Usa ka Hagit sa Pagsayaw
Sa iyang labing dako nga pagsulay, si Sinah M. sa Germany miingon sa iyang kaugalingon, “Mas maayo pa nga mogawas ko gikan niini nga mas lig-on kaysa kalit lang nga magduhaduha.”
Mga Litrato pinaagi ni David A. Edwards
Ang mga hagit dili kasagaran moabot kon unsaon o kanus-a nimo gusto nga kini moabot. Mao kana kon nganong gitawag kini og mga hagit. Mao nga, kon ang kinabuhi mohatag kanimo og hagit, unsaon nimo kini sa pag-atubang? Kon kini sakit kaayo ug dili masabot, unsay imong buhaton? Kon kini makapugos nimo sa pag-usab sa imong kinabuhi ug sa imong pagtan-aw sa kaugalingon, asa ka modangop?
Mga tulo ka tuig ang milabay, si Sinah M., usa ka 17-anyos nga batan-ong babaye gikan sa North Rhine-Westphalia, Germany nag-atubang niini nga mga pangutana. Ang iyang mga tubag naimpluwensiyahan sa unsay miabot sa wala pa kana nga higayon.
Usa ka Kalit nga Pagsulay
“Nagsayaw ko sa akong tibuok kinabuhi ug nakahiligan kaayo ni nako,” miingon si Sinah. “Nag-ballet ko, modern dance, jazz—gamay sa tanang butang, apan kasagaran ballet.” Ang pagsayaw makapalipay niya ug usa ka dakong parte sa iyang pagkatawo. “Ang tanan nagtuyok sa pagsayaw,” siya miingon.
Apan dayon siya nagsugod sa pagbati og sakit sa iyang mga tiil sa matag higayon nga siya mosayaw. Gibati niya kini bisan kon siya maglakaw, ug dili kini mawala. Siya nangita og mga tubag ug pagkaayo pinaagi sa mga doktor, sa mga panalangin sa pagkapari, ug sa pag-ampo. Apan ang hinungdan sa iyang gibating sakit nagpabilin nga usa ka misteryo, ug ang kahupayan gikan sa iyang pisikal nga pag-antos wala moabot.
“Ako sa tinud-anay adunay mga higayon diin kalit lang nga aduna akoy mga hunahuna sama sa, ‘Nahigugma ba nako ang Langitnong Amahan? Nganong kinahanglan pa man nga makaagi ko niini? Nganong Iya man nga gitugot nga kini mopasakit nako og maayo?’” miingon si Sinah.
Apan bisan pa man sa mao nga mga hunahuna, siya midawat niini nga pagsulay uban sa grabe nga pagtuo ug pagsalig sa Ginoo.
Hugot nga Pagtuo sa wala pa ang Kalisod
Sa wala pa mag-atubang niini nga hagit, si Sinah nakapalambo na og pagtuo sa Langitnong Amahan ug ni Jesukristo.
“Kanunay na gayod ko nga interesado sa ebanghelyo,” miingon si Sinah. Nalipay siya nga ang iyang mga ginikanan mitudlo niya sa ebanghelyo, midala niya sa simbahan, ug mitisok diha kaniya og tinguha nga magkat-on sa ebanghelyo sa iyang kaugalingon.
“Ako usa ka tawo nga daghan kaayo og pangutana, apan wala ko mabalaka niini nga pagpangutana,” miingon siya. “Diha na nga ako na-tin-edyer nga ako gayod nga nakat-onan nga OK lang ang pagbaton og mga pangutana. Akong gitugotan ang akong kaugalingon nga makabaton og mga pangutana, ug nag-ampo ko alang sa kahibalo ug kalig-on ug nga ang Langitnong Amahan motabang nako nga mahimong mas lig-on ang akong pagpamatuod.”
Paglabay sa panahon, iyang nabantayan nga kini nga paagi, sa pagkatinuod, mas nakapalig-on sa iyang pagpamatuod. “Kanunay gayod ko nga bukas sa ebanghelyo, apan ako usab nga gitugotan ang akong kaugalingon nga makabaton og mga pangutana kon sila moabot, ug mas nagsiksik ko og kahibalo sa ebanghelyo.”
Wala na siya mosayaw, apan si Sinah adunay lain nga mga ganahan, lakip na ang piyano ug biyolin. “Bag-ohay lang kami nga adunay konsiyerto sa mga stake sa Dortmund ug Düsseldorf, ug nagpraktis gyod ko ug ganahan nga manindot ang akong pagpasundayag. Nindot gyod kini nga paminawon, ug nalingaw kaayo ko. Kon hinumdoman, kini tungod kay ako adunay gihunahuna nga tumong.”
