Ko Hono Fakamuʻomuʻa ʻo Kalaisi ʻi he Hetifouní

Tā fakatātā ʻa Katelyn Budge

Naʻá ku faʻa tui ʻeku hetifouní ʻi he ʻahó kakato, ʻo fanongo mūsika ʻi he YouTube. Naʻá ku tui ia lolotonga ʻeku maʻu meʻatokoni efiafí he taimi ʻe niʻihi, ʻo vili kikihi ki heʻeku ongomātuʻá ne u kei lava pē ʻo fanongo kiate kinaua. Naʻá ku fakatokangaʻi ha kakai ʻoku nau tui ia lolotonga e ngaahi ʻekitivitī ʻa e toʻu tupú peá u fakakaukau mahalo ʻoku totonu ke u tui foki mo au ia. Ka naʻe ʻikai fuoloa kuó u fakatokangaʻi naʻá ku fakamoleki ha taimi lahi ʻi heʻeku hetifouní mo e telefoní kae ʻikai ha taimi feʻunga ki he ngaahi meʻa mahuʻingá.

Naʻe ʻikai ke u loto ke fakamuʻomuʻa ʻeku hetifouní ʻia Sīsū Kalaisi. Naʻá ku ʻilo naʻe fiemaʻu ke u fakahoko ha liliu. Naʻe ʻikai ke u fanongo ki ha ngaahi hiva kehekehe ʻi he pongipongí, ka naʻá ku fanongo ki he hiva ʻa e toʻu tupú ko e “I Am a Disciple of Christ” lolotonga hono lau ʻeku folofolá. ʻI he fakamoʻoni ʻa e tokotaha hivá fekauʻaki mo Kalaisí, naʻá ku ongoʻi ʻoku tupulaki ʻeku fakamoʻoní. Naʻá ku fakatokangaʻi naʻá ku ongoʻi fiefia ange, pea naʻe fakaʻau ke mālohi ange hoku vā fetuʻutaki mo Kalaisí. Naʻe faʻa nofoʻia au ʻe hono fakaleá ʻi he ʻahó kakato, ʻo fakamanatu mai ke u ngāue mo hoko ko ha ākonga ʻa Kalaisi.

Neongo naʻe ʻikai ke u toe fakaʻaongaʻi ʻa e hetifouní ʻi hoku ʻahó kotoa, ka naʻe kamata ke siʻisiʻi ange ʻeku tui iá. ʻI hono liliu ʻeku tōʻonga moʻui naʻe ʻikai moʻui leleí, naʻá ku lava ai ʻo fakamuʻomuʻa ʻa Sīsū Kalaisi.

ʻOku ou ʻiloʻi ʻe lava ʻe hono liliu ha meʻa siʻisiʻi hangē ko ha tōʻonga tui hetifouni ʻoku ʻikai moʻui leleí ʻo tohoakiʻi koe ke ke ofi ange kia Kalaisi.