Digital Lamang: Mga tubag gikan sa usa ka Apostol
Unsaon Nako sa Pagbuntog ang Kahadlok ug Kawalay Kasiguroan?
Tugoti ang kahibalo kon si kinsa gayod kamo ug kon kinsa ang anaa sa inyong kiliran nga mopalong sa tanang kahadlok.
Gikan sa pakigpulong sa gradwasyon sa Brigham Young University—Idaho nga gihatag niadtong Abril 8, 2021.
Sa usa ka bulan ika-19 na nakong adlawng natawhan sa dihang miabot akosa panimalay nga puno sa gilaoman. Adunay usa ka sobre nga adunay ngalan nako niini gikan sa punoang buhatan sa Simbahan nga nagpaabot nga maablihan.
Ang akong kasingkasing naglumpayat sa kahinam ug kabalaka sa dihang akong gibasa, “Ikaw gitawag ngadto sa Japan Fukuoka Mission.” Mibalik ko sa trabaho ug mipahibalo sa maayong balita. Ako moadto sa Japan.
“Unsa nga misyon?”
Akoa unta nga gisulti ang Tokyo. Ako unta nga gisulti ang Osaka, apan dili nako mahinumdoman ang ngalan sa misyon, ug sa dihang nakahinumdom ko, dili ko kahibalo nga molitok niini.
Kini nakahasol nako sa misunod nga pipila ka semana samtang akong gipakigbahin ang maayong balita sa mga higala ug sa pamilya. Usa ka higala sa pamilya nga bag-o lang mipauli gikan sa iyang misyon sa Japan misulay sa pagtabang nako nga mamemorya ang mubo nga pagpamatuod sa Hinapon, pero dili gyod ko makahimo niini.
Ang akong kahinam sa misyonaryo nga pagserbisyo karon aduna nay dalang kabalaka mahitungod sa pagkat-on sa lisod nga pinulongang Hinapon. Sa hunahuna, ang hagit sa pagkat-on og Hinapon nagkalisod. Ang akong kabalaka nahimong makaparalisa nga kahadlok, nga kanunayng nag-uban.
Kining kahadlok ingon og miuban nako ngadto sa kampus sa Brigham Young University—Hawaii, diin nahimutang ang Missionary Training Center (MTC) alang sa mga pinulongan sa Asya. Ang akong kahadlok nahimong usa ka babag. Kini midako na og maayo nga kini mihimong lisod kanako nga normal nga molihok.
Mobangon ko sa alas 4:00 sa buntag aron makatuon og pila ka oras sa dili pa ang naandan nga alas 6:00 sa buntag nga ting mata. Ang kaaway misulay sa paggamit sa usa sa iyang kinamaayohan nga himan ngari nako—ang pagtandi. Ang uban nakat-on sa Hinapon, ug ako biya kaayo. Mibati ko nga wala na gayoy paglaom.
Kitang tanan makasinati og kahadlok. Tugoti ko nga mopaila og pipila sa piho nga mga kahadlok nga giatubang natong tanan sa madako man o gamay, inubanan og usa ka hunahuna mahitungod sa mga tambal nga mahimong makatabang: hugot nga pagtuo ug paglaom.
1. Kahadlok nga Isalikway
Ang kahadlok nga isalikway mahimong makaparalisa kaayo nga kini makapugong kanato gikan sa paghimo og hugot nga mga aksiyon nga gikinahanglan aron molampos. Kitang tanan maubos sa kahadlok nga inubanan sa pagsalikway o kapakyasan.
Hinumdomi, kini wala naghulagway kaninyo. Paningkamoti ang pagbuntog nianang natural nga pagbira sa kahadlok sa kapakyasan o pagsalikway. Kini makasanta kaninyo sa pagpadayon ngadto sa pagkaplag og mga oportunidad. “Ayaw kahadlok, sumalig ka lamang” (Marcos 5:36).
2. Kahadlok sa Kaminyoon ug Pamilya
Nakasabot si Satanas nga ang pamilya mao ang sentro sa plano sa kalipay sa Ginoo. Siya naningkamot sa pagtisok sa daotan nga mga binhi sa kahadlok diha sa inyong kasingkasing, bisan unsa nga magpalayo kaninyo gikan sa pagsinati sa labing mahimayaon, magantihon nga bahin sa mortalidad, ang hayag sa pagkabalaan ug ang kalipay nga moabot gikan sa pagkakaplag og usa ka mahangtorong kapikas ug sa pagdala sa mga anak sa Langitnong Amahan nganhi niini nga kalibotan.
