1 තවද දැන් බලව, මාගේ ප්‍රියාදර සහෝදරයෙනි, මම නුඹලා වෙත කතා කරන්නෙමි; මක්නිසාද මම, නීෆායි, අන්‍යජාතිකයන්ට වඩා නුඹලා බොහෝ ධර්මිෂ්ඨ යැයි උපකල්පනය කිරීමට මම නොපෙළෙන්නෙමි. මක්නිසාද බලව, නුඹලා දෙවියන්වහන්සේගේ අණපනත් තැබුවහොත් මිස, නුඹලා සියලු දෙනාම එසේම නැසෙන්නෝය; තවද පවසා ඇති වචන නිසා අන්‍යජාතිකයන් සම්පූර්ණයෙන්ම විනාශ වන්නේය යැයි නුඹලා උපකල්පනය නොකළ යුතුය.

2 මක්නිසාද බලව, පසුතැවිලි වන්නාවූ තරම් බොහෝ අන්‍යජාතිකයන් දෙවියන්වහන්සේගේ ගිවිසුම්ගත් ජනතාවය; තවද පසුතැවිලි නොවන්නාවූ තරම් යුදෙව්වන් නෙරපා දමන ලදී; මක්නිසාද ඊශ්‍රායලයේ ශුද්ධ වූ තැනැන්වහන්සේ වන, ස්වාමීන්වහන්සේ කෙරෙහි පසුතැවිලි වන සහ විශ්වාස කරන ඔවුන් සමඟ මිස කිසිවෙකු සමඟ ගිවිසුම් ඇති නොකරන සේක.

3 තවද දැන්, මා යුදෙව්වන් සහ අන්‍යජාතිකයන් පිළිබඳව යම් තරමකට වැඩියෙන් කතා කරන්නෙමි. මක්නිසාද මා පවසා ඇති පොත ඉදිරියට පැමිණ, සහ අන්‍යජාතිකයන් වෙත ලියූ පසු, තවද නැවතත් ස්වාමීන්වහන්සේ වෙත මුද්‍රා කළ විට, ලියා ඇති වචන විශ්වාස කරන බොහෝ දෙනෙක් සිටින්නෝය, තවද ඔවුන් සමඟ අපගේ වංශයේ ඉතිරි වූවන් ඔවුන් රැගෙන යන්නෝය.

4 තවද එවිට අප ජෙරුසලමෙන් පිටතට පැමිණියේ කෙසේද, සහ ඔවුන් යුදෙව්වන්ගෙන් පැවත එන්නන් වන බවද, අප පිළිබඳව අපගේ වංශයේ ඉතිරි වූවන් දැනගන්නෝය.

5 තවද ජේසුස් ක්‍රිස්තුස්වහන්සේගේ ශුභාරංචිය ඔවුන් අතර ප්‍රකාශ කරනු ලබන්නෙහිය; එබැවින්, ඔවුන්ගේ පියවරුන්ගේ අතර තිබෙන්නාවූ, සහ ඔවුන්ගේ පියවරුන්ගේ දැනුම, සහ ජේසුස් ක්‍රිස්තුස්වහන්සේ පිළිබඳ දැනුම, ඔවුන් හට පිළිසකර කරන ලදී.

6 තවද එවිට ඔවුන් ප්‍රීතිමත් වනු ඇත්තේය; මක්නිසාද ඔවුන් වෙත එය දෙවියන්වහන්සේගේ හස්තයෙන් ලද ආශිර්වාදයක් බව ඔවුන් දැනගන්නෝය; තවද ඔවුන්ගේ අන්ධකාරයේ කොරපොතු ඔවුන්ගේ ඇස් වලින් වැටෙන්නට පටන් ගන්නේය; තවද ඔවුන් අතරින් බොහෝ පරම්පරාවන් නොමැරෙන්නෝය, මන්ද ඔවුන් පවිත්‍ර සහ ප්‍රීතිමත් ජනතාවක් වනු ඇත්තේය.

7 තවද එය මෙසේ සිදු වන්නේය, එනම් විසිරී ඇති යුදෙව්වන් ද ක්‍රිස්තුස්වහන්සේ කෙරෙහි විශ්වාස කිරීමට පටන් ගන්නෝය; තවද ඔවුන් දේශයේ මුහුණුවරයේ එක් රැස් වෙන්නට පටන් ගන්නේය; තවද ක්‍රිස්තුස්වහන්සේ කෙරෙහි විශ්වාස කරන තරම් බොහෝ දෙනා ද ප්‍රීතිමත් ජනතාවක් වනු ඇත්තේය.

