Nakatago nga mga Bahandi

Ang nag-una nga mga Santos nakahibalo nga sila mag-atubang og mga pagsulay. Apan ang Manluluwas misaad sa mga masulondon ug matinud-anon nga kini nga mga hagit mahimong mas malabwan pa sa mga ganti.

“Dili kamo makakita pinaagi sa inyong kinaiyanhon nga mga mata, sa pagkakaron, sa plano sa inyong Dios mahitungod niadto nga mga butang nga moabot sa umaabot, ug sa himaya nga mosunod human sa daghang kalisdanan” (Doktrina ug mga Pakigsaad 58:3).

Talagsaon kana nga saad!

Ang Apostol Pablo miingon og usa ka butang nga parehas: “Ang wala makita sa mata, ni madungog sa dalunggan, ni mosantop sa kasingkasing sa tawo, ang gikatagana sa Dios alang kanila nga nahigugma kaniya” (1 Mga Taga-Corinto 2:9).

Sa laing pagkasulti: Ang mga panalangin nga naghulat kanato sa kahangtoran tungod sa pagkamatinud-anon ngadto sa Dios mahimong dako kaayo nga kita dili makahanduraw niini sa literal nga paagi! Mao nga ayaw kabalaka sa mga detalye. Kon unsa man kini, malipay kita.

Ang Dios usahay mohatag kanato og lugway kon unsaon nato pagtuman Kaniya. Pipila ka ehemplo:

• Sa Doktrina ug mga Pakigsaad 60:5, ang Ginoo misugo sa pipila sa nag-unang mga Santos nga moadto “sa labing daling panahon” sa St. Louis—apan miingon nga “dili igsapayan” kon sila maghimo ba og barko o magpalit.

• Diha sa 61:22, human sultihi ang kaigsoonan nga dili mopanaw agi sa tubig sa pagka karon, ang Ginoo misulti nga “sa dili madugay” sila makapili kon moadto ba sila agi sa tubig o sa yuta, “sumala sa ilang mga paghukom human niini.”

• Diha sa 61:35, ang Ginoo misulti nga ang kalalakin-an mahimong “magkuyog sa pagpanaw [sa usa ka pundok], o magtinagurha, kon gihunahuna nila nga makaayo”—apan midugang nga sa bisan unsang kahimtang, gusto Niya nga si Reynolds Cahoon ug Samuel H. Smith maoy mag-uban.

Dili kita kinahanglan nga mandoan sa matag gagmay nga butang (tan-awa sa Doktrina ug mga Pakigsaad 58:26–27). Kon walay piho nga kamandoan nga gihatag, atong gamiton ang atong maayo nga paghukom ug espirituhanong pagbati, magsunod sa baroganan diha sa Doktrina ug mga Pakigsaad 62:8: “Kini nga mga butang magpabilin nga inyong buhaton sumala sa paghukom ug sa mga pagmando sa Espiritu.”