Digital Lamang: Dali, Sunod Kanako
Ang Imong Pagkatinugyanan: Usa ka Gasa gikan sa Dios
Ang Langitnong Amahan naghatag kanato og mga gasa aron sa pagpanalangin kanato ug sa uban.
Litrato pinaagi ni Christina Smith
Sa karaan nga mga panahon, ang usa ka tinugyanan mao ang usa ka espesyal nga matang sa sulugoon nga adunay trabaho sa pagdumala og usa ka dakong panimalay o pagsubay sa mga kabtangan sa ilang agalon. Ang uban nga mga tinugyanan gibutang pa gani diha sa pagmando sa mga gingharian samtang ang hari naa sa layo. Kana usa ka dakong pagsalig!
Ang Ginoo miingon nga “Kadtong makita nga matinud-anon, makiangayon, ug maalamon nga tinugyanan makasulod ngadto sa kamaya sa iyang Ginoo, ug makadawat og kinabuhing dayon” (Doktrina ug mga Pakigsaad 51:19). Wala siya maghisgot mahitungod sa pagdumala sa panalapi sa ubang tawo, hinoon—ang Ginoo nag-ingon nga ang tanan mahimong may tulubagon sa ilang pagkatinugyanan (tan-awa sa Doktrina ug mga Pakigsaad 104:12), ug kadaghanan sa katawhan dili motrabaho alang sa usa ka hari.
Busa, unsa ang gipasabot niini alang kanato karon? Unsay imong pagkatinugyanan? Unsa ang gisalig sa Dios nganha kanimo?
Unsa ang Nahatag diha Kanimo
Usa ka ehemplo sa maayo nga pagkatinugyanan mao ang sambingay sa mga talento, diin ang usa ka adunahan nga tawo mihatag sa matag usa sa iyang mga sulugoon og piho nga mga talento, nga usa ka matang sa kwarta. Duha niadtong mga sulugoon migamit og maayo sa ilang mga gasa ug mipadaghan sa ilang mga talento, ug ang ilang agalon midayeg sa ilang buhat (tan-awa sa Mateo 25:14–30). Kadto nga mga sulugoon maayo nga mga tinugyanan.
Ang bisan unsa nga gasa gikan sa Dios kabahin sa imong pagkatinugyanan (tan-awa sa 1 Pedro 4:10). Ang imong pagkatinugyanan mahimong maglakip sa imong lawas, imong espirituhanong mga gasa, sa imong kahanas, sa imong mga calling sa Simbahan, ug gani sa imong kahibalo sa ebanghelyo. Kadto mao ang talagsaong mga panalangin, apan ang Dios gustong motabang sa tanan sa Iyang mga anak. Ang imong pagkatinugyanan “dili alang sa [imong] kaugalingon nga kaayohan lamang apan sa pagpanalangin sa uban.”
Ang Ginoo nag-ingon, “Mao kini ang akong katuyoan sa pagsangkap sa akong mga santos. … Apan kinahanglan kining himoon sa akong kaugalingong npamaagi” (Doktrina ug mga Pakigsaad 104:15–16). Ang paagi nga Siya mipili naglakip kanato! Ikaw magmaalamon ug makiangayon nga tinugyanan pinaagi sa paggamit sa tanang “talento” nga Iyang gihatag kanimo sa pagserbisyo ug pagpanalangin sa ubang tawo.
Usa ka Panalangin alang Kanimo
Samtang ang imong pagkatinugyanan makatabang nimo sa pagserbisyo sa uban, kadto nga mga gasa talagsaon usab nga panalangin alang kanimo. Hinumdomi, ang Langitnong Amahan misaad og kinabuhing dayon ngadto sa tanang matinud-anong mga tinugyanan. Siya gustong mopanalangin usab kanimo!
Ang Langitnong Amahan misalig kanimo, ug Siya ganahan sa imong mga paningkamot. Ang pagsalig diha ni Jesukristo sa paghimo sa imong labing maayo nga mahimong usa ka tinugyanan karon modala kanimo nga mas mapaduol ngadto Kaniya ug moandam kanimo nga mahimong maayo nga tinugyanan sa kahangtoran.