Pagmahunahunaon ug pagmainampoon. Pakigtambag uban sa Ginoo ug sa uban nga inyong saligan kinsa adunay panglantaw usab sa ebanghelyo, apan ayaw pagdawat og tambag gikan sa inyong mga kahadlok.
3. Kahadlok nga Mahimong Lahi
Sama ka importante sa pagpangita og komon nga baroganan, kini ingon usab kaimportante ang pagpakigbahin sa mga kamatuoran sa ebanghelyo nga lahi ngadto sa Simbahan ni Jesukristo. Naningkamot ko sa pagbuhat niadtong duha ka butang. Hunahunaa ang talagsaong mga kamatuoran diin kita makahimo sa pagpamatuod:
-
Ang Dios nga Amahan ug si Jesukristo mipakita ngadto ni Joseph Smith eksakto sumala sa iyang gisulti nga Ilang gibuhat.
-
Adunay buhi nga propeta sa yuta karon.
-
Ang awtoridad sa pagkapari nga gigamit ni Kristo sa pagtukod sa Iyang Simbahan diha sa Bag-ong Tugon napahiuli niining ulahing mga Adlaw.
-
Ang gipahinungod nga mga templo mao ang balay sa Ginoo. Ang sagradong mga pakigsaad gihimo didto. Ang sagrado, buhi ug puli nga mga ordinansa gipahigayon didto.
-
Ang Basahon ni Mormon mao ang pulong sa Dios.
-
Ang Dios nga Amahan, si Jesukristo, ug ang Espiritu Santo tinuod.
-
Si Jesukristo mao ang atong Manluluwas ug Manunubos.
Ang Tambal sa Kahadlok
Tugoti ko mobalik ngadto sa akong panahon sa MTC sa Hawaii. Nakahinumdom ko nga human sa pagkompleto sa dul-an katunga sa akong panahon sa MTC, adunay nausab. Nakahinumdom ko nga miusab sa akong oras sa pagtuon matag buntag sa paglakip og dugang oras sa pagbasa ug pagtuon sa Basahon ni Mormon kay sa magtuon lang sa Hinapon.
Ako nasayod nga ang akong misyon tawag gikan sa Ginoo, ug busa ako determinado nga mobuhat sa akong labing maayo ug ibutang ang akong kaugalingon diha sa mga kamot sa Ginoo.
Giundang nako ang pagkabalaka mahitungod kon unsa ka maayo ang uban. Naghimo ko og mga tumong alang sa akong kaugalingon. Ug ako misugod sa pagkab-ot niini.
Ang kahadlok ug kawalay kasiguroan mikunhod. Ang hugot nga pagtuo ug paglaom mipuno sa ilang dapit. Kini miresulta diha sa pagtuon sa Hinapon nga milambo ngadto sa usa ka hilig uban sa dakong kalingaw. Sa kataposan, ako migahin og siyam ka tuig sa akong kinabuhi sa Japan, diin ko mapasalamaton kaayo.
Samtang kita motrabaho aron moabante sa unahan uban sa hugot nga pagtuo ug paglaom, adunay mga kapakyasan. Kamo makasinati og pipila ka hagit ug mga kalisod. Adunay mga kawalay kasiguroan diha sa unahan. Apan kamo ang mga anak nga lalaki ug mga anak mga babaye sa Dios. Sa ingon, kamo adunay dili mahurot nga balaang tinubdan sa kalig-on nga nagdilaab sa inyong kahiladman.
“Kay kita wala sa Dios hatagig espiritu sa katalaw kondili sa espiritu sa gahom, … ug sa pagpugong sa kaugalingon’ (2 Timoteo 1:7).
“Mao nga, paglipay, ug ayaw kahadlok, kay Ako ang Ginoo anaa uban kaninyo, ug mobarog uban kaninyo” (Doktrina ug mga Pakigsaad 68:6).
Ang saad sa Ginoo ngari kanato sigurado: “Siya nga molahutay pinaagi sa pagtuo ug mobuhat sa akong kabubut-on, ang mao makabuntog” (Doktrina ug mga Pakigsaad 63:20).
Kanunay gayod nga adunay paglaom. Tugoti ang kahibalo kon si kinsa gayod kamo ug kon kinsa ang anaa sa inyong kiliran nga mopalong sa tanang kahadlok.