Naʻa mo e ʻOtuá ʻOkú Ne Tutulu
ʻOku tau aʻusia kotoa pē ha ngaahi ongo ʻoku ʻikai lelei, ka te tau kei lava pē ʻo maʻu ʻa e fiefiá.
Fetuʻutaki Fakalangi, tā fakatātā ʻa Yongsung Kim
ʻOku fiefia ʻa e Tamai Hēvaní. ʻOku tau ʻiloʻi ʻeni.
Kuó Ne talaʻofa mai te Ne foaki mai ʻa e meʻa kotoa pē ʻokú Ne maʻú ʻo kapau te tau faivelenga (vakai, Tokāteline mo e Ngaahi Fuakava 84:38; 88:107; 132:20). Kuó Ne talaʻofa mai foki kiate kitautolu ʻa e “kakato ʻo e fiefiá” (3 Nīfai 28:10) mo e “fiefia ʻoku ʻikai hano ngataʻangá” (Mōsaia 2:41; ʻAlamā 28:12). Ko e ngaahi meʻa ia ʻoku maʻu mo fiefia ai ʻa e ʻOtuá Tonu.
Kae ʻoleva angé. ʻOku lahi ha ngaahi potufolofola ʻoku nau fakamatala ki he fiefia ʻa e ʻOtuá—ka ʻoku ʻi ai foki mo ha ngaahi taimi lahi ʻoku mamahi, houhau, pe loto-mamahi ai ʻa e ʻEikí.
Ko hono moʻoní, ʻe lava ke aʻusia ʻe he ʻOtuá ʻa e ngaahi ongo peheé ʻo ʻikai tuku ke nau ikunaʻi pe mahulu hake ʻi he ongoʻi fakalūkufua ʻo e “fiefia ʻoku ʻikai hano ngataʻangá” mo e “kakato ʻo e fiefiá.”
Naʻe ʻohovale ʻa e palōfita ko ʻĪnoké ʻi heʻene ako ʻení. Naʻá ne sio ki he tutulu ʻa e ʻEikí peá ne pehē: “Ko e hā ʻa e meʻa ʻokú ke lava ai ke tangí, ka ʻokú ke māʻoniʻoni pea ʻokú ke ʻi ai, mei he taʻengatá kotoa ki he taʻengatá kotoa?” (Mōsese 7:29). Naʻe iku ʻo hoko ʻeni ko e tali ʻa e ʻEikí: Sio ki he founga ʻe faingataʻaʻia ai ʻeku fānaú koeʻuhí ko ʻenau taʻe-māʻoniʻoní! ʻOku ʻikai koā ko e tali totonú ke tangi? (vakai Mōsese 7:37).
ʻOku ʻikai ke ne tali ʻa e fehuʻi ki he founga ʻe lava ke hoko fakataha ai ʻa e mamahí mo e fiefia taʻengatá. Ka ʻe lava ke ʻomi ʻe heʻetau ngaahi aʻusia ʻi he moʻui fakamatelié ni ha fakakaukau.
Fehangahangai ʻi he Meʻa Kotoa Pē
Tau lea moʻoni angé: ʻOku ʻi he māmaní ha ngaahi meʻa fakalilifu. ʻOku tau feinga ke tokanga taha ki he leleí—pea ʻoku lahi—ka ʻoku ʻikai ngata pē ʻi he taú mo e fakatamakí, ka ʻoku ʻi ai foki mo ha ngaahi faingataʻa ʻi heʻetau moʻui fakatāutahá. ʻOku ʻikai hao ha taha mei he loto-mamahí mo e mamahí.
Ka ko hono fakalūkufuá, ko e tokolahi taha ʻo kitautolú ʻoku tau lava pē ʻo kātekina ia. Te tau lava ʻo fiefia—pe nonga—neongo ha faʻahinga faingataʻa pē ʻoku tau fehangahangai mo ia.