Gisulayan nga Pagtuo
Bisan kon ang iyang pisikal nga pakigbisog medyo lisod usahay, ang pundasyon ni Sinah sa pagtuo nag-andam kaniya aron maatubang kini nga hagit.
“Sa pagkatinuod akong giingnan ang akong kaugalingon sukad pa sa sinugdanan nga bisan unsa pa kini ka lisod, bisan unsa pa kini ka sakit, bisan unsa pa ang akong maagian, dili ko gusto nga mobasol sa Ginoo o masuko Kaniya,” miingon siya. “Mao nga giingnan nako ang akong kaugalingon nga mahimo ko nga masagmuyo, mahimo ko nga maguol, apan dili ko gusto nga maoy mahimong rason nga ang akong pagpamatuod kalit lang nga magsugod og kahugno. Mas maayo pa nga mogawas ko gikan niini nga mas lig-on kaysa kalit lang nga magduhaduha.”
Si Sinah nagdesisyon usab sayo pa lang nga dili gayod siya moagi niini nga pagsulay nga mag-inusara. Tungod kay wala na siya mosayaw, karon nakakaplag siya og dako nga kalipay nga makauban ang iyang pamilya ug mga higala. Ug siya midangop alang sa kahupayan ug tambag sa Langitnong Amahan ingon man sa mga ginikanan ug mga lider.
Sama pananglitan, siya moingon, “Kadaghan ko nakaistorya niini sa mga tawo nga mag-adto sa templo ug uban pa, ug sila miingon nga ang mga pangutana nga kasagaran mosulod sa ulo—kanunay kining ngano. Apan sila miingon, ‘Ang Amahan sa Langit nakahibalo nga igo ang imong kalig-on aron moatubang niini.’ Ug ang makadungog niana gikan sa ubang tawo makatabang kaayo.”
Siya usab mibati sa gugma ug kalig-on gikan sa Langitnong Amahan pinaagi sa pagpakig-uban sa ubang kabatan-onan sa mga komperensiya sa AKK. Apan tingali labaw sa bisan unsang butang, siya mibati og kalig-on ug kalinaw pinaagi sa mga panalangin sa pagkapari. “Sa matag panalangin nga akong nadawat, gibati nako ang Espiritu nga kusog kaayo ug nakabantay gayod nga ang Langitnong Amahan anaa gayod ug nga Siya nahigugma gayod kanako. Akong nabantayan nga dili lang kini gisulti kanako sa usa lang ka tigkupot sa pagkapari, apan kini dinasig gayod.”
Si Sinah adunay pagpamatuod sa mga panalangin sa pagkapari ug bag-ohay lang nakadawat sa iyang patriyarkal nga panalangin. “Kini nga panalangin nagkompirmar nga ang Langitnong Amahan nakaila gayod nako ug nahigugma nako ug nga ako makahibalo unsa ang iyang gihatag alang nako niini nga kalibotanong kinabuhi ug unsa ang naghulat kanako.”
Unsa ang Iyang Nakat-onan
“Tungod kay dili na man gyod ko makasayaw, kinahanglan ko nga mangita og bag-o nga tutokan sa akong kinabuhi,” miingon si Sinah. “Ug mas nahimo kanang mao ang ebanghelyo. Oo, lisod gihapon kini. Apan ako yanong nakat-on sa pagsalig og dugang pa sa Ginoo.”
Kana nga pagsalig nagpasabot nga siya makapadayon na sa unahan bisan kon wala niya madawat ang mga tubag o ang sangpotanan nga gusto unta niya. “Ang pagkaayo nga akong gilaoman wala pa moabot,” miingon si Sinah. “Apan ako nakat-on pa og dugang nga ang Langitnong Amahan adunay plano, nga ako nakasinati niini tungod kay adunay rason.”
Ang iyang hugot nga pagtuo naghatag usab niya og panglantaw. “Wala ko kahibalo kon kanus-a na usab ko makalingkawas sa sakit o kon kana ba ang mahimong sitwasyon sa nahabilin nakong kinabuhi,” siya miingon. “Wala ko kahibalo, apan ako adunay hugot nga pagtuo sa Ginoo nga sa labing ulahi kon ako mabalik Kaniya, dili na ko mobati og sakit ug nga sa bisan unsang paagi adunay rason nganong nakaagi ko niini.”