Mga Paagi nga Kita Nagsunod ni Jesukristo
Makasunod kita ni Jesukristo pinaagi sa pag-apil Kaniya diha sa Iyang buhat.
Feed My Sheep [Pakan-a ang Akong mga Karnero], ni David Koch
Sa dihang nabunyagan kita, gisugdan nato ang proseso sa pagdala ngari sa atong kaugalingon sa sagradong ngalan ni Jesukristo. Si Presidente Dallin H. Oaks misulat, “Usa sa labing mahinungdanon nga mga kahulogan sa pagdala ngari sa atong kaugalingon sa ngalan ni Kristo [mao] ang kaandam ug kamapasaligon sa pagdala ngari sa atong kaugalingon sa buhat sa Manluluwas ug sa Iyang gingharian.”
Ang buhat sa Manluluwas mao “ang pagpahinabo sa pagka-imortal ug sa kinabuhing dayon sa tawo.” Ang pagka-imortal usa ka gasa nga gigarantiya na ni Jesukristo pinaagi sa iyang Pagkabanhaw. Ang kinabuhing dayon mao ang labing mahinungdanon nga gasa nga mahatag sa Dios ngadto sa katawhan. Mao kini ang pagpuyo hangtod sa kahangtoran isip mga pamilya diha sa Iyang presensya.
Aron makadawat kita og kinabuhing dayon, kinahanglan kitang mahimong matinud-anon nga mga disipulo ni Jesukristo. Nagpasabot kini nga kita modawat sa gipahiuli nga ebanghelyo pinaagi sa pagbaton og hugot nga pagtuo diha sa Manluluwas ug sa Iyang Pag-ula, paghinulsol, pagpabunyag, pagdawat sa gasa sa Espiritu Santo, ug paglahutay hangtod sa kataposan.
Matinguhaon nga Moapil
Dayon moapil kita sa Manluluwas diha sa Iyang buhat pinaagi sa pagtabang sa mga anak sa Dios nga mahimong matinud-anong mga disipulo ni Jesukristo. Naglakip kini sa pagpakigbahin sa Iyang ebanghelyo, pagpundok sa nagkatibulaag nga Israel, pagtuman sa mga responsibilidad diha sa Simbahan sa Manluluwas, ug sa pagpaningkamot nga mahimong sama Kaniya.
Si Presidente Russell M. Nelson mipamatuod, “Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug templo, kamo nagtabang sa pagpundok sa Israel.”
Aron ang buhat sa Manluluwas mahimong atong buhat, kita motutok sa Iyang mga katuyoan, mosunod sa Iyang mga sugo, ug mohigugma sa usag usa. Samtang naghimo kita sa Iyang buhat sumala sa Iyang paagi, ang pipila ka butang isalig ngari kanato aron kita mismo ang maghunahuna. Ang Manluluwas mipahayag:
“Sa pagkatinuod moingon ko, ang mga tawo kinahanglang matinguhaon nga moapil sa maayo nga katuyoan, ug mobuhat og daghang butang pinaagi sa ilang kaugalingong gawasnon nga kabubut-on, ug mopahitabo sa daghang pagkamatarong;
“Kay ang gahom anaa kanila, diin sila mao ang mga tinugyanan sa ilang mga kaugalingon. Ug kon ang mga tawo nagbuhat og maayo sila dili mawad-an sa ilang ganti.”
Kon kita mosunod sa Manluluwas, moapil Niya sa Iyang buhat, ug motabang sa uban nga mahimong Iyang matinud-anon nga mga disipulo, kita motudlo sa unsay Iyang itudlo, motutok sa Iyang doktrina, ug mohatag og espesyal nga pagtagad niadtong mga kabos, nanginahanglan, ug talandogon. Ang Manluluwas klaro nga mitudlo niini sa dihang mikutlo Siya gikan sa Isaias diha sa sinagoga sa Nazaret:
“Ang Espiritu sa Ginoo ania kanako, kay iya man akong gidihogan aron sa pagwali sa maayong balita ngadto sa mga kabos; gipadala niya ako aron sa pagpahibalo sa kagawasan ngadto sa mga binilanggo, ug sa kahiuli sa igtatan-aw ngadto sa mga buta, sa paghatag sa kagawasan ngadto sa mga dinaugdaog.”
