Tan-aw Kanako!

Sa higayon nga mosulti ko sa mga estudyante sa lawak klasehanan og, “Tan-aw kanako!” Akong namatikdan nga kon mosulti ko niini, silang tanan motan-aw sa akong mga mata. Dili sila motan-aw sa akong sapatos, amerikana, o kurbata. Dili sila motan-aw sa akong buhok o mga kamot. Motan-aw sila sa akong mga mata. Ang akong mga mata mao ang mga bintana diin ang akong tinuod nga “ako” nagpuyo.

Diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili, gitudloan kita nga ang atong mga lawas sagrado ug “itratar ang [atong mga lawas]—ug ang mga lawas sa ubang tawo—uban sa pagrespeto.” Atong mabasa: “Samtang mohimo kamo og mga desisyon mahitungod sa inyong panamit, estilo sa buhok, ug panagway, pangutan-a ang inyong kaugalingon, ‘Gitahod ba nako ang akong lawas isip usa ka sagrado nga gasa gikan sa Dios?’ Gusto sa Langitnong Amahan nga makita nato ang usag usa kon kinsa gayod kita: dili lang pisikal nga mga lawas apan Iyang hinigugmang mga anak nga adunay balaanon nga padulngan. Likayi ang mga estilo nga mopakita o modani og dili tukma nga atensiyon ngadto sa inyong pisikal nga lawas kay sa kon kinsa kamo isip usa ka anak sa Dios.”

Sa dihang nagserbisyo ko isip presidente sa misyon, gipahinumdoman nako kanunay ang mga misyonaryo bahin niini nga baroganan, kay daghang tawo ang nagsul-ob og dili disente nga sinina. “Tan-aw sa mga mata,” giingnan nako ang mga misyonaryo. “Tan-awa ang tawo. Dili kay lawas lang ang tan-awon. Makita ang usa ka anak sa Dios.”

Kon kamo motan-aw sa uban, paningkamot nga makita sila. Ayaw sila hukmi pinaagi sa ilang mga sinina (o kakulang niini) o sa estilo sa buhok. Motan-aw sa ilang mga mata. Motan-aw nga lapas pa sa panggawas nga panagway ngadto sa kon si kinsa gayod sila—mga anak sa Dios.

Mosunod niini nga linya sa pangatarongan, kamo makapili sa pagsinina ug pagpresentar sa inyong kaugalingon sa paagi nga dili makabalda sa inyong tinuod nga pagkatawo isip usa ka anak sa Dios. Kamo makapili sa paghimo niini nga sayon kutob sa mahimo alang sa uban nga dili mabalda ug makita kamo kon si kinsa gayod kamo. Pagsinina og disente ug tarong. Pagsinina nga ang mga tawo makakita ninyo ug dili lamang sa inyong panggawas nga panagway.

Niini nga paagi, inyong mapakita nga kamo nasayod, sama sa atong mabasa diha sa Alang sa Kalig-on sa mga Kabatan-onan nga giya, nga “ang inyong lawas usa ka talagsaon nga gasa gikan sa inyong Langitnong Amahan. Siya mihatag niini kaninyo aron sa pagtabang ninyo nga mahimong mas sama Kaniya.”