Haʻu, ʻo Muimui ʻIate Au
Tokāteline mo e Ngaahi Fuakava 58, 60–62
Ngaahi Koloa Mahuʻinga Fufuú
Ako lahi ange ʻi he ngaahi folofolá.
Tā fakatātā ʻa Camdyn Miller
ʻE maʻongoʻonga fēfē ʻa e taʻengatá? ʻOku ʻikai ke ke lava ʻo fakakaukau ki ai.
Naʻe ʻiloʻi ʻe he fuofua Kāingalotú te nau fehangahangai mo e ngaahi faingataʻá. Ka naʻe talaʻofa ʻe he Fakamoʻuí ki he kau talangofuá mo e faivelengá ʻe mahulu hake ʻi he ngaahi faingataʻa ko ʻení ʻa e ngaahi palé.
“ʻOku ʻikai te mou lava ʻo mamata ʻaki homou mata fakanatulá, ʻi he taimí ni, ki he finangalo ʻo homou ʻOtuá ʻo kau ki he ngaahi meʻa ko ia ʻe hoko mai ʻamuí, pea mo e nāunau ʻe hoko mai hili ʻa e faingataʻa lahí” (Tokāteline mo e Ngaahi Fuakava 58:3).
Ko ha talaʻofa fakaʻofoʻofa ia!
Naʻe lea ʻaki ʻe he ʻAposetolo ko Paulá ha meʻa tatau: “ʻOku teʻeki ai mamata ʻe ha mata, pe fanongo ʻe ha telinga, pea ʻoku teʻeki ai hū ki he loto ʻo ha tangata, ʻa e ngaahi meʻa ʻa ia ʻoku teuteu ʻe he ʻOtuá maʻanautolu ʻoku ʻofa kiate iá” (1 Kolinitō 2:9).
ʻI hono fakalea ʻe tahá: ʻE lahi fau e ngaahi tāpuaki ʻoku fakatatali mai kiate kitautolu ʻi ʻitāniti ʻi heʻetau tauhi faivelenga ki he ʻOtuá, he ʻikai ke tau lava moʻoni ʻo fakakaukau atu ki ai! Ko ia, ʻoua te ke hohaʻa ki he ngaahi fakaikiikí. Ko e hā pē honau tūkungá, te tau fiefia.
Ko e taimi ʻe niʻihi ʻoku tuku mai ʻe he ʻEikí ke tau fai ha fili.
ʻOku faʻa ʻomi ʻe he ʻOtuá ha founga ke tau talangofua ai kiate Ia. Ko ha ngaahi sīpinga ʻeni:
-
ʻI he Tokāteline mo e Ngaahi Fuakava 60:5, ʻoku fekauʻi ʻe he ʻEikí ha niʻihi ʻo e fuofua Kāingalotú ke nau ʻalu “fakatoʻotoʻo” ki Seni Lui—ka ʻokú ne folofola “ʻoku tatau ai pē” pe te nau foʻu ha vaka pe fakatau mai ha vaka.
-
ʻI he 61:22, hili hono fakahā ki he kau takí ke ʻoua te nau fononga ʻi he vaí he taimí ni, ʻoku folofola ʻa e ʻEikí “hili ha taimi siʻi” te nau lava ʻo fili pe te nau ʻalu ʻi he vaitafé pe ʻi ʻuta, “ʻo fakatatau ki heʻenau ngaahi fakakaukau lelei tahá ʻamui.”
-
ʻOku folofola ʻa e ʻEikí ʻi he 61:35, ʻe lava ʻa e kau tangatá ʻo “fononga fakataha [ʻi he kulupu pē ʻe taha], pe tautau toko ua, ʻo fakatatau mo e meʻa ʻe hā ngali lelei kiate kinautolú”—ka ʻokú Ne toe tānaki mai ʻokú Ne finangalo ke hoko ʻa Leinolisi Kahuni mo Samuela H. Sāmita ko ha ongo hoa ngāue.
ʻOku ʻikai totonu ke fekauʻi kitautolu ʻi he kihiʻi meʻa kotoa pē (vakai, Tokāteline mo e Ngaahi Fuakava 58:26–27). ʻI he taimi ʻoku ʻikai fai mai ai ha fakahinohino paú, ʻoku tau fakaʻaongaʻi ʻa ʻetau ongo angamahení mo e ueʻi fakalaumālié, ʻo muimui ki he tefitoʻi moʻoni ʻi he Tokāteline mo e Ngaahi Fuakava 62:8: “ʻOku ʻiate kimoutolu ʻa e ngaahi meʻá ni ke fai ʻo fakatatau ki he fakakaukau leleí mo e ngaahi tuʻutuʻuni ʻa e Laumālié.”