Ko ha Fakafeʻiloaki Taʻeʻamanekina

Naʻá ku tomuʻa fakakaukau naʻe tolongi ʻaki au ʻe he fineʻeikí e tohí ke tuku ā ʻeku sio telefoní, ka naʻá ku fakatokangaʻi he ʻikai ke ne fai pehē. Pea naʻe ʻikai ha havilivili pe faʻahinga meʻa ke ne fakamatalaʻi e ʻuhinga naʻe tō ai e folofolá.

ʻI heʻeku fie ʻiló, naʻá ku tuku hifo ʻeku telefoní pea toʻo hake e folofolá ʻo fakaava noa pē. Ko e ngaahi lea naʻá ku laú ne hangē ha ui fakahangatonu pē ki hoku lotó:

“Ko ʻeni vakai, ʻoku ofi ke hoko mai ha ngāue fakaofo ʻi he lotolotonga ʻo e fānau ʻa e tangatá.

“Ko ia, ko kimoutolu ʻoku kamata ke fai ʻa e ngāue ʻa e ʻOtuá, mou tokanga ke mou tauhi kiate ia ʻaki homou lotó, iví, ʻatamaí mo e mālohí kotoa, koeʻuhí ke mou tuʻu taʻehalaia ʻi he ʻao ʻo e ʻOtuá ʻi he ʻaho fakaʻosí.

“Ko ia, kapau ʻoku mou maʻu ʻa e ngaahi holi ke ngāue maʻá e ʻOtuá ʻoku ui ʻa kimoutolu ki he ngāué” (Tokāteline mo e Ngaahi Fuakava 4:1–3).

Naʻe teʻeki ai ke u lau tuʻo taha e ngaahi vēsí ni kimuʻa. Naʻe ongo mālohi moʻoni kiate au ʻa e ngaahi leá.

Naʻá ku lele ke talaange ki heʻeku fineʻeikí e meʻa kuo hokó pea fakahā ange kiate ia e potufolofola kuó u laú. Naʻá ne sio mai kiate au mo e loʻimataʻia hono fofongá ʻo ne pehē naʻá ne tui ko ha fakamanatu ʻeni mei he Tamai Hēvaní kuo uiuiʻi au ʻe ha palōfita ke teuteuʻi au ke ngāue fakafaifekau.

Talu mei he momeniti ko iá mo e kamata ke u vakai ki heʻeku moʻuí mo ʻeku taumuʻá ʻi ha fakakaukau foʻou. Neongo naʻá ku kei manako pē ʻi he keimi vitioó, ka naʻá ku fakatokangaʻi naʻe ʻi ai ha meʻa tefito naʻe liliu ʻi loto ʻiate au. Naʻe tuku pē ʻeku telefoni toʻotoʻó ʻi he funga seá ʻi heʻeku fakalaulauloto ki he ngaahi folofola ʻa Sīsū Kalaisi kuo ongo ki hoku lotó.

ʻI he taimi ní, ʻoku ou ngāue ko ha faifekau ʻo vahevahe ʻa e ongoongo lelei ʻo e ongoongoleleí. ʻOku ou fiefia naʻe kamata ʻeku fononga fakalaumālié ʻi he taimi naʻe tō mai ai e folofolá ki heʻeku moʻuí ʻi ha pō longonoa ʻe taha, ʻo iku ai ki ha uiuiʻi fakalangi naʻe ʻikai lava ke u tukunoaʻi.