, ka ʻoku tuʻu maʻu pē ʻa e moʻoní.”

Selitani V., 17, ʻIutā, USA

“ʻOku poupouʻi koe ke ke fekumi ki ha ngaahi tali ki hoʻo ngaahi fehuʻí ʻo fakafou ʻi he lotu, ako, mo e fekumi ki ha fakahinohino mei he kau taki ʻo e Siasí. ʻIkai ngata aí, te ke lava ʻo vakaiʻi ʻa e ngaahi maʻuʻanga tokoni ʻoku ʻomi ʻe he Siasí, hangē ko e ngaahi fakamatala fakahisitōliá, ngaahi leá, mo e ngaahi tohí, ke maʻu ha mahino ʻoku lelei angé. ʻOku mahuʻinga ke ke tali hoʻo ngaahi fehuʻí ʻi he tui mo e loto-fakatōkilalo, ʻo falala te ke maʻu ʻa e ngaahi tali ʻokú ke fekumi ki aí ʻi he fekumi fakamātoato mo e fakahinohino mei he ʻOtuá.”

Sute E., 17, ʻApa, Naisīlia

“Ko e lotú ʻa e founga lelei taha ke ʻilo ai ʻa e totonú mei he halá. ʻOku akoʻi ʻi he 1 Nīfai 10:19 ko kinautolu ʻoku fekumi faivelengá te nau maʻu ʻa e ngaahi meʻa lilo ʻa e ʻOtuá. ʻOku pehē ʻi he Sēmisi 1:5, ʻKa ai hamou taha ʻoku masiva ʻi he potó, ke kole ʻe ia ki he ʻOtuá.ʼ Fakalaulauloto ki he ngaahi veesi ko ʻení, pea hangē ko Siosefa Sāmitá, te ke maʻu ha ngaahi tali ki hoʻo ngaahi lotu fakamātoató.”

Keni N., 13, Palasavile, Lepapulika ʻo Kongokoú

“Naʻe kamata ke u ʻilo lahi ange ki he hisitōlia ʻo e Siasí ʻaki ʻeku lau ʻa e Kau Māʻoniʻoní mo e Puipuituʻa ʻo e Ngaahi Fakahaá. ʻI he kamata ke u lau iá, naʻe lahi ʻeku ngaahi veiveiuá. Naʻe kamata foki ke u lotu lahi ki he ʻOtuá, koeʻuhí he naʻe akoʻi maʻu pē au ʻe heʻeku ongomātuʻá ke u tomuʻa fakafehuʻia ʻeku veiveiuá kimuʻa peá u toki fakafehuʻia ʻeku tuí. Naʻe ʻikai faingofua, ka naʻe tangata pē ʻa e kāingalotu ʻo e Siasí ʻi he kuonga muʻá, pea naʻa nau feilaulau mo tui ki he ʻOtua moʻuí. Ko e ʻuhinga ia ʻoku tau maʻu ai ʻa e Siasí ʻi he ʻaho ní.”

ʻIlisa L., 17, Sanita Katalina, Palāsila