Fakaʻilekitulōnika Pē: Ngaahi Tali mei ha ʻAposetolo
Te U Ikunaʻi Fēfē Nai ʻa e Manavasiʻí mo e Taʻepaú?
Tuku ke hanga ʻe he ʻilo ko hai moʻoni koé mo hai ʻoku ʻi ho tafaʻakí ʻo toʻo atu kotoa hoʻo ngaahi manavasiʻí.
Mei ha lea ʻi ha fakaʻosi ako ʻa e ʻUnivēsiti Pilikihami ʻIongi—ʻAitahoó naʻe fai ʻi he ʻaho 8 ʻo ʻEpeleli, 2021.
Naʻe toe pē ha māhina ʻe taha peá u taʻu 19, ʻi heʻeku tūʻuta ki ʻapi fonu ʻi he tuʻamelié. Naʻe ʻi ai ha sila naʻe tuʻu ai hoku hingoá mei he ʻuluʻi ʻōfisi ʻo e Siasí naʻe tatali mai ke fakaava.
Naʻe fonu hoku lotó ʻi he fiefia mo e hohaʻa ʻi heʻeku lau e, “ʻOku vahe koe ki he Misiona Japan Fukuoka.” Naʻá ku foki ki he ngāué pea vahevahe ʻa e ongoongo leleí. Te u ʻalu ki Siapani.
“Misiona fē?”
Naʻá ku mei lava ʻo puʻaki e Tokyo. Naʻá ku mei lava ʻo puʻaki e Osaka, ka naʻe ʻikai ke u manatuʻi e hingoa ʻo e misioná, pea ʻi heʻeku manatuʻí, ne ʻikai ke u ʻiloʻi pe ʻe puʻaki fēfeeʻi ia.
Naʻe fakamamahi ʻeni kiate au ʻi he ngaahi uike siʻi ka hokó ʻi heʻeku vahevahe e ongoongo leleí ni mo e ngaahi kaungāmeʻá mo e fāmilí. Naʻe feinga ha kaungāmeʻa ʻo hoku fāmilí ne toki foki mai mei heʻene ngāue fakafaifekau ʻi Siapaní ke tokoniʻi au ke u ako maʻuloto ha fakamoʻoni faka-Siapani nounou, ka naʻe ʻikai pē ke u lava ia ʻe au.
Naʻe kamata eni ke ʻalu fakataha ʻeku vekeveke ki he ngāue fakafaifekaú mo ʻeku hohaʻa ki hono ako ʻo e lea faingataʻa faka-Siapaní. ʻI he fakakaukau atu ki aí, ko ha faingataʻa eni naʻe fuʻu lahi. Naʻe fakaʻau ke liliu ʻeku loto-hohaʻá ko ha matuʻaki ilifia moʻoni naʻá ku feʻao maʻu pē mo ia.
Ne hangē ne u ʻalu ai pē mo e manavasiʻi ko ʻení ki he ʻapiako ʻUnivēsiti Pilikihami ʻIongi—Hauaiʻí, ko e feituʻu ia ne tuʻu ai e Senitā Akoʻanga Fakafaifekau (MTC) ki he ngaahi lea faka-ʼĒsiá. Naʻe fakaʻau ke hoko ʻeku manavasiʻí ko ha maka tūkiaʻanga. Naʻe tuʻunuku mai ʻo fuʻu lahi ʻaupito peá ne lōmekina au.
Naʻá ku ʻā hake ʻi he 4:00 hengihengi ke feinga ke lahi ange ʻeku ngaahi houa akó kimuʻa ʻi he taimi ʻā totonu he 6:00 pongipongí. Naʻe kamata ke fakaʻaongaʻi ʻe he filí e taha ʻo ʻene ngaahi meʻangāue olopoto tahá ʻiate au—ʻa e fakafehoanakí. Naʻe ako ʻe he niʻihi kehé e lea faka-Siapaní, ka naʻá ku fuʻu tōmui au. Naʻe matuʻaki siva moʻoni e ʻamanakí.
