Ang Kamatuoran Nakatabang Nako nga Makalingkawas sa Pornograpiya
Nakahimo ko sa pagbuntog sa akong panglimbasog sa pornograpiya pinaagi lamang sa tabang ni Jesukristo ug sa Iyang mga kamatuoran.
Paghulagway pinaagi ni Alex Nabaum
Sa edad nga 12 anyos pa, nakadungog ko sa mga tawo nga naghisgot og dili maayo nga mga butang didto sa eskwelahan. Matag karon ug unya, pipila sa akong mga higala naghunahuna nga makalingaw nga patan-awon ko nila og mga hulagway sa pornograpiya. Kadugayan, nakuryuso ko ug natental nga mosusi pa og dugang. Nadala ko sa pornograpiya, nga mikawat sa dakong bahin sa akong kinabuhi sulod sa pipila ka tuig. Nakaapekto gayod kaayo kini kanako.
Nahadlok ko nga mosulti ngadto sa laing tawo mahitungod sa akong pagpanglimbasog sa pornograpiya tungod kay dili ko gusto nga adunay tawo nga maghunahuna nako og lain. Sa dihang nasakpan ko sa akong mga ginikanan ug gikompronta ko nila mahitungod niini, naulaw ko ug mibati gayod og dili maayo ug sad-an. Karon, nalipay ko nga gihimo nila kadto, ug unta gisulti ko kini kanila sa mas sayo pa. Gihigugma ko nila bisan pa man niana ug gitabangan ko nga mabuntog ang akong mga kalisod.
Ang akong mga ginikanan miawhag nako nga makigsulti sa akong bishop. Misupak ko og kadali, apan sa kaulahian misulti ko kaniya, ug siya masinabtanon. Gitudloan ko niya mahitungod sa proseso sa paghinulsol. Paglabay sa panahon, gitabangan ko niya nga makahinulsol. Giawhag ko niya nga magtakda og ginagmay nga mga tumong ug magsugod og maayo nga mga maandan nga buhaton sama sa pag-ampo, pagbasa sa akong mga kasulatan, ug sa pagpuno sa akong oras sa maayo nga mga butang. Kini nga mga pamatasan makadapit sa Espiritu ug makatabang nako nga mosalig sa Manluluwas hangtod nga dili na ko ganahan nga motan-aw pa og pornograpiya.
Naglisod ko kadali, apan uban sa tabang sa akong mga ginikanan, sa bishop, ug sa Ginoo, nakasugakod ko niini. Matental gihapon ko usahay, apan naningkamot ko og maayo aron maabot kon asa ko karon. Karon limpyo na ko sulod sa duha ka tuig. Mas masaligon na ko karon. Sa tibuok niini nga panaw, akong nakat-onan ang pipila ka importante nga mga butang.
Mahangtorong mga Kamatuoran mahitungod sa Atong mga Lawas
Diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili akong nakat-onan nga ang atong mga lawas sagrado. Bisan unsa pa kamo tan-awon o unsa ang pagtan-aw sa uban ninyo, ang inyong lawas susama sa hitsura sa Dios.
Ang Doktrina ug mga Pakigsaad 130:22 nagtudlo nga ang Langitnong Amahan ug si Jesukristo adunay mga lawas nga unod ug mga bukog; apan ang Espiritu Santo wala. Sama sa usa ka templo, ang atong mga lawas usab “usa ka dapit diin makapuyo ang Espiritu.” Kinahanglan nga atimanon nato kini. Gusto nakong tahoron ang akong lawas pinaagi sa pagpadayon niini nga limpyo, himsog, ug takos sa Espiritu nga magauban kanako.
Nakat-onan usab nako nga ang sekswal nga mga pagbati sagrado. Dili kini usa ka sala. Sa higayon nga atong pukawon kini nga pagbati gawas sa kaminyoon o buhaton kini sa dili tukmang paagi mao ang makapahimo niining sala. Gusto sa Dios nga makabaton kita og malipayon nga mga kinabuhi ug mga pamilya nga makauban nato sa kahangtoran. Ang sekswal nga mga pagbati importante nga bahin sa plano sa Dios. Ang Alang sa Kalig-on sa mga Kabatan-onan nga giya nagtudlo nako nga dili ka makahimo sa pagrespeto sa imong lawas kon dili ka morespeto niana nga mga pagbati.
Kahupayan ug Tabang
Ganahan ko og musika. Ganahan ko nga mokanta ug mamniaw sa makapadasig nga musika sama sa mga himno ug sa mga kanta sa StrivetoBe nga makatabang nako nga mobati sa Espiritu. Usa sa akong mga paborito mao ang “I Can Do All Things.” Kini nga kanta nagpahinumdom nako nga “May kalig-on ako sa pagsagubang sa tanan tungod sa gahom nga gihatag kanako ni Kristo” (Mga Taga-Filipos 4:13).
Si Jesukristo mao ang akong lig-on nga pundasyon. Siya mao ang akong kahayag. Siya mao ang akong Manluluwas ug Manunubos ug daghan pa. Siya nahigugma ug nagpakabana kanato. Gusto Niya nga kita molampos ug mohimo sa atong labing maayo. Siya motabang nato bisan unsa pa. Makapahupay kini kanako tungod kay daghan kaayo ko og sayop. Nindot kaayo nga ang usa ka tawo nga talagsaon kaayo nahigugma kaayo kanako. Naningkamot ko sa labing maayo kutob sa akong mahimo aron mahisama Kaniya—alang Kaniya.
Dili kini igsapayan kon unsa pa ang inyong gisagubang o kapila kamo napakyas o napukan. Kon kamo mosalig sa Manluluwas ug sa Iyang Pag-ula, Siya motabang ninyo ug mosuporta ninyo hangtod sa kataposan. Nasayod ko nga nakahimo lamang ko sa pagbuntog sa akong panglimbasog sa pornograpiya pinaagi sa Iyang tabang. Pinaagi ni Jesukristo, makasugakod gayod kamo sa bisan unsa nga butang.
Ang tagsulat nagpuyo sa Georgia, USA.