Kalipay pinaagi sa Pagserbisyo sa Uban
Mosalig sa Ginoo sa pagpangita og hingpit nga kalipay alang sa imong kaugalingon, ug motabang sa uban nga mobati usab niini.
Usahay kon kita nabalaka o hilabihan ang kaguol, tingali bation nato nga kita walay kadasig—o gani walay tinguha—sa pagtabang ug sa pagserbisyo. Apan ang Ginoo makapanalangin nato kon kita maningkamot. Ania ang tulo ka ideya.
1.Tan-aw ngadto sa Ginoo, Mopakigbahin sa Unsay Inyong Nakat-onan
Human ang mga anak nga lalaki ni Mosiah nakabig ngadto sa Ginoo, nahimo silang banggiitan nga mga misyonaryo, apan wala sila magmalamposon sa kanunay. Dili ikatingala, nawad-an sila og kadasig. Ang Ginoo mihupay nila, nga nag-ingon, “Antosa uban sa pailob ang inyong mga kasakit, ug ako mohatag kaninyo og kalamposan” (Alma 26:27).
Kanus-a man kamo gihupay sa Ginoo? Ipakigbahin ang inyong kasinatian ngadto sa usa ka tawo nga tingali nagkinahanglan og pagdasig.
2. Magmatinud-anon diha sa Templo
Kon magkinahanglan kita og emosyonal nga kadasig, ang pagkaanaa sa templo makatabang nato nga mobati og kalinaw. Human nga ang yuta nagun-ob ug natabonan sa kangitngit human sa Paglansang sa Krus ni Kristo, ang mga Nephita nagpundok libot sa templo. Human sa Iyang Pagkabanhaw, si Jesus nagpakita ug nangalagad kanila (tan-awa sa 3 Nephi 11:1–15).
Paghunahuna og bisan unsa nga espesyal ninyo nga mga kasinatian diha sa templo, duol sa templo, o sa pagpaminaw mahitungod sa templo. Matag higayon nga nagserbisyo kamo sa templo o naghimo sa buhat sa family history, kamo nangalagad sama sa gihimo ug gitudlo ni Jesus. Nagdala kamo og mga kalag paduol ngadto Kaniya sa tinagsa-tagsa.
3. Gamita ang Inyong mga Talento sa Pagserbisyo
Sa dihang nahibaloan ni Jesus nga ang Iyang ig-agaw, si Juan Bautista, gipatay, Siya “miadto … sa usa ka dapit nga awaaw” (Mateo 14:13). Apan sa dihang nakita Niya ang dakong grupo sa mga tawo nga misunod Kaniya, Iyang gipadayon ang Iyang pangalagad, nag-ayo sa mga masakiton ug gani naghimo og milagro sa pagpakaon sa liboan ka tawo pinaagi sa pagpadaghan sa pan ug isda (tan-awa sa Mateo 14:14–21).
Ang Ginoo naghatag nato og gasa aron sa pagtabang sa pagpanalangin sa uban (tan-awa sa Doktrina ug mga Pakigsaad 46:11, 26). Paghunahuna og usa ka butang nga gusto ninyong buhaton, ug himoa kini nga usa ka buhat sa pagserbisyo. Bisan unsa kini, gikan sa pagluto alang sa usa ka tawo ngadto sa pagpalakaw sa ilang iro!