Ang pag-apil kang Jesukristo diha sa Iyang buhat makapahinam tungod kay ang Iyang mga buhat, mga plano, ug mga katuyoan “dili gayod mapakyas, ni kini makawang.” Alang niadtong mibati nga nawad-an og kadasig, ang Ginoo mitambag: “Busa, ayaw pagluya diha sa maayo nga buhat, kay kamo nagpahimutang sa tukoranan sa usa ka mahinungdanon nga buhat. Ug gikan sa gagmay nga mga butang magagikan ang mga dagko.”
Ang Kasingkasing ug usa ka Andam nga Hunahuna
Dili kita kinahanglan nga magdala og talagsaong mga talento o mga abilidad ngadto sa buhat sa Ginoo. Ang gikinahanglan Niya mao lamang ang kamapasaligon ug kaandam. Siya nag-ingon, “Tan-awa, ang Ginoo nagkinahanglan sa kasingkasing ug sa usa ka andam nga hunahuna.” Ang Ginoo makahimo sa tawo nga andam mohimo nga makamao. Apan Siya dili makahimo o dili mohimo sa makamao nga mahimong andam sa paghimo. Bisan unsa pa kita ka talentado, Siya dili mogamit nato gawas kon kita mapasaligon sa Iyang buhat ug andam nga motabang Kaniya.
Si Samuel ug si Anna-Maria Koivisto mipakita sa samang kamapasaligon ug kaandam. Wala madugay human sa ilang kaminyoon, ang mga Koivisto mibalhin gikan sa Finland ngadto sa Sweden sa pagpadayon sa ilang mga oportunidad sa pagpanarbaho. Sa pag-abot, si Brother Koivisto gidapit nga makig-istorya ni Presidente Leif G. Mattsson, usa ka magtatambag sa kapangulohan sa Göteborg Sweden Stake. Kay si Samuel dili man makasulti og Swedish, nag-Iningles sila.
Human sa mubo nga panag-istoryahanay, si Presidente Mattsson mihangyo ni Samuel sa pagserbisyo isip ward mission leader. Si Samuel mipasabot sa klaro na kaayo, “Apan dili ko makasulti og Swedish.”
Si Presidente Mattsson miakbo sa iyang lamesa ug mipasabot, “Nangutana ba ko nimo kon makasulti ka og Swedish, o andam ka ba nga moserbisyo sa Ginoo?”
Si Samuel mitubag, “Nangutana ka nako kon andam ba ko nga moserbisyo sa Ginoo. Andam ko.”
Gidawat ni Samuel ang calling. Nidawat usab si Anna-Maria og mga calling. Ang duha matinud-anong nagserbisyo ug nagkat-on sa pagsulti og matahom nga Swedish samtang nagserbisyo. Ang kamapasaligon ug kaandam sa pagserbisyo sa Ginoo nahimong kinaiya sa kinabuhi nila ni Samuel ug Anna-Maria. Natudloan ko nila nga kon kita moserbisyo, atong gamiton ang mga talento nga anaa kanato, ug dayon ang Ginoo motabang nato nga matuman ang Iyang mga katuyoan.
Kon andam kita nga moserbisyo, maningkamot kita nga dili moreklamo o magbagulbol. Kon dili kita mag-amping ug dili magmakanunayon sa atong mahangtorong panglantaw ug mopahinumdom sa atong kaugalingon kon kang kinsa gayod kini nga buhat, kita tingali moreklamo, magbagulbol, ug mapaling sa atong kamapasaligon ngadto ni Jesukristo. Mosangpot kini ngadto sa kalit nga pagrebelde batok sa Ginoo. Sa kaulahian, mawala ang hugot nga pagtuo nga anaa nato.
Nag-ampo ko nga kita sa kanunay makahimo sa pagpili nga mosunod ni Jesukristo pinaagi sa pag-apil Kaniya diha sa Iyang buhat. Kon buhaton nato, hatagan kita og “bililhon ug dagkong mga gasa nga iyang gisaad,” lakip na sa kapasayloan sa sala, kaluwasan, ug kahimayaan. Gani, kita gisaaran sa labing mahinungdanong gasa nga mahatag sa Dios—kinabuhing dayon.