Ko e manavasiʻí ko ha meʻa ia ʻoku tau maʻu kotoa. Tuku muʻa ke u fakafeʻiloaki atu ha ngaahi manavasiʻi pau ʻoku tau fehangahangai kotoa mo ia, ʻi ha faʻahinga tuʻunga ʻe taha pe lahi hake, mo ha fakakaukau ki ha ngaahi faitoʻo ʻe niʻihi ʻe ala tokoni: tuí mo e ʻamanaki leleí.
1. Manavasiʻi ʻi hano Fakasītuʻaʻi
ʻE lava ke te matuʻaki mate he ilifia ʻi hano fakasītuʻaʻi kitá ʻo taʻofi kitautolu mei hano fai ha ngaahi ngāue loto-toʻa ʻoku fiemaʻu ki he lavameʻá. ʻOku tau moʻulaloa kotoa pē ki he manavasiʻi ʻoku fekauʻaki mo e fakasītuʻá pe taʻelavameʻá.
Manatuʻi, ʻoku ʻikai ke fakamatalaʻi ʻe he meʻá ni koe. Faifeinga ke ikunaʻi e fakahehema fakanatula ko ia ke taʻofi kita ʻe he manavasiʻi naʻá te toó pe ko hano fakasītuʻaʻi kitá. ʻOkú ne taʻofi koe mei hoʻo vilitaki atu ke maʻu e ngaahi faingamālié. “ʻOua te ke manavahē, ka ke tui pē” (Maʻake 5:36).
2. Manavasiʻi ʻi he Nofomalí mo e Fāmilí
ʻOku mahino kia Sētane ko e fāmilí ko e uho ia e palani ʻo e fiefia ʻa e ʻEikí. ʻOkú ne feinga ke tūtuuʻi e ngaahi tenga fakapoʻuli ʻo e ilifiá ʻi ho lotó—ha meʻa pē te ne taʻofi koe mei hono aʻusia e konga nāunauʻia taha mo e totongi taupotu taha ʻo e matelié, ʻa e māʻoniʻoni mo e fiefia hā ngingila ʻoku haʻu mei hono maʻu ʻo ha hoa taʻengatá mo hono ʻomi e fānau ʻa e Tamai Hēvaní ki he māmani ko ʻení.
Faʻa fakakaukau mo faʻa lotu. Fealeaʻaki mo e ʻEikí pea mo e niʻihi kehe ʻokú ke falala aí, ʻa ia ʻoku ʻi ai foki haʻanau ngaahi fakakaukau ʻi he ongoongoleleí, kae ʻoua naʻá ke tuku ke tataki koe ʻe hoʻo ngaahi manavasiʻí.
3. Manavasiʻi ʻi heʻete Makehé
Neongo ʻoku mahuʻinga ke tui tatau, ka ʻoku mahuʻinga tatau pē foki ke vahevahe e ngaahi moʻoni ʻo e ongoongoleleí ʻoku makehe ki he Siasi ʻo Sīsū Kalaisí. ʻOku ou faifeinga ke fakahoko e ongo meʻá ni fakatouʻosi. Fakakaukau ki he ngaahi moʻoni makehe ʻoku tau lava ʻo fakamoʻoniʻí:
-
Naʻe hā ʻa e ʻOtua ko e Tamaí mo Sīsū Kalaisi kia Siosefa Sāmita ʻo hangē tofu pē naʻá ne pehē naʻá Na fakahokó.
-
ʻOku ʻi ai ha palōfita moʻui ʻi he māmaní he ʻahó ni.
-
Kuo fakafoki mai ʻa e mafai lakanga fakataulaʻeiki naʻe fakaʻaongaʻi ʻe Kalaisi ke fokotuʻu Hono Siasí ʻi he Fuakava Foʻoú, ʻi he ngaahi ʻaho kimui ní.
-
Ko e ngaahi temipale kuo fakatapuí ko e fale ia ʻo e ʻEikí. ʻOku fakahoko e ngaahi fuakava toputapú ʻi ai. ʻOku fakahoko e ngaahi ouau toputapu maʻá e kakai moʻuí mo e kau fakafofongá ʻi ai.
