Unsaon nako pagkahibalo nga ako tinuoray nga naghinulsol ug napasaylo na?

Coming Full Circle [Pagbalik sa Orihinal nga Porma], ni Jenedy Page

Ang Ginoo nag-ingon: “Siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom kanila.

“Pinaagi niini kamo masayod kon ang usa ka tawo naghinulsol sa iyang mga sala—tan-awa, siya mokompisal niini ug mobiya niini” (Doktrina ug mga Pakigsaad 58:42–43).

Pinaagi sa tinud-anay nga paghinulsol, kita makadawat og kapasayloan. “Kon imong mabati ang kahupay gikan sa Espiritu, masayod ka nga ang maulaon nga gahom sa Manluluwas naglihok diha sa imong kinabuhi.” Ug kon kita masipyat og usab, kita makahinulsol og usab, mapasaylo, ug padayon nga maningkamot.

Isip dugang, si Elder Dieter F. Uchtdorf sa Korum sa Napulog Duha ka Apostoles nagtudlo: “Si Satanas mosulay sa pagpatuo kanato nga ang atong mga sala wala mapasaylo tungod kay ato man kining mahinumdoman. Bakakon siya. … Ang Dios wala mosaad nga dili nato mahinumdoman ang atong mga sala. Ang paghinumdom motabang kanato nga malikayan ang pagbuhat pag-usab sa samang mga sayop. Apan kon magpabilin kita nga matinuoron ug matinud-anon, ang paghinumdom sa atong mga sala magkaanam og kawala sa paglabay sa panahon.”