ʻOku ongoʻi halaia ha kakai ʻe niʻihi ʻi heʻenau ongoʻi fiefia ʻi he taimi ʻoku ʻi ai ai ha mamahi ʻi he māmaní. Ka ʻi he taimi ʻoku tau ongoʻi fiefia aí, ʻoku ʻikai ʻuhinga ia ʻoku ʻikai ke tau toe tokanga ki he mamahí mo e fakamaau taʻe-totonú. Ka ʻoku ʻuhinga ia ʻoku tau lava ʻo fakakaukau ki ha meʻa lahi ange he meʻa ʻe tahá ʻi he taimi ʻe taha. Kuo pau ke tau pehē. Ka naʻe ʻikai ia he ʻikai ke tau lava ʻo ngāue!
Naʻe fekauʻi mai kitautolu ʻe he ʻOtuá ke tau moʻui ʻi ha māmani naʻá Ne ʻafioʻi ʻe kau ai ʻa e mamahí … ka ʻi he taimi tatau, ʻokú Ne finangalo ke tau ongoʻi fiefia (vakai, 2 Nīfai 2:25). Kuo pau ke ʻi ai ha founga ke fakahoko fakatouʻosi ai kinaua.
Ko e foungá ʻa e Fakamoʻuí.
Fili e Meʻa Ke Ke Tokanga Taha Ki Aí
Naʻe lea fakangalongataʻa ʻaki ia ʻe Palesiteni Lāsolo M. Nalesoni: “ʻOku siʻi ha kaunga e fiefia ʻoku tau maʻú, ki he tūkunga ʻetau moʻuí mo e meʻa ʻoku tukutaha ai ʻetau tokangá.” Naʻá ne hoko atu ʻo pehē: “I hono tukutaha ʻetau tokangá he palani ʻa e ʻOtuá ki he fakamoʻuí pea mo Sīsū Kalaisi mo ʻEne ongoongoleleí, … te tau lava ʻo ongoʻi fiefia ʻo tatau ai pē [pe] ko e hā e meʻa ʻoku hokó—pe ʻikai ke hoko—ʻi heʻetau moʻuí. ʻOku haʻu e fiefiá meiate [pea koeʻuhí ko] Ia.”
ʻOku toe fakaongo mai ʻe he kau taki fakalaumālie kehé ʻa e ngaahi ongo ʻa Palesiteni Nalesoní. “ʻOku totonu ke manatuʻi ʻe kinautolu ʻoku tofanga ʻi ha faʻahinga faingataʻa fakamatelié, naʻe foua ʻe hotau Fakamoʻuí ʻa e faʻahinga mamahi ko iá, pea ʻi Heʻene Fakaleleí ʻokú Ne foaki mai ai kiate kitautolu takitaha ʻa e ivi ke tau fuesia ai ia.” “Tuʻunga ʻi he Fakalelei ʻa Sīsū Kalaisí, ʻe lava ke … tokoniʻi kitautolu ʻi hotau ngaahi vaivaí.” “ʻI hoʻomou haʻu kiate Iá, ʻe fakapaleʻi kimoutolu ʻaki ha ivi ke fehangahangai mo e ngaahi faingataʻa ʻo e moʻuí.”
Naʻe maʻu ʻe he ʻAposetolo ko Paulá ha tōʻonga fakakaukau maʻongoʻonga. Naʻá ne pehē, “Kuo akonekina au, ke u fiemālie ʻi he meʻa kotoa pē te u ʻi aí” (Filipai 4:11)—pea naʻá ne ʻi he fale fakapōpulá ʻi heʻene lea ʻaki iá!
Ko e taha ʻo e ngaahi meʻa lahi kuo fakahaohaoaʻi ʻe he ʻOtuá ʻoku tau kei ngāue ki aí ko e malava ko ia ke aʻusia ʻa e kotoa mo e loloto ʻo e ngaahi ongó lolotonga ʻetau kei maʻu ha “kakato ʻo e fiefiá.” Ka te tau aʻu pē ki ai! Pea ʻi he taimi tatau, te Ne lava ʻo tokoniʻi kitautolu ke tau tokanga taha ki he leleí kae kei ʻiloʻi pē ʻa e koví.