Digital Lamang: Mga Tingog sa Kabatan-onan
Usa ka Wala Damha nga Panagtagbo
Bisan pa man sa gipahinungod nga mga paningkamot sa akong inahan atol sa mga family home evening, kanunay ko nga mas interesado sa mga dula sa bidyo kay sa mga butang nga espirituhanon. Ang ideya sa pagserbisyo og usa ka misyon ingon og layo ra ug dili madanihon ngari nako.
Apan ang tanan nausab usa ka hilom nga gabii dihang 15 anyos ko. Ako lang usa diha sa sala, nagdula diha sa akong cellphone. Ang akong mama ug igsoong babaye didto sa laing kwarto. Sa kalit lang, nakalitan ko sa usa ka saba nga nakakuha sa akong pagtagad: ang mga kasulatan kahibulongang nahagbong lang gikan sa aparador ug mitugpa diha sa taliwala sa kwarto.
Gilabay ba Kaha Ni Mama ang mga Kasulatan ngari Nako?
Sa sinugdanan nagtuo ko nga gilabay sa akong mama ang libro aron moundang ko sa akong cell phone, apan naamgohan dayon nako nga dili niya kana buhaton. Ug walay hangin o bisan unsa nga makapasabot kon giunsa nga ang mga kasulatan nahagbong.
Nakuryuso, akong gibutang ang akong phone ug gipunit ang mga kasulatan, giukab kini nga bisan asa lang. Ang mga pulong nga akong gibasa mura og usa ka direktang tawag ngari sa akong kasingkasing:
“Karon tan-awa, ang katingalahan nga buhat hapit na moabot ngadto sa mga anak sa mga tawo.
“Busa, O kamo nga magsugod sa pag-alagad sa Dios, tan-awa nga kamo moalagad kaniya sa tibuok ninyong kasingkasing, gahom, hunahuna ug kusog, nga kamo magbarog nga walay kasaypanan sa atubangan sa Dios sa kataposang adlaw.
“Busa, kon kamo adunay tinguha sa pag-alagad sa Ginoo, kamo gitawag ngadto sa buhat” (Doktrina ug mga Pakigsaad 4:1–3).
Wala pa gayod ko sukad nakabasa niini nga mga bersikulo kaniadto. Ang mga pulong nakaimpluwensiya og maayo kanako.
Gitawag sa Pagserbisyo
Midagan ko aron sultihan ang akong inahan sa unsay nahitabo ug mipakita kaniya sa tudling nga akong gibasa. Mitan-aw siya nako nga dunay luha ang iyang mga mata ug miingon mituo siya nga usa kadto ka pahinumdom gikan sa Langitnong Amahan nga ako gitawag pinaagi sa usa ka propeta aron maandam ang akong kaugalingon sa pagserbisyo og misyon.
Gikan nianang higayona, nagsugod ko sa pagkakita sa akong kinabuhi ug sa akong katuyoan diha niini uban sa bag-ong panglantaw. Bisan tuod og ganahan gihapon ko og mga video game, nagsugod ko sa pagkaamgo nga adunay lawom nga nausab sa akong kahiladman. Ang akong cell phone kanunayng anaa sa sofa samtang akong gipamalandongan ang mga pulong ni Jesukristo nga nakatandog sa akong kalag.
Karon nagserbisyo ko isip usa ka misyonaryo, nagpakigbahin sa mga maayong balita sa ebanghelyo. Nalipay ko sa akong espirituhanong panaw nga nasugdan sa dihang ang kasulatan nahagbong ngadto sa akong kinabuhi usa ka hilom nga gabii, nagdala ngadto sa usa ka balaan nga tawag nga dili nako mabaliwala.
Elder Pedro Garcia, edad 20, São Paulo, Brazil
Malingaw sa pagpamasol, pag-ehersisyo, ug pagdula og mga video game.