-
Ko e Tohi ʻa Molomoná ko e folofola ia ʻa e ʻOtuá.
-
ʻOku moʻoni ʻa e ʻOtua ko e Tamaí, Sīsū Kalaisi, mo e Laumālie Māʻoniʻoní.
-
Ko Sīsū Kalaisi hotau Fakamoʻuí mo e Huhuʻí.
Ko e Faitoʻo ki he Manavasiʻí
Tuku muʻa ke u toe foki ki hoku taimi ʻi he Akoʻanga Fakafaifekau ʻi Hauaiʻí. ʻOku ou manatuʻi hili e kakato ha mei vaeua ʻo hoku taimi ʻi he Akoʻanga Fakafaifekaú, naʻe ʻi ai ha meʻa naʻe liliu. ʻOku ou manatuʻi ʻeku feliliuʻaki ʻeku taimi akó ʻi he pongipongi takitaha ke kau ha taimi lahi ange ki hono lau mo ako e Tohi ʻa Molomoná kae ʻikai ko hono ako pē ʻo e lea faka-Siapaní.
Naʻá ku ʻiloʻi ko ʻeku ngāue fakafaifekaú naʻe haʻu ia mei he ʻEikí, pea ko ia ai naʻá ku fakapapauʻi te u fai hoku lelei tahá pea tuku kotoa ʻeku falalá ki he toʻukupu ʻo e ʻEikí.
Naʻe ʻikai ke u toe hohaʻa ki he tuʻunga lelei naʻe ʻi ai e niʻihi kehé. Naʻá ku fokotuʻu ha ngaahi taumuʻa maʻaku. Pea naʻe kamata ke u ikunaʻi kinautolu.
Naʻe fakaʻau ke siʻi ange ʻa e manavasiʻí mo e taʻepaú. Naʻe fetongi kinaua ʻe he tuí mo e ʻamanaki leleí. Naʻe iku ʻeni ʻo hoko hono ako e lea faka-Siapaní ko ha meʻa naʻá ku loto-ʻaki peá u fiefia lahi ʻi ai. Ko hono aofangatukú, kuó u nofo ʻi ha taʻu ʻe hiva ʻo ʻeku moʻuí ʻi Siapani, pea ʻoku ou matuʻaki houngaʻia moʻoni ai.
ʻI heʻetau ngāue ke laka ki muʻa ʻi he tuí mo e ʻamanaki leleí, ʻe ʻi ai pē ha ngaahi tōnounou. ʻE ʻi ai ha fanga kiʻi meʻa fakamamahi mo faingataʻa. ʻE ʻi ai ha fanga kiʻi konga fakapoʻuli ʻi he hala ʻoku hanganaki maí. Ka ko e ngaahi foha mo e ngaahi ʻofefine kimoutolu ʻo e ʻOtuá. ʻI heʻene peheé, ʻokú ke maʻu ha maʻuʻanga ivi fakalangi taʻe-faʻa-laua ʻoku nofoʻia ho lotó.
“He naʻe ʻikai foaki ʻe he ʻOtuá kiate kitautolu ʻa e laumālie ʻo e manavasiʻí, ka ko e mālohi… mo e [ʻatamai] fakapotopoto” (2 Tīmote 1:7).
“Ko ia, ke mou fiefia, pea ʻoua ʻe manavahē, he ko au ko e ʻEikí ʻoku ou ʻiate kimoutolu, pea te u tuʻu ʻi homou tafaʻakí” (Tokāteline mo e Ngaahi Fuakava 68:6).
ʻOku pau ʻa e talaʻofa mai ʻa e ʻEikí kiate kitautolú: “Ko ia ia te ne faʻa kātaki ʻi he tuí mo fai hoku lotó, ʻe ikuna ʻe ia” (Tokāteline mo e Ngaahi Fuakava 63:20).
ʻOku ʻi ai maʻu pē ʻa e ʻamanaki leleí. Tuku ke hanga ʻe he ʻilo ko hai moʻoni koé mo hai ʻokú ʻi ho tafaʻakí ʻo toʻo atu kotoa hoʻo ngaahi manavasiʻí.