Digital Lamang: Mga Tingog sa Kabatan-onan
Si Kristo Miluwas Kanako sa Dihang Ako Padulong Malumos
Usa ko ka maindigon nga manlalangoy sulod na sa mga lima ka tuig. Atol sa usa ka season, ang akong coach ug ako nakaamgo nga igo ang akong pag-uswag aron makalangoy diha sa varsity (advance) nga team. Apan nasayod ko nga ang mga panahon sa pagpraktis sa varsity magkasumpaki sa personal nga pagtambong sa seminary, usa sa akong paborito nga mga dapit sa pagsugod sa akong kabuntagon ug ang importanteng paagi nga ako mas mapaduol ngadto ni Kristo.
Nanlimbasog gyod ko niining desisyon. Samtang nag-ampo ko mahitungod niini, mibati ko nga nadani ang pag-apil sa team sa varsity mao ang butang nga gusto sa Dios nga akong buhaton. Mihimo ko og dakong pagsalig ug giandam ang akong kaugalingon nga magsugod sa varsity nga paglangoy ug sa online nga seminary.
Nalumos sa Kalisdanan
Ang pagmata alang sa sayo sa buntag nga seminary talagsa ra kaayo nga lisod para nako. Bisan og gikapoy ko, nasayod ko nga padulong ko ngadto sa usa ka dapit sa kalinaw ug pagkat-on. Apan ang pagmata sa mga 4:45 alang sa praktis sa langoy makapahilayo ug malisod. Ug ang mga praktis mas lisod kay sa bisan unsa nga akong nasinati.
Niining higayona, akong nahinumdoman ang usa ka pakigpulong nga ganahan nako ni Presidente Russell M. Nelson. Usa ka kinutlo gikan sa pakigpulong nakapadani nako:
“Kon mokab-ot kamo alang sa gahom sa Ginoo diha sa inyong kinabuhi uban sa samang paningkamot sa tawo nga hapit na malumos nga naningkamot nga makaginhawa, ang gahom gikan ni Jesukristo inyong maangkon. Kon ang Manluluwas masayod nga gusto gayod ninyong modangop Kaniya—kon Iyang mabati nga ang inyong labing dakong tinguha mao ang pagdawat sa Iyang gahom nganha sa inyong kinabuhi—magiyahan kamo sa Espiritu Santo aron masayod kon unsa gayod ang kinahanglan ninyong buhaton.
“Kon maningkamot kamo sa espirituhanong paagi nga labaw pa sa inyong nabuhat sukad, nan ang Iyang gahom modagayday nganha kaninyo.”
Samtang ako namalandong niining kinutlo, akong mas nasabtan kon unsa sama ang bation nga malumos. Sa usa ka bahin, usahay gibati nako nga mura gyod ko og tinuod nga nalumos. Ang akong lawas murag giduot og maayo ngadto sa pisikal nga kinutoban niini, ug ako tinuod nga mag-apas og ginahawa. Gibati usab nako nga ako daw nalumos sa kangitngit ug pag-inusara. Despirado ko nga nagkinahanglan og hangin ug pagluwas.
Magpaduol ngadto ni Kristo
Aron ipakita sa Langitnong Amahan ug sa Manluluwas nga gusto nako nga moduol ngadto Kanila, akong gitutokan ang paghimo og aksiyon. Mitambong ko sa templo, gitun-an ang mga kasulatan sa matag adlaw, miapil sa online nga seminary, ug nag-ampo alang sa tabang ug sa usa ka positibo nga kinaiya.
Sa akong paghandom niining grabe ka lisod nga panahon, ako makapamatuod nga “ang Iyang gahom [mi] dagayday [ngari kanako]!” Si Jesukristo milig-on ug mipasarang nako. Usahay lisod ang makita diha sa kahigayon, apan kon akong hinumdoman ug mag-ampo aron makita kon sa unsang paagi milambo ko, akong makita ang impluwensiya sa Manluluwas diha sa akong kinabuhi. Nasayod ko nga Siya buhi ug nahigugma nako! Tungod Kaniya, ang tanang butang mahimo kon kita motuo.
Sarah R., edad 16, Texas, USA
Ganahan mokanta, mag-podcast, molangoy, ug magtuon sa kasulatan.