Fekumi ki he Fiefiá
Fekumi ki ha momeniti fakafiefia ʻe taha pe lahi ange ʻi he ʻaho takitaha, pea te ke sio ai ki he ngaahi tāpuaki ʻa e ʻOtuá.
ʻOku faingataʻa ʻi he taimi ʻe niʻihi ke fiefia. Kapau kuo ʻi ai ha taimi kuó ke ongoʻi loto-mamahi ai ʻi he ʻikai ke ke ongoʻi fiefia ʻi he taimi kotoa pē, ʻiloʻi ʻoku sai pē ia mo angamaheni ke aʻusia ha ngaahi meʻa ʻoku lelei mo faingataʻa. Ko hono moʻoní, ko e moʻuí pē ia!
ʻOku tau ako ʻi he 2 Nīfai 2:25, “Naʻe hinga ʻa ʻĀtamá koeʻuhi ke ʻi ai ʻa e faʻahinga ʻo e tangatá; pea ʻoku ʻi ai ʻa e faʻahinga ʻo e tangatá koeʻuhi ke nau maʻu ʻa e fiefiá.” Ko ha ongoongo fakafiefia moʻoni ia! Ko ha konga lahi ʻo ʻetau ʻi heni ʻi he māmaní ko e maʻu ʻa e fiefiá. Ka te tau lava fēfē ʻo fai ia ʻi he ngaahi ʻaho faingataʻá?
Ko ha Momeniti Fakafiefia Fakaʻaho
Mahalo ʻe ʻi ai ha ngaahi ʻaho te ke ongoʻi fiefia mo fakafiefia ange ai ʻi he ngaahi ʻaho kehé, ka te ke lava ʻo maʻu ha ngaahi momeniti ʻo e fiefiá ʻi ha faʻahinga ʻaho pē. Naʻe fakalea peheni ia ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá:
“ʻOku tātātaha ke tau maʻu ha meʻa ʻoku ʻikai ke tau fekumi ki ai.
“ʻOkú ke fekumi nai ki he fiefiá?
Ko ha meʻa ʻokú ne tokoniʻi au ke u fekumi ki he fiefiá—tautautefito ʻi he ngaahi ʻaho pe uike faingataʻa ko iá—ko hono fakatokangaʻi ha momeniti fakafiefia ʻe taha ʻi he ʻaho takitaha.
ʻOku ʻikai fiemaʻu ia ke lahi, liliu moʻui, pe fakaofo ʻa e ngaahi momeniti ko ʻení. ʻE lava ke nau hoko ko ha ngaahi meʻa hangē ko hano maʻu ha text lelei mei ha kaungāmeʻa, fakatokangaʻi e ngaahi lanu fakaʻofoʻofa ʻo ha tō ʻa e laʻaá, lau ha potufolofola naʻe ongo naʻe fakataumuʻa pē ia kiate au, pe fiefia ʻi he kiʻi fakaneifua ʻoku ou saiʻia taha aí!
ʻI heʻeku fekumi moʻoni mo fakahaaʻi ha “momeniti fakafiefia” ʻe taha ʻi he ʻaho takitaha, ʻokú ne tokoniʻi au ke u ongoʻi fiefia ange mo fakatokangaʻi ʻa e ngaahi tāpuaki lahi ʻoku foaki mai ʻe he ʻOtuá kiate aú, ʻo tatau ai pē pe ʻoku lahi pe siʻisiʻi.
Fakakaukau ke ke feinga ke maʻu ha momeniti fakafiefia ʻe taha ʻi he ʻaho takitaha. Kamata ha lisi ke muimuiʻi kinautolu. ʻI he tupulaki hoʻo lisí, ʻe pehē pē foki mo hoʻo fiefiá!