Ang Akong Patriyarkal nga Panalangin Miluwas sa akong Hugot nga Pagtuo

Paghulagway pinaagi ni Katelyn Budge

Adunay higayon diin naghunahuna ko nga mobiya sa Simbahan. Kini nahitabo sa wala pa ko moadto sa akong una nga AKK nga komperensiya. Atol nianang higayona, ako adunay kusog nga pagbati nga mangutana sa pipila ka tawo kon unsaon nga mas makapaduol ni Kristo ug unsaon sa pagkuha og patriyarkal nga panalangin. Usa ka suod nga higala nako ang miingon nako nga imo lang sultihan ang imong bishop nga gusto ka og panalangin, ug tabangan ka niya.

Sa sinugdanan naghunahuna ko, “Murag kahibudngan kaayo nga adunay panalangin nga molungtad sa imong tibuok kinabuhi.” Apan gibati gayod nako nga kinahanglan nakong kuhaon ang akoa. Mihimo ko og pipila ka pagtuon sa kasulatan kauban sa akong papa, ug nag-istoryahanay kami mahitungod sa patriyarkal nga mga panalangin ug kanus-a niya nakuha ang iyaha.

Ang akong pagbati sa dihang nadawat nako ang akong panalangin kusog kaayo. Mabati nako ang presensiya sa Espiritu Santo ug bisan gani ang akong mga apohan sa pikas habig. Usa ka butang nga akong isulti sa akong mas bata nga kaugalingon karon nga naa na koy patriyarkal nga panalangin mao ang paghunahuna mahitungod sa kinabuhi nga adunay mahangtoron nga panglantaw. Kon ang usa ka tuig o usa ka adlaw o usa ka semana dili mao kon unsay inyong gilaoman, okey ra kana. Kamo adunay kahangtoran nga nagpaabot kaninyo. Murag dili kini mahimong sayon, apan mahimo nato ang tanan pinaagi ni Jesukristo ug sa atong Langitnong Amahan. Sila tinuod nga nahigugma kanato, ug Sila motabang kanato nga makab-ot ang atong mga tumong ug mahimong ang labing maayo nga bersiyon sa atong kaugalingon.

Kon wala makuha ang akong panalangin, seguro mibiya na ko sa Simbahan. Anaa na tingali ako sa lawom nga katubigan. Dili na tingali ako makahunahuna sa pagserbisyo og misyon. Dili na gani tingali ko buhi, sa tinud-anay lang. Kini nakatabang kanako sa daghan kaayong paagi. Ako modasig gayod ni bisan kinsa nga naghunahuna sa pagkuha og patriyarkal nga panalangin sa pagbuhat niini, tungod kay kini makatabang gayod kaninyo.