Bisan ang Dios Nagbakho
Kitang tanan makasinati og negatibong mga pagbati, apan makabaton gihapon kita og hingpit nga kalipay.
Heavenly Communication [Langitnong Komunikasyon], ni Yongsung Kim
Ang Langitnong Amahan malipayon. Nasayod kita niini.
Misaad Siya nga hatagan kita sa tanan nga anaa Kaniya kon kita magmatinud-anon (tan-awa sa Doktrina ug mga Pakigsaad 84:38; 88:107; 132:20). Misaad usab Siya kanato og “kahingpitan sa kalipay” (3 Nephi 28:10) ug “walay kataposang kalipay” (Mosiah 2:41; Alma 28:12). Mao kana ang mga butang nga aduna ang Dios ug Iyang gitagamtam.
Apan kadali lang. Adunay daghang kasulatan nga naghisgot nga ang Dios nalipay—apan adunay daghang higayon usab nga ang Ginoo naguol, nasuko, o nasagmuyo.
Tataw lang, nga ang Dios makasinati og ingon niana nga mga pagbati apan dili motugot niini nga maoy mopatigbabaw o mobuntog sa tanang pagbati sa “walay kataposang kalipay” ug sa “kahingpitan sa kalipay.”
Ang propeta nga si Enoch nahibulong sa pagkasayod niini. Nakita niya ang Ginoo nga nagbakho ug miingon, “Sa unsa nga paagi ikaw makabakho, nasayod nga ikaw balaan, ug gikan sa tanan nga kahangtoran ngadto sa tanan nga kahangtoran?” (Moises 7:29). Ang tubag sa Ginoo daw ingon niini: Tan-awa kon unsa unya ang pag-antos sa akong mga anak tungod sa ilang pagkadili matarong! Dili ba diay ang pagbakho mao ang tukmang reaksyon? (tan-awa sa Moises 7:37).
Dili kana makatubag sa pangutana kon unsaon nga ang kaguol mahimong mag-uban sa mahangtorong kalipay. Apan ang atong kaugalingong mga kasinatian dinhi sa mortalidad tingali makahatag nato og ideya.
Kaatbang sa Tanang Butang
Magmatinud-anon kita: Ang kalibotan adunay ngil-ad kaayo nga mga butang. Maningkamot kita sa pagtutok sa positibo—ug adunay daghan—apan agi og dugang sa mga gubat ug mga katalagman, adunay mga pagsulay usab sa atong personal nga mga kinabuhi. Walay dili makasinati sa kasubo ug kasakit.
Apan, sa kinatibuk-an, kadaghanan nato nakasugakod ra. Mahimo kita nga magmalipayon—o bisan man lang malinawon—bisan pa sa bisan unsang ngil-ad sa atong palibot.
Ang ubang tawo makonsinsya nga mobati og kamalipayon samtang adunay kagul-anan sa kalibotan. Apan kon kita mobati og kalipay, wala kana magpasabot nga wala na kita magpakabana sa pag-antos ug sa pagkawalay kaangayan. Sama lang kana nga makahimo kita sa paghunahuna og labaw pa sa usa ka butang sa usa ka higayon. Kinahanglan gayod nato kining buhaton! Kay kondili dili kita makalihok!
Ang Dios mipadala nato nga mopuyo sa usa ka kalibotan nga nakahibalo na Siyang daan nga adunay kasakit… apan sa samang higayon, gusto Siya nga kita mobati og kalipay (tan-awa sa 2 Nephi 2:25). Aduna gayoy paagi nga mabati ang duha sa samang higayon.
Ang paagi mao ang Manluluwas.
Pilia ang Imong Tutokan
Si Presidente Russell M. Nelson misulti niini sa halandomon kaayong paagi: “Ang kalipay nga atong gibati dili kaayo konektado sa mga kahimtang sa atong kinabuhi apan konektado kaayo sa gitutokan sa atong kinabuhi.” Mipadayon siya sa pagsulti: “Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang kalipay moabot gikan ug tungod Kaniya.”
Ang laing dinasig nga mga lider mihisgot pag-usab sa mga gibati ni Presidente Nelson. “Ang tanang nag-antos sa bisan unsa nga matang sa mortal nga kahuyang kinahanglang mahinumdom nga ang atong Manluluwas nakasinati usab niining matang sa sakit, ug pinaagi sa Iyang Pag-ula, Siya nagtanyag sa matag usa kanato sa kalig-on aron mapas-an kini.” “Pinaagi sa Pag-ula ni Jesukristo, kita mahimong … matabangan sa atong mga kahuyang.” “Samtang kamo moduol ngadto Kaniya, kamo magantihan sa kalig-on nga moatubang sa mga hagit sa kinabuhi.”
Si Apostol Pablo adunay nindot kaayo nga kinaiya. Miingon siya, “Kay nakat-onan ko ang pagkatagbaw sa bisan unsang ania kanako” (Mga Taga-Filipos 4:11)—ug anaa siya sa bilanggoan sa dihang gisulti niya kana!
Ang abilidad sa pagsinati sa tibuok gilapdon ug gilawmon sa mga pagbati samtang magbaton gihapon og “kahingpitan sa kalipay” mao ang usa sa daghang butang nga nahingpit sa Dios nga padayon pa gihapon natong gipaningkamotan. Apan moabot ra kita diha! Ug sa pagkakaron, Siya makatabang nato sa pagtutok sa maayo samtang nahibalo sa dili maayo.