8 තවද එය මෙසේ සිදු වන්නේය, එනම් පොළොව මත උන්වහන්සේගේ ජනතාවගේ නැවත පිහිටුවීම ගෙන ඒම උදෙසා, දෙවි වූ ස්වාමීන්වහන්සේ උන්වහන්සේගේ කාර්යයන් සියලු ජාතීන්, ඥාතීන්, භාෂාවන් හා ජනතාවන් අතර ආරම්භ කරන සේක.

9 තවද දෙවි වූ ස්වාමීන්වහන්සේ දුප්පතුන්ව ධර්මිෂ්ඨකමින් විනිශ්චය කර, සහ පොළොවේ යටහත් පහත් වූවන් උදෙසා සාධාරණත්වය සමඟ අවවාද කරන සේක. තවද උන්වහන්සේ උන්වහන්සේගේ මුඛයේ යෂ්ටියෙන් පොළොවට පහර දෙන සේක; තවද උන්වහන්සේගේ තොල් වල සුසුමෙන් දුෂ්ටයන් නසන සේක.

10 මක්නිසාද දෙවි වූ ස්වාමීන්වහන්සේ ජනතාව අතර මහත් වෙන් කිරීමක් ඇති කරන කාලය වේගයෙන් පැමිණෙනු ඇත, තවද උන්වහන්සේ දුෂ්ටයන් විනාශ කරන සේක, එසේය, උන්වහන්සේ දුෂ්ටයන්ව ගින්නෙන් විනාශ කරන්නට සිදුවූවත්, උන්වහන්සේගේ ජනතාව බේරා ඉතුරු කරන සේක.

11 තවද ධර්මිෂ්ඨකම උන්වහන්සේගේ ඉඟටියේ පටිය වන සේක, තවද ඇදහිලිවන්තකම උන්වහන්සේගේ බඳෙහි පටිය වන සේක.

12 වෘකයා බැටළු පැටවා සමඟ වාසය කරන්නේය, දිවියාද එළු පැටවා සමඟ ලගින්නේය; වස්සාද තරුණ සිංහයාද තර සතාද එක්ව සිටින්නෝය; කුඩා දරුවෙක් උන් ගෙන යන්නේය.

13 එළදෙනත් වලසාත් එක්ව තෘණ කන්නෝය; උන්ගේ පැටවුද එක්ව ලගින්නෝය. සිංහයා හරකා මෙන් පිදුරු කන්නේය.

14 කිරි දරුවා නාගයාගේ තුඹස පිට සෙල්ලම් කරන්නේය, කිරිවැරූ දරුවා පොළඟාගේ ගුල පිට තමාගේ අත තබන්නේය.

15 මාගේ ශුද්ධ කන්දේ සීමා තුළෙහි කිසි අනතුරු කිරීමක්වත් විනාශ කිරීමක්වත් නොවන්නේය. මක්නිසාද ජලයෙන් මුහුද වැසී තිබෙන්නාක්මෙන්, ස්වාමීන්වහන්සේ ගැන දැනගැන්මෙන් පොළොව පිරීයන්නේය.

16 එබැවින්, සියලු දේශයන්හි දේ දන්වා තබන්නේය; එසේය, සියලු දේ මනුෂ්‍ය දරුවන් හට දන්වා තබන්නේය.

17 එය එළිදරව් වන්නාක් මිස රහස්‍යය යනු කිසිවක් නැත; ආලෝකයේ ප්‍රකාශිත වන්නාක් මිස අන්ධකාරයේ කිසිඳු කාර්යයක් නොමැත; තවද කිසිඳු දෙයක් ලිහිල් වන්නාක් මිස පොළොව මත මුද්‍රා කර නොමැත.

18 එබැවින්, මනුෂ්‍ය දරුවන් හට හෙළිදරව් කර ඇති සියලු දේ එම දවසේදී හෙළිදරව් කරනු ඇත; තවද දිගු කලකට, මනුෂ්‍ය දරුවන්ගේ හදවත් කෙරෙහි බලය සාතන්ට තවත් නොමැති වන්නේය. තවද දැන්, මාගේ ප්‍රියාදර සහෝදරයෙනි, මම මාගේ ප්‍රකාශයන්හි අවසානය දක්වමි.