Pangitaa ang Hingpit nga Kalipay
Pangita og bisan usa ka malipayon nga gutlo sa matag adlaw, ug inyong makita ang mga panalangin sa Dios.
Usahay lisod nga magmalipayon. Kon kamo nasagmuyo sa inyong kaugalingon tungod kay wala mobati og kalipay 24/7, hibaloi nga OK ra kana ug normal nga makasinati og mga kalipay ug mga kaguol. Gani, ingon gayod niana ang kinabuhi!
Atong makat-onan diha sa 2 Nephi 2:25, “Si Adan napukan aron ang mga tawo maanaa; ug ang mga tawo anaa, aron sila makabaton og kamaya.” Pagkanindot sa balita! Usa ka dakong bahin sa atong pagkaanaa dinhi sa yuta mao aron makabaton og hingpit nga kalipay. Apan unsaon man nga kita makahimo niana sa mga panahon sa kagul-anan?
Inadlaw-adlaw nga Malipayong Gutlo
Adunay mga adlaw nga tingali mobati nga mas malipayon ug mas mahinamon kaysa ubang mga adlaw, apan makakaplag kamo og mga gutlo sa hingpit nga kalipay sa bisan unsang adlawa. Si Elder Dieter F. Uchtdorf sa Korum sa Napulog Duha ka Apostoles misulti sa ingon niini nga paagi:
“Talagsa ra natong makit-an ang butang nga wala nato pangitaa.
“Nagpangita ba kamo og kalipay?
Ang usa ka butang nga nakatabang nako sa pagpangita og hingpit nga kalipay—ilabi na atol sa lisod nga mga adlaw o mga semana—mao ang pag-ila og usa ka malipayong gutlo sa matag adlaw.
Kini nga mga gutlo dili kinahanglan nga dako, makapausab sa kinabuhi, o nindot kaayo. Mahimong mga butang kini sama sa pagdawat og nindot nga text gikan sa usa ka higala, pagmatikod sa mabulokon nga mga kolor sa nindot nga pagsalop sa adlaw, pagbasa sa kasulatan nga murag gitumong lamang gayod para nako, o pagtagamtam sa akong paboritong pagkaon!
Kon tuyoon nako nga mangita ug moila bisan og usa lang ka “malipayon nga gutlo” sa matag adlaw, makatabang kini nako nga mobati nga mas malipayon ug moila sa daghang panalangin nga gihatag sa Dios nako, dako o gamay.
Ikonsiderar ang pagpangita og usa ka malipayon nga gutlo sa matag adlaw. Pagsugod og usa ka lista aron sa pagrekord niini. Samtang magkadaghan ang inyong nalista, mao usab ang inyong kalipay!