Sio Mai kiate Au!

Naʻá ku pehē ʻi ha taimi ʻe taha ki ha loki ako ʻo e fānau akó, “Sio mai kiate au!” Naʻá ku fakatokangaʻi ʻi heʻeku lea ʻaki ʻení, naʻa nau sio kotoa mai ki hoku matá. Naʻe ʻikai ke nau sio ki hoku suú, sutí, pe hēkesi. Naʻe ʻikai ke nau sio ki hoku ʻulú pe ongo nimá. Naʻa nau sio ki hoku matá. ʻOku hangē hoku matá ha ongo matapā sioʻata ki he feituʻu ʻoku nofo ai ʻa e tokotaha totonu “ko aú.”

ʻI he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí, ʻoku akoʻi ai kitautolu ʻoku toputapu hotau sinó pea ke “tauhi [hotau] sinó—mo e sino ʻo e niʻihi kehé—ʻaki ʻa e fakaʻapaʻapá.” ʻOku tau lau ai ʻo pehē: “ʻI hoʻo fakahoko ha ngaahi fili fekauʻaki mo ho valá, ākenga ʻo e ʻulú, mo e fōtungá, fehuʻi pē kiate koe, ‘ʻOku ou fakaʻapaʻapaʻi nai hoku sinó ko ha meʻaʻofa toputapu mei he ʻOtuá?’ ʻOku finangalo ʻa e Tamai Hēvaní ke tau vakai ki he tuʻunga moʻoni ʻoku tau ʻi aí: ʻo ʻikai ko e sino fakamatelié pē ka ko ʻEne fānau ʻofeina ʻoku ʻi ai honau ikuʻanga fakalangi. Fakaʻehiʻehi mei he ngaahi ākenga ʻoku nau fakamamafaʻi pe tohoakiʻi e tokanga ʻoku taʻe-feʻungá ki ho sino fakamatelié kae ʻikai ko ho tuʻunga ko e fānau ʻa e ʻOtuá.”

ʻI he taimi naʻá ku hoko ai ko ha palesiteni fakamisioná, naʻá ku toutou fakamanatu ki he kau faifekaú ʻa e tefitoʻi moʻoni ko ʻení, he naʻe teunga taʻetaau ha kakai tokolahi. Naʻá ku talaange ki he kau faifekaú, “Sio ki he matá. Vakai ki he tokotahá. ʻOua te ke sio pē ki ha sino. Vakai ki ha fānau ʻa e ʻOtuá.”

ʻI hoʻo sio ki he niʻihi kehé, feinga ke vakai kiate kinautolu. ʻOua naʻá ke fakamāuʻi kinautolu ʻaki honau valá (pe ko e ʻikai ʻi aí) pe ākenga ʻo e ʻulú. Sio ki honau matá. Vakai fakalaka atu ʻi he fōtunga ki tuʻá ki honau tuʻunga totonú—ko e fānau ʻa e ʻOtuá.

ʻI hoʻo muimui ki he founga fakaʻuhinga ko ʻení, te ke lava ʻo fili ke teuteu mo fakamatalaʻi koe ʻi ha founga he ʻikai tohoakiʻi ai e tokangá mei ho tuʻunga totonú ko e fānau ʻa e ʻOtuá. Te ke lava ʻo fili ke fakafaingofuaʻi ia ki he niʻihi kehé ke ʻoua naʻa tohoakiʻi ʻenau tokangá mo vakai kiate koe ʻi ho tuʻunga totonú. Teunga taau mo feʻunga. Teuteu ke vakai ʻa e kakaí kiate koe kae ʻikai ko ho fōtunga pē ki tuʻá.

ʻI he foungá ni, ʻokú ke fakahaaʻi ai ʻokú ke ʻilo, ʻo hangē ko ia ko ʻetau lau ʻi he tohi fakahinohino Ki Hono Fakamālohia ʻo e Toʻu Tupú, “ko ho sinó ko ha meʻaʻofa fakaofo ia mei hoʻo Tamai Hēvaní. Naʻá Ne foaki atu ia ke tokoniʻi koe ke ke hoko ʻo hangē ange ko Iá.”